1. Hadia waradaiso ba wamati andrö, ba hadia gangetula nihalöda?

 SO WARADAISO ba gulidanö andre safönu niha samalua amuata si sökhi. Zuta niha si toröi ba daʼö, laʼokhögö waʼohahau dödö sindruhu. Dozi niha si farahu ba waradaiso andrö, no lahalö gangetula wa lö irai laröi daʼö. Ba ato sibai niha nikaonira enaʼö tola farahu ira ba waradaiso. Hadia waradaiso andrö? Yaʼia daʼö faradaiso ba wamati! a

2. Hadia zahöli-höli dödöda sanandrösa ba waradaiso ba wamati?

² Si fao faʼahöli-höli dödö, ifazökhi sambua nahia safönu faʼahono dödö Yehowa ba gotalua gulidanö Zatana safönu fatiusa, faʼalösökhi, hegöi famaʼala. (1 Yo. 5:19; Fam. 12:12) Aboto ba dödö Lowalangi safönu faʼomasi wa tefakao waʼauri niha börö gulidanö Zatana andre. Hizaʼi, iʼalui lala enaʼö lasöndra waʼahono dödö ono mbanuania ba wamosumange yaʼia. Ba Daromali Lowalangi, muʼamaedolagö waradaiso ba wamati andrö simane nahia ”folumöʼö” ba hulö ”kabu si no muhaogö muhawui faoma idanö”. (Yes. 4:6; 58:11) Börö howu-howu Yehowa, dozi niha si toröi ba waradaiso ba wamati, tola lasöndra waʼomuso dödö hegöi faʼahono dödö sagötö ngaluo safuria sabua fanaögö.—Yes. 54:14; 2 Ti. 3:1.

3. Hewisa wamaʼeleʼö nisura ba Yesaya 65 alua ia ba Gizaraʼeli me föna?

³ Iʼogunaʼö Yesaya Yehowa ba wanutunö hewisa waʼauri niha si toröi ba waradaiso ba wamati. Tola öʼila daʼö ba Yesaya 65, ba no irai alua ia me döfi 537 SM. Me luo daʼö, teʼefaʼö niha Yahudi si no mamalalini era-era moroi ba wangosawuyu niha Mbabilona ba mangawuli ira ba mbanuara. Ifahowuʼö nono mbanuania Yehowa ba itolo ira ba wangehaogö mangawuli  mbanua Yeruzalema, ba ifuli lahaogö gosali si tobali nahia wamosumange satulö ba Gizaraʼeli.—Yes. 51:11; Zak. 8:3.

4. Hewisa waʼalua ba götöda andre nisura ba Yesaya 65?

⁴ Famaʼeleʼö nisura Yesaya, alua ia ba zi mendrua kali me döfi 1919 M, yaʼia daʼö me teʼefaʼö nono mbanua Yehowa moroi ba wangosawuyu Mbabilona Sebua. Lö ara aefa daʼö, itugu ebolo waradaiso ba wamati ba zi sagörö ulidanö. Niha sowölö-ölö ba wanuriaigö Famatörö Lowalangi, oya mbanua niha Keriso nifasindrora ba itugu oya mbanua si no ikhamö turia somuso dödö. Ira matua hegöi ira alawe sangomasiʼö amuata si lö sökhi hegöi amuata fohorö ba zilalö, ’labohouni gamuatara moloʼö ohitö dödö Lowalangi’. (Ef. 4:24) Tatu manö, awena alua fefu howu-howu nifaʼeleʼö Yesaya andrö ba gulidanö si bohou dania. Hewaʼae simanö, oya göi howu-howu nitemada iadaʼa. Datatutunö hadia mbua si sökhi nitemada na farahu ita ba waradaiso ba wamati, ba hadia mbörö wa lö faröi ita ba daʼö.

NIRASOI NIHA SI SO BA WARADAISO BA WAMATI

5. Simane si no mufabuʼu ba Yesaya 65:​13, hadia mbua nitemada ba waradaiso ba wamati?

⁵ Fahöna gö hegöi fangokafu dödö. Ba wamaʼeleʼö Yesaya, so gamaehuta waʼauri niha si so ba waradaiso ba wamati hegöi faʼauri niha si lö farahu ba daʼö. (Baso Yesaya 65:13.) Si fao faʼoböwö, iʼamualagö fefu zoguna ba wamati ba niha samosumange yaʼia Yehowa enaʼö lö tebulö ahatö ira khönia. Ibeʼe khöda geheha niʼamoniʼö, Taromalinia, hegöi ngawalö publikasi si teʼodane-dane ba Zura Niʼamoniʼö si tola ’taʼa, . . . tabadu, . . . ba si möi fangomuso dödö’. (Fareso göi Wamaʼeleʼö 22:17.) Hizaʼi, faehu sibai nirasoi niha si lö farahu ba waradaiso ba wamati. Larasoi ’waʼolofo . . . , faʼowökhi dödö . . . , ba niʼailasi’. Lö tebönökhi zoguna khöra ba wamati.—Amo. 8:11.

6. Hewisa Yoeli 2:​21-24 wanutunö hadia nibeʼe Yehowa khöda, ba hewisa enaʼö tola tatema mbua?

⁶ Ba wamaʼeleʼö Yoeli, iʼogunaʼö ngawua wehede simane sinanö, agu, hegöi fanikha zaitu ba wangoromaʼö faʼoböwö Yehowa ba wohenaigö fefu zoguna khöda, farahu ba daʼö gö ba wamati. (Yoe. 2:​21-24) Duma-dumania, ibeʼe khöda Zura Niʼamoniʼö, publikasi si teʼodane-dane ba Zura Niʼamoniʼö, situs web, angowuloa ero migu, angowuloa ba zi sambua wilayah hegöi ba zi sambua regional. Tola taʼogunaʼö ero maʼökhö fefu zi no ihenaigö andrö, ba buania tebönökhi fefu zoguna khöda ba wamati ba teʼokafui dödöda.

7. Hana wa tarasoi ”waʼowua-wua dödö”? (Yesaya 65:14)

⁷ Faʼomuso dödö hegöi faʼahono dödö. ”Saʼiki-iki” nono mbanua Lowalangi börö me laʼandrö sibai saohagölö khö Yehowa. (Baso Yesaya 65:14.) Teʼabölöʼö ira börö zindruhu, terara dödöra börö mbuʼusa li Lowalangi si so ba Daromalinia, ba larasoi ”waʼowua-wua dödö” me laʼokhögö dötönafö börö höli nibeʼe Yesu. Na tadunö-dunö fefu daʼö khö ndra talifusöda, tola tarasoi waʼomuso dödö sindruhu!—Si. 34:8; 133:​1-3.

8. Hadia zi dombua tandra si tohude niʼasogö waradaiso ba wamati?

⁸ So dombua dandra si tohude niʼasogö waradaiso ba wamati yaʼia daʼö faʼomasi hegöi fahasara dödö ba gotalua nono mbanua Yehowa. (Kol. 3:14) Daʼa zanolo yaʼita ba wokhalaigö hewisa waʼaurida ba gulidanö si bohou dania. Fefu nono mbanua Yehowa ba ginötö daʼö, itugu laʼomasiʼö nawöra ba itugu teʼosambuaʼö ira töra moroi ba zilalö. Itutunö si samösa talifusöda ira alawe, hadia nirasoinia me awena sibai falukha ia ba nono mbanua Yehowa. Imane, ”Lö uʼila hewisa lala enaʼö usöndra waʼomuso dödö, börö me lö  usöndra daʼö yomo ba nomogu. Hizaʼi, awena sibai uʼila niha sangoromaʼö faʼomasi sindruhu khö nawöra yaʼia daʼö me falukhado khö ndra Samaduhuʼö Yehowa.” Dozi niha somasi morasoi faʼomuso dödö sindruhu hegöi faʼahono dödö, moguna farahu ira ba waradaiso ba wamati. Gofu hewisa wamaigi niha gulidanö nono mbanua Yehowa, lö tebulö laʼokhögö döi si sökhi börö me farahu ira ba nösi nomo Yehowa si so ba zorugo hegöi ba gulidanö.—Yes. 65:15.

9. Hadia nifabuʼu Yesaya 65:​16, 17 sanandrösa ba wamakao nitaögöda?

⁹ Molombase ba lö faʼabu dödö. Imane ba Yesaya 65:​14, fefu niha si lö farahu ba waradaiso ba wamati larasoi ’wangarö-ngarö börö waʼabu dödö, ba mege-ege börö waʼafatö dödö’. Hizaʼi, hadia zalua dania ba ngawalö wamakao nitaögö nono mbanua Lowalangi? Ba gafuriata, fefu daʼö ”hasambalö muʼolifugö, tobini daʼö fefu föna duduma hörö [Lowalangi]”. (Baso Yesaya 65:​16, 17.) Iheta fefu ngawalö gabula dödöda Yehowa, ba lö saʼae itörö tödöda waʼafökhö nirasoida ba zilalö.

10. Hana wa tobali howu-howu khöu me tola fariawö ndraʼugö khö ndra talifusöda? (Faigi göi gambara.)

¹⁰ Iadaʼa, tola tasöndra waʼahono dödö na möi ita ba gangowuloa börö me tola molombase ita sabata ba lö taʼangeragö gabula dödö salua ba gulidanö si lö sökhi andre. Tola göi tatolo ndra talifusöda enaʼö laʼolifugö sabata gabula dödöra yaʼia daʼö na taforomaʼö waʼomasi, faʼomuso dödö, faʼohahau dödö, faʼasökhi dödö, falöʼalio mofönu börö me daʼö fefu no bua-bua geheha Lowalangi. (Gal. 5:​22, 23) No sambua howu-howu khöda börö me no farahu ita ba organisasi Yehowa! Dozi niha si lö tebulö so ba waradaiso ba wamati, tola laʼila samösa dania waʼalua zi no ifabuʼu Lowalangi sanandrösa ba ”mbanua si yawa si bohou ba tanö si bohou”.

11. Moloʼö Yesaya 65:​18, 19, hadia mbua nitemada börö me so ita ba waradaiso ba wamati?

¹¹ Fangandrö saohagölö ba faʼomuso dödö. Aefa daʼö, itutunö Yesaya hadia mbörö wa ’taʼomusoiʼö ba taʼowua-wuaʼö dödöda’ börö me no so ita ba waradaiso ba wamati. Börö me Yehowa zangaʼasogö faradaiso ba wamati andre. (Baso Yesaya 65:​18, 19.) Lö ahöli dödöda na iʼogunaʼö ita Yehowa ba wanolo niha, enaʼö laröi organisasi nifasindro niha si lö mamahaʼö sindruhu sanandrösa khö Lowalangi, ba tatolo ira enaʼö farahu ira ba waradaiso ba wamati! Tatu omuso dödöda me no taʼila wa so howu-howu nitemada börö me tafahaʼö ita ba zindruhu. Daʼö göi zamarou tödöda ba wamatunö sindruhu andrö ba niha böʼö.—Yer. 31:12.

12. Hewisa dödömö ba zi no ifabuʼu Yesaya 65:​20-24, ba hadia mbörö?

 ¹² Taʼandrö sibai saohagölö ba omuso dödöda ba dötönafö niʼokhögöda börö me tobali ita ono mbanua ba waradaiso ba wamati. Khalaigö fefu ngawalö niʼila hegöi nifaluada ba gulidanö si bohou dania. No ifabuʼu khöda Sura Niʼamoniʼö, ”Lö hadöi saʼae ono sawuyu sauri ha ba zi hauga hari, mazui niha satua si lö anau noso.” Ba daʼö dania, ”Lalau nomo ba toröi ira ba daʼö; Lafazökhi kabu nagu, ba laʼa mbuania.” Baero daʼö, ”Tenga zaya-zaya gölö waʼamarasera”, börö me ”nifahowuʼö Yehowa” ira. Ifabuʼu khöda wa lö hadöi ametaʼuö ba hasambalö ibönökhi fefu zomasi-masi dödöda. Aboto ba dödönia hadia zoguna ba zi samösa niha ’fatua lö lakaoni ia’, ba ’iʼabusoiʼö fefu zauri somasi dödöra’.—Yes. 65:​20-24; Si. 145:16.

13. Hewisa Yesaya 65:25 ba woʼamaedolagö fombulöʼö nifalua zi samösa niha me ibörögö ifosumange Yehowa?

¹³ Faʼatulö ba falöʼametaʼuö. Ato niha sangokhögö amuata si lö sökhi ba zilalö, no labulöʼö gamuatara börö wanolo geheha Lowalangi. (Baso Yesaya 65:25.) Moguna laforege wondröi amuatara si lö sökhi ba zilalö. (Rom. 12:2; Ef. 4:​22-24) Hewaʼae simanö, lö moʼahonoa nono mbanua Lowalangi. Asese nasa lafalua zala. Hizaʼi, itemaʼö ”fefu niha” Yehowa sangomasiʼö yaʼia hegöi sangomasiʼö niha böʼö. Buania, lasöndra waʼatulö hegöi fahasara dödö. (Tit. 2:11) Daʼa no sambua tandra sahöli-höli dödö ba ha Lowalangi Fondrege Zabölö zi tola mamalua daʼö!

14. Hewisa nisura ba Yesaya 65:25 alua ba waʼauri zi samösa talifusöda?

¹⁴ Hadia tola sindruhu-ndruhu ibulöʼö gamuatania si samösa niha? Angeragö duma-duma daʼa. Samösa nono matua si bohou ebua si 20 fakhe si no hauga kali möi ba gurunga, asese ifalua gamuata wohorö ba faʼafaito. Laraʼu ia börö me itagö moto, irabu niha, ba ifalua göi gamuata faʼalösökhi tanö böʼö. Aefa daʼö, asese ifobörö waʼudusa. Me awena sibai irongo zindruhu moroi ba Zura Niʼamoniʼö ba ibörögö weʼamöi ba gangowuloa ndra Samaduhuʼö Yehowa, faduhu dödönia wa no isöndra zindruhu yaʼia daʼö faradaiso ba wamati. Me no aefa tebayagö ia idanö, asese iʼangeragö hewisa wamaluania nisura ba Yesaya 65:25. Ba wamobörö, amuʼi ia simane singo, hizaʼi tobali ia niha si so faʼatulö simane ono mbiri-biri.

15. Hana wa omasi takaoni niha enaʼö fao ira ba waradaiso ba wamati, ba hewisa wamaluada daʼö?

¹⁵ Imane Yesaya 65:​13, ”Daʼa niwaʼö Yehowa Lowalangi Fondrege Zalawa.” Ba gafuriata wehede ba ayati 25 imane, ”iwaʼö Yehowa.” Hasambalö ifalua zi no ifabuʼu. (Yes. 55:​10, 11) Sindruhu-ndruhu wa no alua waradaiso ba wamati iadaʼa. No iʼamualagö khöda Yehowa nösi nomo si tohude ba wamati. Börö me farahu ita ba nösi nomo andre, itugu monönö tasöndra waʼatulö ba tarasoi waʼahono dödö ba gotalua gulidanö si lö sökhi andre. (Si. 72:7) Andrö wa omasi ita ba wanolo niha enaʼö farahu ira ba waʼafatalifusötada. Tola tafalua daʼa na taʼosambuaʼö dödöda ba wombaliʼö nifahaʼö.—Mat. 28:​19, 20.

LALA ENAʼÖ ADÖNI DÖDÖ NIHA BÖʼÖ BA WARADAISO BA WAMATI

16. Hewisa enaʼö adöni dödö niha ba waradaiso ba wamati?

¹⁶ Dozi ita so zinangea tafalua enaʼö adöni dödö niha ba waradaiso ba wamati. Tola tafalua daʼö na taʼoʼö Yehowa. Lö ifaso niha weʼamöi ba organisasinia. Hizaʼi, si fao faʼasökhi dödö ’ikaoni’ niha khönia. (Yoh. 6:44; Yer. 31:3) Niha sadöni tödö somasi mamahaʼö yaʼia sanandrösa ba waʼomasi Yehowa  hegöi amuatania sahöli-höli dödö, tola ahatö ira khönia. Hewisa wa tola adöni dödö niha ba waradaiso ba wamati börö gamuata hegöi bua-bua si sökhi niʼokhögöda?

17. Hadia nifaluada enaʼö adöni dödö niha ba waradaiso ba wamati?

¹⁷ Sambua lala enaʼö adöni dödö niha ba waradaiso ba wamati yaʼia daʼö na tafalua waʼomasi ba faʼasökhi dödö ba gotalua zamosumange Yehowa. Na so niha sawena möi ba gangowuloada, omasi ita na lahalö rahu-rahu simane niwaʼö niha si tenga niha Keriso sangondrasi angowuloa ba Gorindro me götö föna. Lamane wangumaʼö, ”sindruhu wa so Lowalangi ba gotaluami.” (1 Ko. 14:​24, 25; Zak. 8:23) Börö daʼö, moguna taʼoʼö mene-mene ba ’wangodödögö enaʼö lö tebulö so khöda waʼatulö’.—1 Te. 5:13.

18. Hewisa enaʼö adöni dödö niha weʼamöi ba organisasida?

¹⁸ Moguna tafaigi ndra talifusöda simane famaigi Yehowa yaʼira.Tola tafalua daʼö na taʼosambuaʼö dödöda ba gamuata si sökhi niʼokhögöra, tenga ba walömoʼahonoara si lö ara tö iheta Yehowa. Na fatiti ita khö ndra talifusöda, tola taʼasiwai ia si fao faʼomasi na ’faoma tahakhösi tödö nawöda, ba taʼefaʼö zala nawöda soroi ba dödö’. (Ef. 4:32) Awena tola adöni dödö niha ba waradaiso ba wamati na no tafalua zimane daʼö. b

BÖI TEBULÖ SO NDRAʼUGÖ BA WARADAISO BA WAMATI

19. (a) Simane nisura ba kotak ” No Irai Faröi, Hizaʼi Mangawuli”, hadia niwaʼö niha sangawuli ba waradaiso ba wamati? (b) Hadia gangetula sinangea tahalö? (Faigi göi gambara.)

¹⁹ Taʼandrö sibai saohagölö ba waradaiso ba wamati si so yaʼita! Itugu tedou waʼasökhinia  ba itugu monönö zamosumange Yehowa töra moroi ba zilalö. Dataforomaʼö nasa wangandrö saohagölö khö Yehowa me no iʼasogö khöda waradaiso ba wamati. Dozi niha somasi morasoi fangokafu dödö, faʼahono dödö, falöfaʼabu dödö hegöi falöʼametaʼuö, moguna farahu ia ba waradaiso ba wamati ba lö iröi daʼö! Hizaʼi, moguna mangelama ita börö me iforege Satana ba wamaʼala yaʼita ba wondröi faradaiso ba wamati. (1 Fe. 5:8; Fam. 12:9) Böi tatehegö mofozu ia. Dataforege ba wolumöʼö faʼasökhi, faʼohahau hegöi faʼatulö si so ba waradaiso ba wamati.