Hadia Öʼila?
Hewisa wa tola tobali saradadu Razo Dawido niha si tenga iraono Gizaraʼeli?
BA GOTALUA zaradadu Razo Dawido, ato ndra matua si tenga iraono Gizaraʼeli. Duma-dumania, Seleki niha Gamoni, Uria niha Kheti, ba Yitema niha Moabi. a (1 Nga. 11:39, 41, 46) Farahu göi ba daʼö ’niha Gereti, niha Feleti hegöi niha Gata’. (2 Sa. 15:18) Niha Gereti hegöi Feleti, te ahatö gamakhaitara ba niha Wilisiti. (Hez. 25:16) Niha Gata, moroi ba Gata, banua niha Wilisiti.—Yos. 13:2, 3; 1 Sa. 6:17, 18.
Hana wa itehegö khöra Dawido tobali saradadunia? Faduhu dödönia wa hasambalö lö faröi ira khönia, töra-töra khö Yehowa. Duma-dumania, sanandrösa ba niha Gereti hegöi niha Feleti, imane The New Interpreterʼs Dictionary of the Bible, ”Lö faröi ira khö Dawido sagötö waʼarazonia hewaʼae ba ginötö si basaki.” Hewisa wangoromaʼöra daʼö? Me ”fefu ndraono Gizaraʼeli” laröi Dawido ba laʼoʼö ”samösa ndra matua niha Mbeniami sangalu-ngalui tandrawa, töinia Seba ono Mbikhiri”, lö faröi niha Gereti hegöi niha Feleti khö Dawido ba latolo ia ba wokalaisi Zeba. (2 Sa. 20:1, 2, 7) Baero daʼö, ba ginötö edöna Gadonia ba worabu dadaoma waʼarazo si no tebeʼe khö Zelomo, lö faröi niha Gereti hegöi niha Feleti khö Dawido ba latolo Dawido ba wamataro Selomo tobali razo nifili Yehowa.—1 Ra. 1:24-27, 38, 39.
So danö böʼö nasa niha si tenga iraono Gizaraʼeli si lö faröi khö Dawido, yaʼia daʼö Itaʼi moroi ba mbanua Gata. Itaʼi hegöi si 600 zaradadu niha Gata tanö böʼö, lö laböhöli ba wotuhini Dawido me iforege Abisalomi ba wondrönisi tödö ndraono Gizaraʼeli ba wolawa razo. Iʼandrö Dawido khö Gitaʼi enaʼö böi fao ia ba wasuwöta börö me niha si fatewu ia. Hizaʼi, itema linia Gitaʼi, ”Faya wa no sauri Yehowa ba faya wa no sauri ndraʼugö Razo na faröi khöu zawuyumö andre. Hezo so möiʼö ba daʼö so ndraʼo, he faʼauri hegöi faʼamate!”—2 Sa. 15:6, 18-21.
Lö faröi Gitaʼi khö Dawido, razo nifataro Yehowa
Hewaʼae tenga iraono Gizaraʼeli niha Gereti, niha Feleti, hegöi niha Gata, hizaʼi lafosumange sibai Lowalangi satulö sotöi Yehowa hegöi Dawido, niha nifataro Yehowa. Iʼandrö sibai saohagölö Dawido börö me iʼokhögö zaradadu si lö faröi andrö!
a No tesura ba 5 Moze 23:3-6 sanandrösa ba Goroisa Lowalangi wa tebai tobali ono mbanua Gizaraʼeli niha Gamoni hegöi niha Moabi. Tola manö daʼö geluaha goroisa andrö yaʼia daʼö lö latehegö khöra na tobali ira iraono Gizaraʼeli. Hizaʼi, mutehegö khöra na fariawö mazui na toröi ira ba gotalua nono mbanua Lowalangi andrö. Faigi duho ”Kawin Campur dengan Orang Israel” ba subjek ”Ammon, Orang” si so ba mbuku Pemahaman Alkitab.
