Me samuza inötö ba luo Migu tanö owi, möi Kenneth hegöi Filomena si toröi ba Curaçao ba wamalukhaisi sambua fongambatö nifahaʼöra ba Zura Niʼamoniʼö.

Itutunö Kenneth, ”Me marugi, no lakusi nomo ba lö hadöi motora. Hizaʼi, teʼoʼou dödögu ba wotelefo foʼomonia ira alawe.”

Itema telefo andrö ira alawe ba ifatunö wa no mofanö ba wohalöwö woʼomonia. Hizaʼi, me iʼila wa no so föna nomonia Kenneth faoma Filomena, möi ia ba mbawandruhö ba ifeʼamöi ira yomo.

Iʼanemaiʼö laʼila wa bohou meʼe ia. Me ibörötaigö wamahaʼö ba Zura Niʼamoniʼö Kenneth faoma fangandrö, ifuli zui meʼe ndra alawe andrö. Tobali, lahaogö wanofu khönia ira Kenneth hegöi Filomena hadia mbörö wa meʼe ia.

Itutunö ira alawe andrö wa edöna ibunu ia samösa ba zi laluo andrö, ba isura-sura zura, niröinia menaʼö khö woʼomonia ira matua me tohare telefo moroi khö Kenneth, ba daʼö zombatogö yaʼia. Itutunö khöra wa fawuka sibai wangera-ngerania, tobali labeʼe khönia mbua wangera-ngera si möi fondrara dödö moroi ba Zura Niʼamoniʼö. Daʼö zi tobali fanolo khönia.

Imane Kenneth, ”Maʼandrö saohagölö khö Yehowa me no itehegö khöma wanolo ira alawe si no aetu fanötöna andre, mendrua manö me no iʼodela malaʼika mazui ehehania niʼamoniʼö, ba wotelefo ira alawe andrö!” *

Hadia sindruhu-ndruhu nitolo Lowalangi Kenneth hegöi Filomena, he na iʼodela malaʼika mazui ehehania niʼamoniʼö mazui faʼabölönia? Mazui hadia ha si lö muʼodödögö waʼatohare telefo andrö?

Lö taʼila tatatugöi. Hizaʼi, moguna aboto ba dödöda wa iʼogunaʼö malaʼikania Lowalangi ba wanolo niha ba wamati. Duma-dumania, ifatunö Sura Niʼamoniʼö wa iʼogunaʼö malaʼika Lowalangi wondröniaʼö samösa sanuriaigö sotöi Filifo ba wanolo pejabat Gaitiofia ba wanuturu lala sanandrösa ba wamati.​—Halöwö Zinenge 8:26-31.

Ngawalö agama zamahaʼö wa so malaʼika, so ösa niʼamaedolagö tobali samalua si sökhi samalua niwaʼö Lowalangi mazui malaʼika solumöʼö. Ato zi faduhu tödö wa tenga ha asala so manö malaʼika, hizaʼi laʼila göi wa tola ladönisi waʼaurira ira malaʼika. Hizaʼi, ato göi zi lö faduhu tödö wa so malaʼika.

Hadia sindruhu-ndruhu so malaʼika? Na sindruhu so, he zo moroi mbörötara? Hadia niwaʼö Zura Niʼamoniʼö sanandrösa ba malaʼika? Hadia tola ladönisi waʼauriu? Dataʼalui wanema linia.