Me döfi 1960 tumbu ndra’o ba 17 fakhe ndröfi mamagu me götö da’ö. Iröi ndra’aga bapagu me fatua lö tumbu ndra’o. Toröi ndra’o hegöi mamagu khö ndra tuagu ba Burg, sambua banua side-ide nifotöi Republik Demokrasi Jerman, mazui Jerman Timur döinia iada’a. Ato niha si lö faduhu tödö khö Lowalangi ba da’ö, ba simanö göi nösi nomoma. Molo’ö ya’aga, lö hadöi Lowalangi.

Itugu ebua ndra’o, ba i’ame’egö tödö sibai ndra’o tuagu. Ifaogö ndra’o ba ngawalö halöwö, simane ba wo’anöisi töla geu ba wogaragazini dahania. Börö me iraono nasa ndra’o, omasido wamalua da’ö. Sahono tödö wa’aurigu ba omuso-muso dödögu.

Samuza ma’ökhö, so zikho sabölö-bölö salua me fitu fakhe ndröfigu. Awena dua fakhe me no ubörögö we’amöi ba zekola. Me mangawulido ba nomo, u’anöisi döla listrik. Me ofeta ndra’o ba wa’alawa si-8 meter moroi ba dete danö, lita ndra’o börö me i’osisi mbotogu arus listrik. Me maoso ndra’o ba rumah sakit, tebai urasoi dangagu sa’e. Abölö-bölö wa’akhozinia, ba hasambalö mutaba dangagu börö zokho sebua andrö ena’ö lö telangui ndrogu. Tola ökhalaigö hewisa dödö ndra mamagu hegöi tuagu. Börö me iraono nasa ndra’o, lö aboto sibai ba dödögu hewisa lua-luania ba wa’aurigu na lataba dangagu.

Me no aefa mangawuliga moroi ba rumah sakit, ifuli möi ndra’o ba zekola. La’o’aya ba latuli’ö ndra’o ira awögu, ba lö u’ila ulau mbalögu. Afökhö sibai dödögu ba wehedera hegöi ba nifaluara. Ba gafuriata, labe’e ndra’o ba Zekola Birkenwerzer, ya’ia da’ö Sekolah Khusus Penyandang Cacat. Börö me fandrö-ndröu zekola moroi ba nomo, lö sagu khö ndra mamagu hegöi tuagu ba wamalukhaisi ya’o. Awai andrö tola falukha ndra’o khöra na libur. Ba zi fulu fakhe tenga ba ngai mamagu hegöi tuagu so ndra’o.

Ufomaha ndra’o ba wangoguna’ö ahegu ba wamalua hadia ia. Hadia tola ökhalaigö hewisa wangoguna’ö sendro hegöi garafu ba gahe? Tola ufalua da’ö. Ufomaha göi ndra’o wangoguna’ö ahegu ba wobundra ifögu hegöi ba wosukhu mbugu. Ibörötaigö göi u’oguna’ö kode gahe wahuhuosa ba niha. Ahegu ba tobali tangagu.

 Me ibörötaigö ebua ndra’o, omasido sibai wombaso buku fiksi ilmiah. Itaria ukhalaigö u’okhögö danga robot zi tobali fanolo khögu ba wamalua hadia ia. Me 14 fakhe ndröfigu, ibörötaigö ulau moroko. Umane tödögu wa da’ö zi tola mame’e khögu fa’afaduhu dödö ba urasoi wa hulö simane niha bö’ö göi ndra’o. Ba itaria umane-mane tödögu, ’Tola ufalua göi zimane da’ö. Soroko andrö niha si no ebu-bua, he si so mazui si lö tanga.’

U’oya’ö u’oguna’ö ginötögu ba wamalua hadia ia ba ufaogö ndra’o ba aktivis sosial. Tobali ndra’o samösa moroi ba gotalua Free German Youth, sambua organisasi sosial ndraono si bohou ebua nituhini wamareta, ba tobali ndra’o sekretaris, sambua halöwö si tohude. Fao ndra’o wanunö, wamaehagö puisi, hegöi olahraga ba zi cacat. Me no tamat ndra’o sekola, ibörötaigö mohalöwö ndra’o ba perusahaan si so ba mbanua da’ö. Me no ebu-buado, asese u’oguna’ö famakhili danga börö me omasido hulö simane ndramatua bö’ö ndra’o.

Samuza inötö me ubaloi-baloi kereta api we’amöi ba wohalöwö, so samösa ndra matua sangondrasi ya’o. Isofu khögu hadia tola ukhalaigö na ifuli ifangawuli da’iogu si dombua Lowalangi. Ambö aboto ba dödögu. Sindruhu wö sa wa omasido na ifuli mangawuli da’iogu si dombua, hiza’i molo’ö ya’o lö tola alua niwa’önia andrö! Börö me ateis ndra’o, andrö wa faduhu dödögu wa lö hadöi Lowalangi. I’otarai da’ö, u’alui lala ena’ö lö falukhado khönia.

Lö ara aefa da’ö, so nawögu wohalöwö sogaoni ya’o we’amöi ba wamalukhaisi satuania. Me mabadu-badu kofi, ibörötaigö lafatunö khögu ira satuania sanandrösa khö Lowalangi Yehowa. Awena sibai urongo wa so döi Lowalangi. (Zinunö 83:19) Hiza’i, umane tödögu, ’Lö hadöi Lowalangi, gofu haniha döinia, hasambalö sa u’alui lala ba wamaduhu’ö khö ndra niha da’a wa fasala niwa’öra andrö.’ Börö me simane da’ö lala wangera-ngeragu andrö wa fao dödögu ba wahuhuosa khöra sanandrösa ba Zura Ni’amoni’ö. Hiza’i, lö hadöi si tobali dane-dane khögu wa sindruhu lö hadöi Lowalangi.

Ba ginötö mafaha’ö ndra’aga sanandrösa ba nifa’ele’ö Zura Ni’amoni’ö, arara manö ba adudu wa’afaduhu dödögu wa lö hadöi Lowalangi. Oya wama’ele’ö si no alua hewa’ae no ngaotu ma ngahönö fakhe no lasura ia. Ba zi sambua famaha’ö, mafagölösi hadia zalua ba gulidanö andre ba nifa’ele’ö nisura ba Matai’o faza 24, Luka faza 21, ba II Timoteo faza 3. Hulö simane dandra-tandra si tobali fanolo khö doto ba wotatugöi wökhö zi samösa niha, salua nitutunö ba nifa’ele’ö andrö zanolo ya’o ba wangai angetula wa no so ita ba ”götö safuria”. * Ahöli dödögu. Tola u’ila hörögu wa’alua zi no tefa’ele’ö andre.

Faduhu dödögu wa no sindruhu zi no ufahaö ya’o andre. Ibörötaigö ulau mangandrö khö Lowalangi Yehowa ba uböhöli woroko, hewa’ae no töra 10 fakhe ndra’o niha si sandru ba woroko. Utohugö manö wamaha’ö ya’o ba Zura Ni’amoni’ö ba zi döfi fa’ara.  Me 27 mbaŵa si Öfa 1986, ufabayagö’ö ndra’o idanö ba zi sambua ba’a nidanö, börö me götö da’ö, lö mutehe khö ndra Samaduhu’ö Yehowa wamalua halöwöra ba Jerman Timur.

Börö me lö latehe halöwöma ba da’ö, andrö wa ba gorahua side-ide ba nomo-omo owulo ndra’aga ba ha ma’ifu ndra talifusö ni’ilagu. Ba zi lö utötöna, latehegö khögu ira Samatörö we’amöi ba Jerman Barat, ba ba da’ö latehegö khö ndra Samaduhu’ö Yehowa ba wamalua halöwöra. Ba awena sibai möido ba kebaktian sebua ba u’ila ngahönö wa’ato ndra talifusö ira matua hegöi ira alawe. Sindruhu-ndruhu ahöli dödögu.

Me no aefa adudu Tembok Berlin, awena latehegö sa’e khö ndra Samaduhu’ö Yehowa ba wamalua halöwöra. Awena sa’e ohahau dödöma ba wamosumange Lowalangi Yehowa. Omasido udou’ö mena’ö ginötögu ba wanuriaigö. Hiza’i, ata’udo falukha ba niha sawena u’ila. Ailado börö me cacat ndra’o ba lö to’ölö ndra’o fariawö ba niha. Tobali, me döfi 1992, utandraigö ulau merintis ba uhalö zi 60 za sara waŵa. Omuso sibai dödögu wamalua da’ö. Andrö wa uhalö gangetula ba wamalua ya’ia ero waŵa ba lö uböhöli irugi tölu fakhe.

Itörö tödögu ngawua wehede Zura Ni’amoni’ö, ”Haniha zamomo, zi lö amomo ndra’o göi?” (II Korindro 11:29) Hewa’ae na cacat ndra’o, so nasa khögu wangera-ngera ba tola muhededo. Andrö wa uforege wamalua fondrege zi sökhi ba wanolo niha bö’ö. Börö me lö tangagu, abölö ahakhö dödögu ba niha si cacat. U’ila hewisa wa’afökhö wamalua hadia ia zomasi tafalua ba lö khöda fa’abölö wamalua ya’ia. Andrö wa omasido ube’e wamarou dödö ba niha si so fangera-ngera simanö. Manolo niha göi zame’e khögu fa’omuso dödö.

Atulö wö sa, itaria so khögu wa ide-ide dödö. Fefu da’ö börö me omasido na hulö ndra matua tanö bö’ö göi ndra’o. Ero ma’ökhö oya zi tola ufalua samösa, hiza’i abölö oya ginötö, famorege, hegöi fa’abölö ni’oguna’ögu moroi ba niha bö’ö. So wamarou dödö khögu ero ma’ökhö ya’ia da’ö, ”Ulawa manö fefu, börö zangabölö’ö ya’o andrö.” (Filifi 4:13) Ero ma’ökhö, ibe’e khögu wanolo Yehowa ba wamalua halöwögu ”simane” niha bö’ö. Aboto ba dödögu wa lö irai iröi ndra’o Yehowa. Andrö wa lö omasido göi uröi ia.

Ifahowu’ö ndra’o Yehowa, ibe’e khögu nösi nomo si lö irai usöndra me iraono hegöi ba wa’ebua-buagu. Usöndra wo’omo si sökhi sotöi Elke, sangomasi’ö ya’o hegöi sebolo tödö. Baero da’ö nasa, zuta wa’ato ndra Samaduhu’ö Yehowa tobali talifusögu ba wamati ba zi sagörö ulidanö.

Terara dödögu ba nifabu’u Lowalangi sanandrösa ba waradaiso, wa hasambalö ’ibohouni fefu hadia ia’, simanö göi da’iogu. (Fama’ele’ö 21:5) Aboto ba dödögu nifabu’u andrö na u’angerönusi nifalua Yesu me so ia ba gulidanö. Ba zi sabata, ifadöhö gahe sombuyu ba ifadöhö dalinga si no tetaba. (Matai’o 12:13; Luka 22:50, 51) Bu’usa li Yehowa hegöi dandra zahöli-höli dödö nifalua Yesu zanga’aro’ö tödögu wa ba zi lö aratö hasambalö ahori so fefu ndroto-ndrotogu.

Howu-howu sebua khögu ya’ia da’ö aboto ba dödögu sanandrösa khö Yehowa. No tobali ia amagu ba awögu, sondrorogö ba sangabölö’ö ya’o. Fao dödögu khö Razo Dawido, me isura, ”Ba’a-ba’agu Yehowa . . . no te’orifi ndra’odo; andrö owua-wua dödögu.” (Zinunö 28:7) Hasambalö u’olembai zindruhu andrö ba wa’aurigu. U’olembai ia hewa’ae na lö tanga ba ta’iogu.