ME SIHULÖ wongi Migu ba mböröta ndröfi 1520, tokea dödö niha Meaux, sambua banua side-ide sahatö ba Paris, sanandrösa ba nirongora ba gereja. Larongo labaso Injil ba li ni’oguna’öra samösa ya’ia da’ö ba li Prancis tenga li Latin!

Same’e mbua gera-era ba wamo’eluaha Sura Ni’amoni’ö andrö ya’ia da’ö, Jacques Lefèvre d’Étaples (ba li Latin, Jacobus Faber Stapulensis), ba gafuriata isura zura khö nawönia, ”Lö irai ikhamö tödöu hewisa lala Lowalangi ba wanolo niha mbanua ena’ö tola aboto ba dödöra Daromalinia.”

Ba ginötö da’ö, lö latehe Gereja Katolik hegöi ira teolog ba Paris ba wangoguna’ö Sura Ni’amoni’ö si no mufo’eluaha ba li ni’oguna’ö si ero ma’ökhö. Tobali, hadia zamarou tödö Lefèvre ba wamo’eluaha Sura Ni’amoni’ö ba li Prancis? Ba hewisa wa tola mofozu ia ba wanolo niha mbanua ena’ö aboto ba dödöra Daromali Lowalangi?

Fatua lö tobali samo’eluaha Sura Ni’amoni’ö Lefèvre, i’oguna’ö wa’aurinia ba wangalui hegöi ba wotatugöi fa’asindruhu geluaha karya klasik filsafat hegöi teologi. I’ila wa asese labulö’ö teks meföna ba zi ngaotu fakhe fa’ara börö wamo’eluaha si fasala ba samaelungu. Ba wangaluinia geluaha sindruhu moroi ba teks meföna, ibörötaigö ihaogö ifaha’ö ia ba Zura Ni’amoni’ö si to’ölö la’oguna’ö ba Gereja Katolik ya’ia da’ö Vulgata Latin.

I’odödögö wamaha’ö ya’ia ba Daromali Lowalangi ba ihalö rahu-rahu, ”famaha’ö sanandrösa ba zindruhu khö Lowalangi i’asogö . . . wa’omuso dödö si lö mamalö-malö”. Börö da’ö ibatogö ifaha’ö ia Lefèvre ba filsafat, ba i’oguna’ö fefu wa’abölönia ba wamo’eluaha Sura Ni’amoni’ö.

Me 1509, i’asogö Lefèvre si tobali famatimbaisi moroi ba zi lima famo’eluaha mbuku Zinunö ba li Latin, * simane famo’eluaha Vulgata nifaresonia. Tenga simane ndra teolog ba götönia, iforege ba wangalui lala wama’ema nösi Zura Ni’amoni’ö ba ”wehede salio mu’ila eluaha”. Irege molua-lua nifaluania andrö khö ndra satua-tua tanö bö’ö ba Zura Ni’amoni’ö hegöi ba reformasi.—Faigi kotak ” Hewisa Wa Tola Tedönisi Martin Luther khö Lefèvre”.

Hewa’ae tumbu Lefèvre ba agama Katolik, hiza’i faduhu dödönia wa tola tefalua fefu wamohouni nifalua ba gereja andrö, ha na atulö wamaha’ö niha mbanua ba Daromali Lowalangi. Hiza’i, hewisa wa tola molua-lua ba niha mbanua Daromali Lowalangi ba ginötö andrö na abölö oya tesura ia ba li Latin?

Börö wa’omasi Lefèvre ba Daromali Lowalangi, andrö wa i’alui lala ena’ö tola la’okhögö  da’ö fefu niha. Ba wogamö ohitö dödönia da’ö, me baŵa si Önö 1523, ifazökhi dombua jilid Injil nifo’eluaha ba li Prancis fa’ebuania ha monaha ba kandre-kandre. Börö me ide-ide ia, ha matonga mbölinia moroi ba mböli si to’ölö, andrö wa tola aoha ba niha si tosasa ba wangokhögö Sura Ni’amoni’ö.

Omuso sibai dödö niha mbanua wotema’ö da’ö. Ira matua hegöi ira alawe, omuso sibai dödöra me labaso wehede Yesu ba li ni’ilara irege buku si föföna tefazökhi si 1.200 ahori ba zi hauga waŵa.

Ba wehede famasao si so ba Injil, ba da’ö itutunö Lefèvre wa ifo’eluaha da’ö ba li Prancis ena’ö tola aboto ba dödö ”niha mbanua” ba gereja ”zindruhu andrö simane ya’ira sangokhögö Injil ba li Latin”. Hiza’i, hadia mbörö wa terou sibai dödö Lefèvre ba wanolo niha mbanua ena’ö aboto ba dödöra wamaha’ö Zura Ni’amoni’ö andrö?

Aboto ba dödö Lefèvre wa famaha’ö moroi ba wangera-ngera niha hegöi filsafat, möi famakiko ba Gereja Katolik. (Mareko 7:7; Kolose 2:8) Ba aboto dödönia wa no iada’a ginötönia teturiaigö Injil ”ni’amoni’ö andrö ba zi sagörö ulidanö, ena’ö lö tefaelungu sa’ae niha börö wamaha’ö moroi ba wangera-ngera niha”.

I’odödögö göi Lefèvre ba wangombakha wa fasala mbua gera-era niha si fatuwu ba wamo’eluaha Sura Ni’amoni’ö ba li Prancis. I’o’aya ira börö me so khöra wamini tödö, imane, ”Hewisa wamaha’öra [niha] ba wolo’ö fefu niwa’ö Yesu, na lö omasi ira na la’ila labaso niha mbanua Injil moroi khö Lowalangi andrö ba li ni’ilara?”—Roma 10:14.

 Te da’ö mbörö wa la’alui lala ira teolog ba University of Paris, Sorbone, ena’ö ilau manö zi lö hede-hede Lefèvre. Me mbaŵa si Walu 1523, lö latema’ö wamo’eluaha ba li sasese ni’oguna’ö si ero ma’ökhö hegöi mbua wangera-ngera si so ba Zura Ni’amoni’ö ba lawa’ö tödöra wa tola möi ”fama’ala da’ö ba Gereja”. Na tenga manö börö wanolo Razo Francis I moroi ba Prancis, ba no lahuku Lefèvre tobali si falimo.

Lö itehegö tobali famangoloi dödönia wabu’a-bu’asa sebua andrö Lefèvre ba wamo’eluaha Sura Ni’amoni’ö. Me döfi 1524, me no aefa i’asiwai wamo’eluaha Buku Ni’amoni’ö Yunani (nifotöi Gamabu’ula Li si Bohou), ifazökhi mbuku Zinunö ba li Prancis ena’ö tola mangandrö niha si faduhu tödö ”soroi ba dödö si fao fangide-ngide’ö”.

La’anemai’ö lafareso ira teolog ba Sorbonne zi no ifo’eluaha Lefèvre. Labe’e fareta ena’ö latunu Buku Ni’amoni’ö Yunani andrö föna niha sato, ba la’o’aya göi nisurania andrö ba lawa’ö wa no ”ifaogö ia khö Luther, samaelungu”. Me lakaoni ia ira teolog ba wangatulö’ö lala wangera-ngerania, ilau manö ”zi lö hede-hede” ba ilau mofanö ba Starsbourg. Ba ibini-bini’ö ia ba da’ö wanohugö famo’eluaha Sura Ni’amoni’ö. Hewa’ae so ösa niha zanguma’ö wa so khönia wa’ada’u-da’u, faduhu dödönia wa da’ö lala sabölö sökhi ba wame’e fanema li khöra si lö mangositengagö ”mani-mani” fondrege zebua böli ya’ia da’ö sindruhu moroi ba Zura Ni’amoni’ö.—Matai’o 7:6.

Arakhagö döfi me no ilau mofanö, ituyu ia Razo Francis I tobali samaha’ö khö nononia si öfa fakhe fa’ebua, töinia Charles. Börö halöwö andre wa tola oya ginötönia ba wangasiwai famo’eluaha Sura Ni’amoni’ö. Me döfi 1530, lafazökhi Sura Ni’amoni’ö si no ahori mufo’eluaha baero ba mbanua Prancis ba Antwerp, Belgia nitehegö Kaisaro Charles V. *

Sagötö fa’aurinia, manötöna sibai Lefèvre ena’ö laröi amakhoita niha si no to’ölö lafalua ba gereja ba lafuli ira ba wamaha’ö sindruhu moroi ba Zura Ni’amoni’ö. Faduhu sibai dödönia wa no ”atulö, wa lö tola lö’ö ba niha Keriso ba wombaso hegöi ba wamaha’ö ya’ira samösa ba Zura Ni’amoni’ö”. Da’ö mbörö wa iforege sibai ena’ö tola la’okhögö fefu niha Zura Ni’amoni’ö andrö. Hewa’ae na lö a’ozu i’ila wamohouni nifalua ba gereja, faduhu dödö niha ba nifalua Lefèvre ba wanolo niha mbanua ena’ö aboto ba dödöra Daromali Lowalangi.