1. Hadia nitötöna Yehowa khöda?

 SAMBUA zi möi fangomuso dödö zi no mongambatö yaʼia daʼö na tumbu khöra ndraono. Hewaʼae laʼomasiʼö sibai nonora sawena tumbu andrö, hizaʼi lö omasi ira na ha tobali ono sawuyu manö ia. Tatu manö abu dödöra na lö iʼila tedou waʼebua nonora andrö. Simanö göi, omuso dödö Yehowa me ibörögö tobali ita soloʼö khö Yesu, hizaʼi lö omasi ia na lö tedou ita ba wamati. (1 Ko. 3:1) Itötöna enaʼö ’tobali ita niha Keriso satua ba wamati’.—1 Ko. 14:20.

2. Hadia nitutunöda ba artikel andre?

² Hewisa lala wangera-ngera hegöi amuata niha saro ba wamati? Hadia zinangea tafalua enaʼö tobali ita niha Keriso saro ba wamati? Hana wa aro wahuwusada khö Yehowa na taʼabakhaiʼö waʼaboto ba dödöda ba Zura Niʼamoniʼö? Hana wa tebai taʼabeʼesi tödö ita samösa? Ba artikel andre, tatutunö dania wanema li moroi ba wanofu-nofu andrö.

HEWISA LALA WANGERA-NGERA HEGÖI AMUATA NIHA SARO BA WAMATI?

3. Hadia geluahania tobali niha Keriso saro ba wamati?

³ Ba Zura Niʼamoniʼö ba li Yunani, ngawua wehede ”saro famati” tola göi mufoʼeluaha ia ”satua”. a (1 Ko. 2:6) Simane ono sawuyu si tedou faʼebua, moguna göi taforege enaʼö tola tedou ba aro wahuwusada khö Yehowa. Daʼa lala enaʼö tobali ita niha Keriso saro ba wamati. Hewaʼae na no aro ita ba wamati,  moguna böi taböhöli ba wondrouʼö famatida. (1 Ti. 4:15) Fefu ita, farahu ba daʼö ndra si bohou ebua, tola tobali niha Keriso saro ba wamati. Hizaʼi, hadia nifaluada enaʼö taʼila wa no tobali ita niha Keriso saro ba wamati?

4. Hadia dandrania wa no aro ba wamati zi samösa niha?

⁴ Niha Keriso saro ba wamati, ifaudugö waʼaurinia moloʼö somasi Lowalangi, ba lö ifili-fili hezo zomasi ia ifalua mazui si lö omasi ia. Tatu manö, börö me lö moʼahonoa ia, hasambalö ifalua zala. Hizaʼi, ero maʼökhö iforege ba wamaudugö lala wangera-ngera hegöi nifaluania ba gohitö dödö Lowalangi. Ibohouni gamuatania ba iforege wangokhögö lala wangera-ngera Yehowa. (Ef. 4:​22-24) Ifahaʼö ia ba goroisa hegöi goi-goi Yehowa enaʼö atua-tua ia ba wangai angetula. Andrö wa lö moguna muzara-zara khönia hadia zi tola mazui si tebai ifalua. Na so gangetula si no ihalö, iforege ba wamalua daʼö.—1 Ko. 9:​26, 27.

5. Hadia zalua ba niha Keriso si lö aro ba wamati? (Efeso 4:​14, 15)

⁵ Niha Keriso si lö aro ba wamati, aoha sibai telimo ba ”waʼonekhe zamaelungu”. Tola manö ifaduhusi tödö niha samaʼema khönia turia si lö atulö, huhuo si lö boto, hegöi ngawalö duria si fasala si so ba media. Mazui tola manö telimo ia ba niha sondröi sindruhu. b (Baso Efeso 4:​14, 15.) Tola göi afökhö dödönia ba niha böʼö, iʼalui lala enaʼö faʼudu ia ba niha böʼö, alio tetutu dödönia, ba asese tedönisi dödönia ba wamalua sala.—1 Ko. 3:3.

6. Hana wa muʼamaedolagö waʼatedou ba wamati hulö waʼatedou nono sawuyu? (Faigi göi gambara.)

⁶ Simane si no mututunö moroi yawa, muʼamaedolagö waʼatedou ba wamati simane faʼatedou nono sawuyu itugu ebua itugu alawa ndröfinia. Börö me oya nasa zi lö aboto ba dödö ndraono side-ide, andrö wa moguna khöra wolumöʼö hegöi fanuturu lala moroi ba niha si no alawa döfi. Duma-dumania, iʼandrö khö nononia alawe si samösa ina enaʼö fagogohe tanga ira ba wangötö lala. Ba me no ebua-bua nononia, tola manö ilulu ia inania ba wangötö lala samösa. Hewaʼae simanö, lö tebulö ifasugi ba dödö nononia enaʼö ifaigi gabera ba kambölönia fatua lö iʼötö lala. Na itugu tedou ndröfi zi samösa iraono, aboto ba dödönia wa moguna mangelama ia faböi  teʼala. Simane iraono sinangea mutolo enaʼö laʼaröuʼö ira moroi ba deʼala, simanö göi niha Keriso si lö aro ba wamati. Moguna khöra wanolo moroi ba niha Keriso saro ba wamati enaʼö tola laʼaröuʼö ira moroi ba ngawalö zi möi famakiko fahuwusara khö Yehowa, ba enaʼö atua-tua ira ba wangai angetula. Hizaʼi, na edöna ihalö gangetula si samösa niha Keriso saro ba wamati, ihaogö iʼangeragö hadia niwaʼö Zura Niʼamoniʼö enaʼö aboto ba dödönia lala wangera-ngera Yehowa. Aefa daʼö, ifalua hadia zi no ifahaʼö yaʼia.

7. Niha Keriso saro ba wamati, hadia moguna khöra wanolo moroi ba niha böʼö?

⁷ Hadia daʼö geluahania wa niha Keriso saro ba wamati, lö moguna khöra wanolo moroi ba niha böʼö? Tenga simane daʼö. Itaria, moguna göi laʼandrö wanolo moroi ba niha böʼö. Hizaʼi, niha si no amaedola ndraono side-ide ba wamati, te abölö omasi ira na niha böʼö zotatugöi hadia zinangea lafalua mazui sangai angetula ba waʼaurira. Hizaʼi niha Keriso saro ba wamati, hewaʼae na iʼandrö wanolo moroi ba niha satua-tua moroi khönia, aboto ba dödönia wa yaʼia samösa zangonorogö tödö angetula nihalönia.—Gal. 6:5.

8. Hezo oroma wa lö fagölö-gölö waʼatedou wamati zi samösa niha Keriso?

⁸ Hewaʼae no fagölö-gölö waʼalawa ndröfi niha, hizaʼi tola manö faböʼö waʼebua mboto. Simanö göi niha Keriso saro ba wamati, lö fagölö-gölö wangoromaʼöra bua-bua ba wamati simane faʼatua-tua, faʼabarani, faʼoböwö, hegöi faʼahakhö dödö. Duma-dumania, na alua gabula dödö si fagölö khö zi darua niha Keriso saro ba wamati ba no faoma laʼogunaʼö goi-goi Zura Niʼamoniʼö ba wangasiwai daʼö, hizaʼi tola manö faböʼö gangetula nihalöra. Tola manö asese alua daʼa börö me lahalö gangetula moloʼö tödöra side-ide. Börö daʼö, lö faoma lahuku nawöra börö me faböʼö gangetula nihalöra zamösana. Abölö sökhi na larorogö wahasara dödö.—Rom. 14:10; 1 Ko. 1:10.

HADIA ZINANGEA TAFALUA ENAʼÖ TOBALI ITA NIHA KERISO SARO BA WAMATI?

9. Hadia tedou samösa wamatida? Tutunö.

⁹ Tola tedou waʼebua-ebua ndraono sawuyu na itugu tedou ndröfira. Hizaʼi, lö tedou samösa wamatida na lö famorege moroi khöda. Duma-dumania, ira talifusö si so ba Gorindro latema duria somuso dödö, lafabayagöʼö ira idanö, latema geheha niʼamoniʼö, ba latema wanuturu lala moroi khö zinenge sotöi Faulo. (Hal. 18:​8-11) Hizaʼi, mato hauga fakhe me no aefa tebayagö ira idanö, so ba gotaluara zi lö tedou ba wamati. (1 Ko. 3:2) Hewisa enaʼö lö alua khöda zimane daʼö?

10. Hadia nifaluada enaʼö aro ita ba wamati? (Yuda 20)

¹⁰ Enaʼö tola aro ita ba wamati, si oföna moguna so khöda waʼedöna tobali niha saro ba wamati. Dozi niha ’sangomasiʼö’ lala waʼaurinia iadaʼa ba lö ifalua wombulöʼö ba wamati, tola manö lö tobali ia niha saro ba wamati. (Amd. 1:22) Tatu manö lö omasi ita simane niha si no ebua-bua si lö mangonorogö tödö noro dödö nibeʼe khönia ba idöna-döna wa satuania zangai angetula khönia. Hizaʼi, omasi ita na yaʼita samösa zangonorogö tödö waʼatedouda ba wamati. (Baso Yuda 20.) Na öforege enaʼö tedou ndraʼugö ba wamati, angandrö khö Yehowa ’sameʼe khöu faʼedöna ba faʼabölö ba wamalua somasi ia’.—Fil. 2:13.

11. Hadia wanolo nihenaigö Yehowa enaʼö tola tobali ita niha saro ba wamati? (Efeso 4:​11-13)

¹¹ Lö ilulu samösa ita Yehowa enaʼö tedou ita ba wamati. Yaʼira si no tobali kubalo hegöi samahaʼö ba mbanua niha Keriso, latolo ita enaʼö aro wahuwusada khö Yehowa irege ”ba gafuriatania, moʼahonoa ita simane Keriso”. (Baso Efeso 4:​11-13.) No ihenaigö Yehowa  geheha niʼamoniʼö sanolo yaʼita enaʼö ”taʼokhögö wangera-ngera Keriso”.(1 Ko. 2:​14-16) Baero daʼö, no ihenaigö khöda öfa ngawua Injil sanutunö khöda lala wangera-ngera Yesu, fehedenia, hegöi nifaluania sagötö mangai halöwö ia ba gulidanö. Na taʼoʼö lala wangera-ngera Yesu hegöi nifaluania, tola tobali ita niha Keriso saro ba wamati.

BUA NITEMADA MOROI BA GÖ BA WAMATI SABEʼE

12. Hadia ”wamahaʼö si oföna sanandrösa khö Keriso”?

¹² Enaʼö tobali ita niha saro ba wamati, moguna ”tafahaʼö ita ba wamahaʼö si oföna sanandrösa khö Keriso”, yaʼia daʼö dane-dane wamahaʼö si so ba Zura Niʼamoniʼö. Duma-dumania yaʼia daʼö sanandrösa ba wamalalini era-era, famati, famayagö idanö, hegöi fanusugi. (Heb. 6:​1, 2) Fefu daʼö no dane-dane wamahaʼö si so ba Zura Niʼamoniʼö nifaduhusi tödö niha Keriso. Daʼö göi nitutunö Wetero me manuriaigö ia ba niha sato ba ginötö Wendrakose. (Hal. 2:​32-35, 38) Na omasi ita tobali nifahaʼö Keriso, moguna tatemaʼö dane-dane wamahaʼö si so ba Zura Niʼamoniʼö andrö. Ibeʼe wamangelama Faulo wa niha sanimbagö famahaʼö sanandrösa ba wanusugi, tebai mufotöi ia niha Keriso sindruhu. (1 Ko. 15:​12-14) Hizaʼi, lö tobönö na ha dane-dane wamahaʼö zaboto ba dödöda.

13. Hadia nifaluada enaʼö tatema mbua moroi ba gö sabeʼe nisura ba Heberaiʼo 5:14? (Faigi göi gambara.)

¹³ Tenga simane dane-dane wamahaʼö si so ba Zura Niʼamoniʼö, ö sabeʼe moʼamakhaita ia ba goi-goi tenga ha oroisa Yehowa si tola möi fanoloda enaʼö tola taʼila lala wangera-ngerania. Enaʼö tola tatema mbua moroi ba gö sabeʼe andre, moguna tafahaʼö ita, taʼangerönusi, ba taforege wamalua si no tafahaʼö yaʼita. Na tafalua daʼö, no tafahaʼö ita samösa ba wangai angetula sangomusoiʼö tödö Yehowa. c—Baso Heberaiʼo 5:14.

14. Hewisa Waulo wanolonia niha Korindro enaʼö tedou ira ba wamati?

¹⁴ Niha Keriso si lö aro ba wamati, abua khönia ba wangai angetula na lö hadöi oroisa si no tesura ba Zura Niʼamoniʼö. So zangumaʼö wa tola lafalua gofu hadia manö na lö hadöi  musura daʼö ba Zura Niʼamoniʼö. Niha tanö böʼö, omasi ia na muzara-zara khönia hadia zinangea ifalua. Duma-dumania, niha Keriso ba Gorindro lasofu khö Waulo hadia tola laʼa wöfö gö nibeʼe sumange ba nadu. Moroi na izara-zara wamatunö khöra hadia zinangea lafalua, ifatunö khöra Faulo wa tola mohalöwö dödöra side-ide ba no tetehegö ba niha ero zamösana ba ’wamalua hadia ia ba zomasi dödöra’. Ifatunö khöra goi-goi Zura Niʼamoniʼö si tola manolo yaʼira ba wangai angetula enaʼö lö itegu-tegu ira tödöra side-ide mazui tobali fangala ba niha böʼö. (1 Ko. 8:​4, 7-9) Ifahaʼö niha Gorindro Faulo ba wangogunaʼö ayati Zura Niʼamoniʼö ba wangai angetula, moroi na laʼodaligö niha böʼö ba wamatunö khöra hadia zinangea lafalua. Daʼa lalania ba wanolo yaʼira enaʼö tedou ira ba wamati.

15. Hewisa wanolo Waulo niha Keriso ba Heberaiʼo enaʼö tedou ira ba wamati?

¹⁵ So wamahaʼö sebua böli si tola tahalö moroi ba zura Waulo khö ndra niha Keriso ba Heberaiʼo. So ösa zi lö mangoromaʼö faʼatedou ba wamati, amaedola ’moguna khöra zui susu, tenga ö sabeʼe’. (Heb. 5:12) Lö lafahaʼö ira ba lö latemaʼö ngawalö zi bohou nifahaʼö Yehowa ba mbanua niha Keriso. (Amd. 4:18) Duma-dumania, ato niha Keriso Yahudi si lö faröi ba Goroisa Moze hewaʼae no 30 fakhe muheta Goroisa andrö börö höli nibeʼe Yesu. (Rom. 10:4; Tit. 1:10) Sindruhunia, no ibönö ginötö si 30 fakhe ba niha Keriso enaʼö aboto ba dödöra wa lö moguna khöra Goroisa Moze! Dozi niha sombaso ösi zura andrö tola lahalö rahu-rahu wa ösinia no ö ba wamati sabeʼe. Möi fanolora zurania andrö enaʼö laʼila wa abölö sökhi lala wamosumange Yehowa si bohou si teʼodane-dane ba höli nibeʼe Yesu. Daʼö göi zameʼe khöra faʼabarani hewaʼae so wolohi moroi ba niha Yahudi.—Heb. 10:​19-23.

BÖI ABEʼESI TÖDÖ NDRAʼUGÖ SAMÖSA

16. Hadia nasa zinangea tafalua enaʼö tedou ita ba wamati?

¹⁶ Moguna taforege tenga ha enaʼö tedou ita ba wamati, hizaʼi enaʼö lö tebulö aro ita ba wamati. Moguna mangelama ita enaʼö böi so ba wangera-ngerada wa no niha saro ba wamati ita ba lö moguna tadouʼö wahuwusada khö Yehowa. (1 Ko. 10:12) Datatatugöi enaʼö ’böi taböhöli wanekhegö’ faʼatedouda ba wamati.—2 Ko. 13:5.

17. Ba zura nifaʼoheʼö Waulo ba niha Kolose, hezo oroma wa moguna lö tebulö aro ita ba wamati?

 ¹⁷ Ba zurania ba niha Kolose, ifuli zui iwaʼö Faulo wa moguna lö tebulö aro ita ba wamati. Hewaʼae na no tobali ira niha saro ba wamati, ifangelama ira Faulo enaʼö böi telimo ira ba lala wangera-ngera niha gulidanö. (Kol. 2:​6-10) Itutunö göi ba zurania wa Efafera si no mangila hewisa ndra talifusöda ba mbanua niha Keriso andrö, lö tebulö ilau mangandrö enaʼö ’tobali ira niha soʼahonoa ba wamati’. (Kol. 4:12) Hadia wamahaʼönia? Aboto ba dödö Waulo hegöi Efafera wa enaʼö tobali ita niha Keriso saro ba wamati, moguna wamorege ba fanolo moroi khö Lowalangi. Omasi ira na niha Golose lö tebulö tobali niha Keriso saro ba wamati, hewaʼae oya wanaisi nitaögöra.

18. Hadia zi tola manö alua ba niha Keriso saro ba wamati? (Faigi göi gambara.)

¹⁸ Ifangelama niha Heberaiʼo Faulo wa tola manö taya wahuwusa zi samösa niha si no aro ba wamati khö Yehowa, na lö larorogö daʼö. Na lö khönia foloʼö, itugu ara itugu aröu ia khö Yehowa irege lö hadöi faʼaterou dödö khönia ba wombulöʼö lala waʼaurinia ba lö itema wangefa moroi khö Lowalangi. Hizaʼi, tenga simane daʼö niha Heberaiʼo. (Heb. 6:​4-9) Hewisa niha si no mondröi halöwö ba wamati mazui niha si no muʼefasi ba mbanua Keriso, hizaʼi ba gafuriata lafalalini gera-erara? Na so khöra wangide-ngideʼö ba lafalalini gera-erara, no laforomaʼö wa faböʼö ira moroi ba niha nitutunö Waulo ba zurania. Tatu manö, na omasi ira mangawuli khö Yehowa, moguna khöra wanolo si no ihenaigö. (Hez. 34:​15, 16) Tola manö latatugöi ira satua sokubaloi enaʼö so ndra talifusö si tola manolo yaʼira ba wangaʼazökhi mangawuli fahuwusara khö Yehowa.

19. Hadia gohitö dödöda?

¹⁹ Na öforege enaʼö tobali ndraʼugö niha Keriso saro ba wamati, hasambalö tola ökhamö daʼö! Böi tebulö öʼabakhaiʼö waʼaboto ba dödömö sanandrösa ba zindruhu ba forege enaʼö tola öʼokhögö lala wangera-ngera Yehowa. Na no aro wamatimö, odödögö nasa enaʼö tobali ndraʼugö niha Keriso saro ba wamati.