1. Hewisa Yehowa ba woʼorganisasi ono mbanuania me abad siföföna?

 ME SO noro dödö nibeʼe Yehowa ba nono mbanuania, itötöna enaʼö toföfö wamaluara daʼö. (1 Ko. 14:33) Duma-dumania, itötöna khöra enaʼö laturiaigö duria somuso dödö ba zi sagörö ulidanö misa. (Mat. 24:14) No ibeʼe noro dödö ba wondröniaʼö halöwö andrö khö Yesu. Ba itatugöi Yesu enaʼö toföfö wamalua halöwö andre. Me abad siföföna, lafasindro mbanua niha Keriso misa ba lafataro ndra satua sokubaloi tobali sondröniaʼö hegöi ba wameʼe fanuturu lala. (Hal. 14:23) So ndra boto solohe ba Yeruzalema, farahu ba daʼö ndra sinenge hegöi ira satua sokubaloi si no ara mangai halöwö, lafazökhi gangetula sinangea laʼoʼö ira niha Keriso me luo daʼö. Hizaʼi, börö me oya mbanua niha Keriso ba nahia si faböʼö-böʼö, ira satua sokubaloi ero sambua banua niha Keriso zamaʼema angetula andrö khö ndra talifusö. (Hal. 15:2; 16:4) Börö me laʼoʼö gangetula daʼö, buania ”itugu aro wamati mbanua niha Keriso ba monönö waʼatora”.—Hal. 16:5.

2. Iʼotarai me döfi 1919, hewisa Yehowa ba wohenaigö fanuturu lala hegöi ö ba wamati?

² Lö tebulö iʼorganisasi nono mbanuania Yehowa irugi iadaʼa. Iʼotarai me döfi 1919, barö wanuturu lala moroi khö Yehowa iʼogunaʼö ngawawa nibayoini si lö atoto Yesu ba woʼorganisasi halöwö fanuriaigö hegöi ba wohenaigö ö ba wamati khö ndra nifahaʼönia. a (Luk. 12:42) Sindruhu-ndruhu wa ifahowuʼö sibai Yehowa halöwö nifalua ngawawa andrö.—Yes. 60:22; 65:​13, 14.

3-4. (a) Beʼe duma-duma sangoromaʼö wa so mbua nitemada börö me no laʼorganisasi ita. (b) Hadia nitutunöda ba artikel andre?

 ³ Na lö laʼorganisasi ita, tebai tafalua halöwö nibeʼe Yesu khöda. (Mat. 28:​19, 20) Duma-dumania, na lö nitatugöi hezo mbanua mazui nahia wanuriaigö moloʼö banua niha Keriso si farahu yaʼita, lö toföfö wamaluada fanuriaigö. Te asese manuriaigö ita ba nahia mazui ba mbanua si fagölö, hizaʼi lö irai möi ita manuriaigö ba mbanua böʼö. Moloʼö yaʼugö, hadia so nasa mbua tanö böʼö nitemada börö me no laʼorganisasi ita?

⁴ Me so Yesu ba gulidanö, iʼorganisasi ndra nifahaʼönia ba lö tebulö ifalua göi daʼö ba nono mbanua Lowalangi irugi iadaʼa. Ba artikel andre, tatutunö dania hadia duma-duma nibeʼe Yesu ba hewisa organisasida woloʼö duma-duma andrö. Tatutunö göi dania hewisa wangandröda saohagölö ba organisasi Yehowa.

DUMA-DUMA YESU NIʼOʼÖ ORGANISASIDA

5. Hadia dandra wa duma-duma Yesu niʼoʼö organisasi Yehowa? (Yohane 8:28)

⁵ Ifahaʼö ia Yesu khö Namania si so ba zorugo sanandrösa ba nifalua hegöi ba wehede. Duma-duma Yesu niʼoʼö organisasi Yehowa ba wangogunaʼö Taromali Lowalangi ba wanolo yaʼita enaʼö taʼila zindruhu, si fasala, hegöi ba wameʼe fanuturu lala ba waʼaurida. (Baso Yohane 8:28; 2 Ti. 3:​16, 17) Asese tatema wamasugi ba dödö enaʼö tabaso ba tafalua Daromali Lowalangi. Hewisa enaʼö tola tatema mbua moroi ba mene-mene andrö?

6. Hadia lala si tohude nifaluada enaʼö tatema mbua moroi ba wamahaʼö Zura Niʼamoniʼö?

⁶ Oya mbua nitemada na taʼogunaʼö publikasida ba ginötö tafalua wamahaʼö ba Zura Niʼamoniʼö. Duma-dumania, ba ginötö tatema wanuturu lala moroi ba organisasi, tola tafaehusi daʼö ba niwaʼö Zura Niʼamoniʼö. Na taʼila wa teʼodane-dane wanuturu lala andrö ba Zura Niʼamoniʼö, itugu aro waʼafaduhu dödöda ba organisasi Yehowa.—Rom. 12:2.

7. Hadia duria nituriaigö Yesu, ba hewisa organisasi Yehowa ba wolo duma-dumania andrö?

⁷ Ituriaigö Yesu ”duria somuso dödö sanandrösa ba Wamatörö Lowalangi”. (Luk. 4:​43, 44) Ibeʼe göi fareta khö ndra nifahaʼönia ba wanuriaigö Famatörö Lowalangi. (Luk. 9:​1, 2; 10:​8, 9) Ba ginötö andre, fefu ita falulu fohalöwö ba organisasi Yehowa ba wanuriaigö Famatörö Lowalangi gofu hezo toröi ita mazui hadia noro dödö nitemada ba organisasi.

8. Hadia döi si sökhi niʼokhögöda iadaʼa?

⁸ No töi si sökhi khöda na tafatunö ba niha sanandrösa ba Wamatörö Lowalangi! Lö dozi niha laʼokhögö döi si sökhi andre. Duma-dumania, me so Yesu ba gulidanö, lö itehegö khö ndra malaʼika si lö sökhi ba wamaduhuʼö sanandrösa khönia. (Luk. 4:41) Ba ginötö andre, na so niha somasi fao manuriaigö khö ndra Samaduhuʼö Yehowa, moguna ifaudugö waʼaurinia ba zomasi Lowalangi. Tola taforomaʼö wa taʼandrö sibai saohagölö me no tatema halöwö andrö yaʼia na manuriaigö ita gofu hezo mazui gofu hawaʼara ginötö. Simane Yesu, ohitö dödöda yaʼia daʼö ba wananö hegöi ba wombuwui tanömö zindruhu ba dödö niha sanandrösa ba Wamatörö Lowalangi.—Mat. 13:​3, 23; 1 Ko. 3:6.

9. Hewisa organisasida ba wangombakha töi Lowalangi?

⁹ Iʼombakhaʼö Yesu döi Lowalangi. Me mangandrö Yesu khö Namania ba zorugo imane wangumaʼö, ”No uʼombakhaʼö khöra döimö.” (Yoh. 17:26) Börö me omasi ira woloʼö duma-duma Yesu, laforege organisasi Yehowa ba wanolo niha böʼö enaʼö laʼila döi Lowalangi. Sambua lala nifalua organisasi yaʼia daʼö lafazökhi Mbuku Niʼamoniʼö Famoʼeluaha Gulidanö si Bohou. Me no mufoʼeluaha Zura Niʼamoniʼö  andre, tefangawuli döi Lowalangi simane ba wamobörö. No tehenaigö Zura Niʼamoniʼö ba zi töra 270 ngawalö li, so zi no ahori mufoʼeluaha ba so göi zi matonga. Ba Lampiran A4 hegöi A5 ba mbuku andrö, taʼila dania hadia mbörö ba hewisa wa tefangawuli döi Lowalangi ba Zura Niʼamoniʼö. Na tafaigi Lampiran C ba Alkitab Edisi Pelajaran ba li Indonesia, itutunö khöda wa so 237 kali tesura döi Lowalangi ba Mbuku Niʼamoniʼö Yunani Niha Keriso.

10. Hadia wamahaʼö nihalöda ba wehede zi samösa ira alawe moroi ba Myanmar?

¹⁰ Simane Yesu, omasi ita na ato niha nitoloda enaʼö laʼila döi Lowalangi. So samösa ndra alawe si 67 fakhe moroi ba Myanmar, ifahaʼö ia wa so döi Lowalangi. Ibörögö ilau meʼe ba imane khö zamahaʼö yaʼia ba Zura Niʼamoniʼö, ”Awena sibai urongo ba waʼaurigu wa töi Lowalangi yaʼia daʼö Yehowa. . . . No öfatunö khögu waʼaboto ba dödö si tohude andre.” Moroi ba waö-waö si no irai alua andre, taʼila wa tola tebulö waʼauri zi samösa niha börö me lafahaʼö ira ba döi Lowalangi.

BÖI TEBULÖ FOROMAʼÖ WA ÖFADUHUSI TÖDÖ ORGANISASIDA

11. Hewisa ndra satua sokubaloi ba wangoromaʼö wa lafaduhusi tödö organisasi Yehowa? (Faigi göi gambara.)

¹¹ Hadia nifalua ndra satua sokubaloi ba wangoromaʼö wa lafaduhusi tödö organisasi Lowalangi? Na so wanuturu lala nibeʼe organisasi khö ndra satua sokubaloi, moguna lahaogö wombaso fanuturu lala andrö ba laforege enaʼö tola lafalua ia. Duma-dumania, latema wanuturu lala tenga ha sanandrösa ba wamaehagö faosatö ba gangowuloa mazui ba wamaʼema fangandrö ba mbanua niha Keriso, hizaʼi latema göi wanuturu lala soʼamakhaita ba woʼameʼegö tödö mbiri-biri Keriso. Na lafalua wanuturu lala andrö ira satua sokubaloi, tola larasoi ira talifusö ba mbanua niha Keriso wa iʼomasiʼö ba iʼameʼegö tödö ira Yehowa.

12. (a) Hana wa no sinangea falulu fohalöwö ita khö ndra sondröniaʼö yaʼita? (Heberaiʼo 13:​7, 17) (b) Hana wa no sinangea taʼokhögö lala wangera-ngera si sökhi sanandrösa khö ndra sondröniaʼö yaʼita?

¹² Na tatema wanuturu lala moroi khö ndra satua sokubaloi, moguna so khöda waʼaoha gölö ba woloʼö daʼö. Na tafalua ia, no tatolo ira ba wamalua noro dödöra. Ifarou ita Sura Niʼamoniʼö enaʼö taʼoʼö ba tafondrondrongo li zondröniaʼö yaʼita. (Baso Heberaiʼo 13:​7, 17.) Itaria abua khöda ba wamalua daʼö. Hadia mbörö? Börö me lö moʼahonoa ira. Hizaʼi, na taʼosambua dödöda ba waʼalömoʼahonoara moroi ba gamuata si sökhi niʼokhögöra, eluahania no tatolo nududa. Hana wa tawaʼö zimanö? Omasi nududa na taʼaombösi tödö organisasi si tobali lala niʼogunaʼö Lowalangi ba wameʼe fanuturu lala khöda. Na taʼokhögö wangera-ngera sambö baga khö ndra satua sokubaloi, tola göi simane daʼö wangera-ngerada sanandrösa ba organisasi irege lö tafaduhusi tödö organisasi. Hadia zinangea tafalua enaʼö taʼila ba tatimbagö walimosa nifalua nududa?

BÖI TEHEGÖ GOFU HADIA IA MÖI FANGAWUWU WAʼAFADUHU DÖDÖMÖ

13. Hadia nifalua nudu ba wangobousi organisasi Yehowa?

¹³ Laforege udu ba wangobousi fefu zi sökhi si no ifalua organisasi Yehowa. Duma-dumania, no tafahaʼö ita moroi ba Zura Niʼamoniʼö wa lö omasi Yehowa na raʼiö mbotoda, amuatada, hegöi famatida. Iwaʼö Yehowa wa moguna muʼefasi ba mbanua niha Keriso niha si lö mamalalini era-erania ba wamalua si lö sökhi. (1 Ko. 5:​11-13; 6:​9, 10) Tatu omasi ita na taʼoʼö niwaʼö Zura Niʼamoniʼö andrö. Hizaʼi, börö me taʼoʼö gamakhoita daʼö, andrö wa lamane ududa wa lö khöda faʼomasi, no tahuku niha, ba talafo fatandro.

14. Haʼökhö moroi walimosa niböbögö ba organisasida?

 ¹⁴ Haniha sindruhunia zomasi mangobousi organisasida? Afökha Satana zamöbögö si lö duhu sanandrösa ba organisasida. Yaʼia andrö ”ama zofaya”. (Yoh. 8:44; 1Mo. 3:​1-5) Daʼö mbörö wa lö tokea ita na iʼogunaʼö nududa ba wamazaewe turia si lö atulö sanandrösa ba organisasi Yehowa. No irai alua daʼa khö Yesu hegöi khö ndra niha Keriso me abad siföföna.

15. Ira sondröniaʼö ba agama, hadia nifaluara khö Yesu hegöi khö ndra nifahaʼönia?

¹⁵ Hewaʼae moʼahonoa Nono Lowalangi ba oya dandra sahöli-höli dödö nifaluania, hizaʼi so ösa niha niʼogunaʼö Zatana ba wamazaewe falimosa sanandrösa khö Yesu. Duma-dumania, lawaʼö ira sondröniaʼö ba agama wa faʼabölö Yesu ba wamofanö malaʼika si lö sökhi, no börö wanolo moroi ”khö zalawa malaʼika si lö sökhi”. (Mrk. 3:22) Me laʼetuʼö hukuma Yesu, lawaʼö ira sondröniaʼö ba agama wa no iʼoʼaya agama ba lafaweʼe niha sato enaʼö labunu Yesu. (Mat. 27:20) Lö ara aefa daʼö, me laturiaigö duria somuso dödö ira nifahaʼö Keriso, tohare nudu ba ”lafaweʼe niha sato moroi ba soi böʼö” ba wamakao niha Keriso. (Hal. 14:​2, 19) Imane majalah Menara Pengawal 1 Desember 1998 sanandrösa ba nisura Halöwö Zinenge 14:​2, ”Niha si faʼawö khö Zatana latimbagö duria somuso dödö nituriaigö niha Keriso. Ba lawaʼö göi wehede si lö sökhi sanandrösa ba niha Keriso enaʼö lö adöni dödö niha ba wamondrondrongo turia nifaʼemara ba fatuwu khöra niha.”

16. Na so duria si fasala nirongoda, hadia zi tebai olifu ita?

¹⁶ Lö ibato falimo Satana irugi iadaʼa. Lö tebulö tobali ia ”samaelungu niha ba gulidanö maʼasagörö”. (Fam. 12:9) Na so duria si fasala nirongomö sanandrösa ba organisasida mazui sanandrösa khö ndra talifusö nifataro  tobali sondröniaʼö, böi olifu ndraʼugö hadia nifalua nudu Lowalangi khö Yesu hegöi khö ndra nifahaʼönia me abad siföföna. Ba ginötöda andre, lafakao ba laʼobousi nono mbanua Yehowa simane nifaʼeleʼö Zura Niʼamoniʼö. (Mat. 5:​11, 12) Tola lö ifaelungu ita turia si fasala na no taʼila haʼökhö moroi walimosa andrö ba na iʼanemaiʼö so nifaluada ba wolumöʼö yaʼita. Hadia zinangea tafalua?

17. Hewisa wanimbagöda lua-lua niʼasogö duria si fasala? (2 Timoteo 1:13) (Faigi göi kotak ” Hadia Nifaluada Na Tarongo Duria si Fasala”.)

¹⁷ Timbagö duria si fasala. So wanuturu lala nibeʼe Waulo sanandrösa ba nifaluada na tarongo duria si fasala. Iʼandrö khö Dimoteo enaʼö ’ifangelama niha . . . samondrondrongo huhuo falimosa’ ba enaʼö ’latimbagö huhuo faya’. (1 Ti. 1:​3, 4; 4:7) Samösa ndraono side-ide, te so nituyunia tou ba zalo aefa daʼö ibeʼe ba mbawania. Hizaʼi, lö ifalua daʼö niha si no biha fangera-ngera börö me aboto ba dödönia wa tola göna ia fökhö na ifalua daʼö. Tatimbagö fefu duria si fasala börö me taʼila haʼökhö moroi walimosa andrö. Hizaʼi, ha ’famahaʼö sindruhu’ zomasi ita tafondrondrongo.—Baso 2 Timoteo 1:13.

18. Hewisa wangoromaʼöda wa tafaduhusi tödö organisasi Yehowa?

¹⁸ No tafaigi tölu lala nifalua organisasi Lowalangi ba woloʼö Yesu. Na itugu öfahaʼö ndraʼugö ba Zura Niʼamoniʼö, tola öʼila lala tanö böʼö nifalua organisasi ba woloʼö Yesu. Tolo niha böʼö ba mbanua niha Keriso si farahu yaʼugö enaʼö itugu faduhu dödöra ba organisasi Lowalangi. Foromaʼö wa öfaduhusi tödö organisasi Lowalangi yaʼia daʼö lö faröi ndraʼugö ba wamosumange Yehowa ba lö tebulö ahatö ndraʼugö ba organisasi niʼogunaʼö Yehowa ba wamalua ohitö dödönia. (Si. 37:28) Yalötebulö taʼandrö saohagölö börö me no taʼokhögö döi si sökhi, tola farahu ita ba gotalua niha si lö faröi ba sangomasiʼö Yehowa.