Lö nifahaʼö Zura Niʼamoniʼö wa dozi ita taʼokhögö malaʼika solumöʼö. Sindruhu sa wa no irai imane Yesu, ”Mifaigi, faböi miʼositengagö zide-ide andrö, samösa [ira nifahaʼö Yesu]. Uwaʼö sa khömi, malaʼikara andrö ba zorugo, ba lö mamalö-malö wa laʼila mbawa Namagu andrö, si so ba zorugo.” (Mataiʼo 18:10) Hizaʼi, tenga daʼö geluaha niwaʼö Yesu wa dozi ita taʼokhögö malaʼika solumöʼö. Tobali, omasi iforomaʼö Yesu wa laʼameʼegö tödö ira malaʼika ndra nifahaʼönia zamösana. Börö daʼö, lö lafalua hadia ia zi lö eluaha hegöi samaʼala faʼauri ira ono mbanua Yehuwa, börö me laʼila wa lö laʼokhögö malaʼika solumöʼö.

Hadia daʼö geluahania wa lö latolo niha ira malaʼika? Tenga. (Zinunö 91:11) So ösa zi faduhu tödö sibai wa iʼogunaʼö malaʼikania Lowalangi ba wolumöʼö hegöi ba wameʼe khöra fanuturu lala. Duma-dumania simane Kenneth, nidunö-dunö ba wamobörö. Tola manö atulö nirasoinia andrö. Asese laʼila zi tobali tandra ira Samaduhuʼö Yehowa wa itolo ira malaʼika ba ginötö manuriaigö. Hizaʼi, börö me tebai muʼila hörö malaʼika, andrö wa lö taʼila sibai hewisa ba hamega iʼogunaʼö ira Lowalangi ba wanolo niha ba ngawalö hadia ia. Hewaʼae simanö, lö tebulö taʼandrö saohagölö khö Lowalangi me lö mamalö itolo ita, hewaʼae lö taʼila hewisa lalania wamalua daʼö.​—Kolose 3:15; Yakobo 1:17, 18.