So, sindruhu so malaʼika si lö sökhi. Hezo moroi ira? Törö tödöu, me inötö iwöwöi malaʼika Lowalangi, no itehegö khöra ba wangai angetula samösa. Lö ara me no aefa muwöwöi niha siföföna, yaʼia daʼö Adamo ba Khawa, so malaʼika sangogunaʼö fangaʼinia angetula andrö ba zi lö sökhi ba tebörögö wamadaö ba gulidanö. Mofozu ia ba wondrönisi Adamo hegöi Khawa ba wamadaö khö Lowalangi. (I Moze 3:1-7; Famaʼeleʼö 12:9) Lö nifatunö Zura Niʼamoniʼö haniha döi malaʼika andrö mazui hadia wetaronia ba zorugo fatua lö mamadaö ia. Hizaʼi, me no aefa mamadaö ia, ifotöi ia Sura Niʼamoniʼö Satana, eluahania ”Solawa”, ba Afökha, eluahania ”Si Falimo”.​—Mataiʼo 4:8-11.

Hizaʼi, lö tebato ndrege daʼö wamadaö andre. Me götö Noakhi, so ndra malaʼika ”sondröi nahiara andrö” ba lö saʼe tobali ira ösi nomo Lowalangi. Möi ira tou ba gulidanö tobali niha ba lafalua zi lö sökhi, si lö tefaudu ba gohitö dödö wowöwöi yaʼira.​—Yuda 6; I Moze 6:1-4; I Fetero 3:19, 20.

Hadia zalua khö ndra malaʼika si lö sökhi andrö? Me ibeʼe molö sebua Lowalangi ba wangehao ulidanö, lafuli zui ira ba mboto eheha ba lafuli ira ba zorugo. Hizaʼi, lö saʼe itehe Lowalangi mangawuli khöra ”faʼasalawara”. Lua-luania, ibeʼe ira Lowalangi ba wetaro fondrege zide-ide, hulö ”nirate ba zogömi-gömi” nifotöi Tartarus (Yuda 6; II Fetero 2:4, Terjemahan Dunia Baru) Samatörö ndra bekhu andre yaʼia daʼö Satana Afökha ”salawa mbekhu”, ba ”itagö gamuata malaʼika haga”.​—Mataiʼo 12:24; II Korindro 11:14.

Sura Niʼamoniʼö zameʼe famahaʼö wa no tefasindro Mbanua Lowalangi, sambua famatörö ba zorugo nifatörö Mesia me 1914. * Aefa’ daʼö, mufofanö Zatana moroi ba zorugo hegöi bekhu soloʼö khönia numalö ba gulidanö. Faʼatedou waʼalösökhi hegöi famalua amuta wohorö salua ba gulidanö zi tobali tandra wahöʼösa hegöi fönura.​—Famaʼeleʼö 12:9-12.

Hizaʼi, faʼatedou waʼalösökhi hegöi faʼudusa zameʼe faduhu dödöda wa lö aratö ginötö nitehegö khöra. Ba zi lö aratö, lö hadöi saʼe zi tola lafalua ira malaʼika si lö sökhi. Na no aefa wamatörö Mbanua Lowalangi ba zi 1.000 fakhe faʼara, labeʼe khöra maʼifu ginötö ba wotandraigö niha gulidanö si tobali fondrege zafuria. Na no aefa daʼö, ba muhori saʼae ira götö-götö waʼara.​—Mataiʼo 25:41; Famaʼeleʼö 20:1-3, 7-10.