1. Hewisa dödö niha ösa na manuriaigö ira? (Faigi göi gambara.)

 YAʼITA ono mbanua Yehowa, manuriaigö ita börö me taʼomasiʼö sibai Namada si so ba zorugo, ba tatolo niha böʼö enaʼö aboto ba dödöra ia. Ato zanuriaigö sorasoi faʼomuso dödö ba wamalua halöwö fanuriagö. Hizaʼi, so göi zi lö manöndra faʼomuso dödö na lafalua daʼö. Hadia mbörö? So ösa zaila ba lawaʼö tödöra wa lö onekhe ira ba wamahaʼö. So göi niha, lö ohahau dödöra na möi ira ba nomo niha böʼö na lö mukaoni ira. So ösa zataʼu, alai na mofönu khöra zokhö omo. Ba so göi zi lö omasi möi ba nomo niha enaʼö lö fatiti ira zokhö omo. Hewaʼae laʼomasiʼö sibai Yehowa, hizaʼi abua khöra wamatunö turia somuso dödö ba niha sawena falukha khöra. Hewaʼae simanö, aboto ba dödöra wa moguna sibai halöwö daʼa, andrö wa lö laböhöli wamalua yaʼia. Omuso sibai dödö Yehowa ba nifaluara andrö!

2. Hana wa lö moguna ide-ide dödöu na itaria lö örasoi waʼomuso dödö ba wanuriaigö?

² Hadia itaria lö khöu faʼomuso dödö na öfalua halöwö fanuriaigö börö me örasoi simane nitutunö ba wamobörö no mege? Na alua zimane daʼö, böi ide-ide dödöu. Na daʼö nirasoimö eluahania so khöu wangide-ngideʼö ba lö omasiʼö na teʼosambua dödö niha ba khöu. Daʼö göi zangoromaʼö wa lö omasi ndraʼugö fadaʼawa ba niha böʼö. Ba lö hadöi niha somasi na mofönu khönia niha böʼö, mendrua manö na si sökhi nifaluania.  Aboto ba dödö Namada si so ba zorugo hadia nirasoida ba omasi ia itolo ita. (Yes. 41:13) Ba artikel daʼa, tatutunö dania so lima lala sanolo yaʼita ba wanimbagö fangera-ngera simane daʼö hegöi lala ba wanöndra faʼohahau dödö ba wanuriaigö.

YAʼIABÖLÖʼÖ NDRAʼUGÖ TAROMALI LOWALANGI

3. Hadia zanolo Yeremia me manuriaigö ia ba niha böʼö?

³ Börö wehede Yehowa, teʼabölöʼö nono mbanua Lowalangi sagötö ba zi hauga abad me abua khöra ba wangasiwai halöwö nitemara. Duma-dumania, nehegö zalua khö zamaʼeleʼö sotöi Yeremia. Irasoi waʼaombö dödö me ifatenge ia Yehowa weʼamöi manuriaigö. Imane, ”Lö onekhedo fahuhuo, börö me awuyu nasa ndraʼo.” (Yer. 1:6) Hadia zanolo yaʼia enaʼö so khönia waʼabarani weʼamöi manuriaigö? Fehede Yehowa zangabölöʼö yaʼia. Imane Yeremia, ”Hulö hola-hola galitö bakha ba dödögu daromalinia, si no teʼuʼu bakha ba dölagu. No erege dödögu wanaha yaʼia.” (Yer. 20:​8, 9) Hewaʼae manuriaigö Yeremia ba niha si lö moʼameʼegö tödö duria nifaʼemania, hizaʼi, ösi duria nifaʼemania zangabölöʼö yaʼia ba wamalua halöwö andrö.

4. Hadia mbua nitemada na tabaso ba taʼangerönusi Zura Niʼamoniʼö? (Kolose 1:​9, 10)

⁴ Tola teʼabölöʼö niha Keriso börö wehede Lowalangi nibasora ba Zura Niʼamoniʼö. Me ifaʼoheʼö zurania Faulo ba mbanua niha Keriso ba Golose, ifatunö khöra wa faʼaboto ba dödö sanandrösa ba gohitö dödö Lowalangi, möi fanolora ’irege sinangea gamuatara föna Yehowa’, ba lö laböhöli ”wamalua si sökhi”. (Baso Kolose 1:​9, 10.) Sambua moroi ba ngawalö zi sökhi andrö yaʼia daʼö manuriaigö turia somuso dödö. Na tabaso ba taʼangerönusi Daromali Lowalangi, itugu aro wamatida khö Yehowa ba itugu aboto ba dödöda hadia mbörö wa moguna sibai taturiaigö Wamatörö Lowalangi.

5. Hewisa enaʼö oya tatema mbua na tabaso ba tafahaʼö ita ba Zura Niʼamoniʼö?

⁵ Enaʼö oya tatema mbua moroi ba Daromali Lowalangi, böi mangaösö-ngaösö ita ba wombaso, ba wamahaʼö yaʼita, mazui ba woʼangerönusi Sura Niʼamoniʼö. Tatugöi ginötö. Na so ayati sambö aboto ba dödömö, böi lalöi daʼö. Abölö sökhi na öʼogunaʼö Indeks Publikasi Menara Pengawal mazui Fanuturu Lala ba Wamalua Riset khö Ndra Samaduhuʼö Yehowa enaʼö öʼila geluaha ayati nibasomö andrö. Na öbeʼe ginötöu ba wamahaʼö yaʼugö, itugu  aro waʼafaduhu dödömö ba zindruhu si so ba Daromali Lowalangi. (1 Te. 5:21) Na itugu faduhu dödömö, itugu ösöndra waʼomuso dödö ba wamatunö ba niha böʼö sanandrösa ba zi no öfahaʼö yaʼugö.

HAOGÖ FAʼANÖ NDRAʼUGÖ FATUA LÖ MÖIʼÖ MANURIAIGÖ

6. Hana wa tahaogö tafaʼanö ita fatua lö möi manuriaigö?

⁶ Na no öfaʼanö ndraʼugö fatua lö möiʼö manuriaigö, lö talafo moʼugu-ugu dödöu na fahuhuo ndraʼugö ba niha böʼö. Itolo ndra nifahaʼönia Yesu enaʼö lafaʼanö ira fatua lö möi manuriaigö. (Luk. 10:​1-11) Börö me lafalua wanuturu lala si no ifahaʼö ira Yesu, tola lafalua ngawalö zi sökhi ba lasöndra waʼomuso dödö.—Luk. 10:17.

7. Hadia zinangea tafaʼanö fatua lö möi ita manuriaigö? (Faigi göi gambara.)

⁷ Hadia zinangea tafaʼanö fatua lö möi ita manuriaigö? Moguna taʼangeragö hadia zinangea tawaʼö ba enaʼö si toʼölö manö na fahuhuo ita. Tola göi möi fanoloda na taʼangeragö hadia niwaʼö niha khöda ba hewisa lalada ba wameʼe khöra fanema li. Ba ginötö fahuhuo ita ba niha, taforege enaʼö si toʼölö manö lagu wahuhuosada, taboho khöra mbawa, ba fahuwu ita khöra.

8. Simane nitutunö Waulo, hana wa muʼamaedolagö niha Keriso hulö dambu laʼuri?

⁸ Ifatunö Faulo khö ndra niha Keriso wa ’no tebeʼe khöda harato andrö hewaʼae na hulö mbowoa tanö ita’. (2 Ko. 4:7) Hadia harato daʼö? Yaʼia daʼö halöwö fanuriaigö Famatörö Lowalangi si möi fangorifi niha. (2 Ko. 4:1) Hadia geluaha mbowoa tanö? Yaʼia daʼö ono mbanua Lowalangi solohe turia somuso dödö ba niha böʼö. Ira sogale ba götö Waulo, laʼogunaʼö rumbi nifazökhi moroi ba dambu laʼuri tobali naha gama-gama sebua böli simane ö, agu hegöi kefe. Simanö göi, ifaduhusi tödö ita Yehowa ba wamaʼema turia somuso dödö. Börö wotuhini moroi khö Yehowa, tola taʼokhögö waʼabölö irege lö faröi ita ba wamaʼema turia somuso dödö andrö.

ANGANDRÖ ENAʼÖ SO KHÖU WAʼABARANI

9. Hadia nifaluada na so khöda waʼataʼu ba niha mazui na lafofanö ita? (Faigi göi gambara.)

⁹ Itaria, ataʼu ita ba niha mazui ataʼu ita na lö latema duria nifaʼemada khöra. Hadia nifaluada na alua zimane daʼö? Datafaigi wangandrö ndra nifahaʼö Yesu me lö latehegö khöra wanuriaigö.  Moroi na awuwu ira börö waʼataʼu, laʼandrö wanolo khö Yehowa ba lamane, ”Beʼe khöma waʼabarani ba wamaʼema taromalimö.” Iʼanemaiʼö ifondrondrongo wangandröra Yehowa. (Hal. 4:​18, 29, 31) Na itaria so khöda waʼataʼu ba niha, taʼandrö wanolo khö Yehowa ba wangandrö. Andrö khönia enaʼö itugu tedou waʼomasimö ba niha irege lö khöu faʼataʼu ba wangombakha turia somuso dödö.

10. Hewisa Yehowa wanolonia yaʼita tobali Samaduhuʼö khönia? (Yesaya 43:​10-12)

¹⁰ No ifataro ita Yehowa tobali Samaduhuʼö khönia ba ifabuʼu wa hasambalö ibeʼe khöda waʼabarani. (Baso Yesaya 43:​10-12.) Datanehegö öfa ngawua lala nifaluania. Si oföna, fao khöda Yesu ero na möi ita manuriaigö. (Mat. 28:​18-20) Si dua, ifatenge ndra malaʼikania Yehowa ba wanolo yaʼita. (Fam. 14:6) Si tölu, ibeʼe khöda geheha niʼamoniʼö ba wanolo yaʼita enaʼö tola tatörö tödöda hadia zi no tafahaʼö yaʼita. (Yoh. 14:​25, 26) Si öfa, no ihenaigö ndra talifusöda si tola manolo yaʼita. Börö wanolo Yehowa hegöi fanolo moroi khö ndra talifusö si fao faʼomasi, tola barani ita ba lö taböhöli wanuriaigö.

BÖI FATANDRO BA OKHÖGÖ WANGERA-NGERA SI SÖKHI

11. Hewisa enaʼö ato niha nifalukhaisimö ba wanuriaigö? (Faigi göi gambara.)

¹¹ Hadia so khöu waʼide-ide dödö na lö ato niha nifalukhaisimö ba nomo? Sofu khöu samösa, ’Hana wa lö hadöi niha ba nomo ba ginötö möido manuriaigö?’ (Hal. 16:13) ”Hadia no möi ira mohalöwö mazui no möi ira ba fasa?’ Na daʼö zalua, hadia omasiʼö öfalua wanuriaigö ba nahia sato niha enaʼö abölö ato niha nifalukhaisimö? Imane samösa talifusöda sotöi Joshua, ”No utandraigö wa tola manuriaigö ita ba niha nifalukhaisida ba fasa mazui ba nahia parkir.” Yaʼia hegöi foʼomonia sotöi Bridget, manuriaigö göi ira ero tanö owi mazui ba zi laluo hari Migu, ba ato niha nifalukhaisira ba nomo.—Ef. 5:​15, 16.

12. Hadia nifaluada na ambö adöni dödö niha ba duria nifaʼemada?

¹² Na so niha nifalukhaisimö ba lö adöni dödönia ba duria nifaʼemamö, tandraigö alui hadia nifaduhusinia tödö mazui niʼaombösinia tödö. Joshua hegöi Bridget laʼogunaʼö wanofu si so tanö föna risalah ba  wamörögö fahuhuosa ba niha. Duma-dumania, me laʼogunaʼö risalah Hewisa Moloʼö Yaʼugö Zura Niʼamoniʼö? lamane wangumaʼö, ”So ösa niha sangumaʼö wa Sura Niʼamoniʼö andrö buku moroi khö Lowalangi, hizaʼi so göi niha si lö fao tödö ba daʼö. Hewisa moloʼö yaʼugö?” Sasesenia, tola ara fahuhuo ira khö zi samösa niha na laʼogunaʼö wanofu andrö.

13. Hana wa no mofozu ita ba wanuriaigö hewaʼae na lö hadöi niha samondrondrongo yaʼita? (Amaedola 27:11)

¹³ No mofozu ita ba wanuriaigö hewaʼae lö hadöi niha somasi mamondrondrongo turia nifaʼemada. Hana wa tawaʼö daʼö? Börö me no tafalua hadia zomasi Yehowa hegöi Ononia yaʼia daʼö ba wamaduhuʼö sanandrösa khöra. (Hal. 10:42) Hewaʼae lö hadöi niha somasi fahuhuo khöda mazui latimbagö duria nifaʼemada, lö tebulö tasöndra waʼomuso dödö börö me taʼila wa no taʼomusoiʼö dödö Namada ba zorugo.—Baso Gamaedola 27:11.

14. Hana wa fao ita ba waʼomuso dödö khö ndra talifusöda si falukha ba niha sadöni tödö?

¹⁴ Fao ita ba waʼomuso dödö khö ndra talifusöda si falukha ba niha sadöni tödö. Ba majalah Manuriaigö, iʼamaedolagö halöwö fanuriaigöda andrö simane halöwö ba wangalui ono si taya. Ato niha si fao ba wangalui yaʼia ba lahaogö laʼalui ero sambua nahia. Ba me no lasöndra nono andrö, omuso dödöra fefu tenga ha niha sanöndra yaʼia. Simanö göi halöwö ba wombaliʼö nifahaʼö, falulu fohalöwö fefu niha si so ba mbanua niha Keriso ba wamalua yaʼia. Dozi niha si so ba mbanua niha Keriso, moguna manuriaigö ira ba niha si so ba mbanuara, ba omuso dödöra fefu me so niha sawena mangondrasi angowuloa.

OSAMBUAʼÖ DÖDÖMÖ BA WANGOMASIʼÖ YEHOWA HEGÖI NIHA BÖʼÖ

15. Hewisa wa möi fanoloda Mataiʼo 22:​37-39 enaʼö monönö waʼomuso dödöda ba wanuriaigö? (Faigi göi gambara .)

¹⁵ Tola monönö waʼomuso dödöda ba wanuriaigö na taʼosambuaʼö dödöda ba waʼomasida khö Yehowa hegöi ba niha böʼö. (Baso Mataiʼo 22:​37-39.) Tola ökhalaigö hawaʼomuso dödö Yehowa me iʼila tafalua halöwö andrö ba hawaʼomuso dödö niha ba ginötö labörögö lafahaʼö ira ba Zura Niʼamoniʼö! Böi olifuʼö wa niha samondrongo turia somuso dödö ba sangai angetula ba wamosumange Yehowa, lasöndra waʼauri si lö aetu.—Yoh. 6:40; 1 Ti. 4:16.

16. Hewisa enaʼö ösöndra waʼomuso dödö ba wanuriaigö hewaʼae na tebai mofanöʼö moroi ba nomo? Beʼe duma-duma.

 ¹⁶ Hadia tebai mofanö-fanöʼö moroi ba nomo? Na daʼö zalua, osambuaʼö dödömö ba zi tola öfalua ba wangoromaʼö faʼomasi khö Yehowa hegöi ba niha böʼö. Sagötö alua pandemi COVID-19, Samuel hegöi Dania no laʼiagö manö nomo. Sagötö alua waʼabasaki andrö, lö laböhöli wamalua halöwö fanuriaigö ba telefo, laʼogunaʼö zura, hegöi zoom ba wamalua famahaʼö ba Zura Niʼamoniʼö. Manuriaigö Samuel ba niha si falukha khönia ba klinik, nahania wanemaʼö perawatan kanker. Imane, ”Faʼabasaki salua khöda, tola manö so lua-luania ba wangera-ngerada, faʼabölöda hegöi ba wamatida. Moguna so khöda waʼomuso dödö ba wamalua halöwö khö Yehowa.” Aefa daʼö ba zi lö mudöna-döna alabu Dania. Tölu waŵania ba naha wemörö ba önö waŵa iʼogunaʼö gurusi roda. Imane Dania, ”Ufalua fefu zi sagu khögu. Manuriaigö ndraʼo khö perawat si möi ba nomo ba wameʼe dalu-dalugu hegöi ba niha solohe gama-gama ba nomogu. Aefa daʼö, asese göi fahuhuodo ba telefo khö zi samösa niha sohalöwö ba perusahaan medis.” Hewaʼae lö oya zi tola lafalua simane ba zilalö, hizaʼi laforege wamalua si tola lafalua ba larasoi waʼomuso dödö ba gafuriata.

17. Hewisa enaʼö oya mbua nitemamö moroi ba wanuturu lala nitutunö ba artikel andre?

¹⁷ Tandraigö falua zi lima ngawua wanuturu lala nitutunöda ba artikel andre. Ero sambua fanuturu lala no amaedola faramasa niʼogunaʼö na murino zi sambua ngawalö gö. Na mufaruka fefu faramasa andrö, tola ami gö nirinoda. Simanö göi, na mufalua fefu wanuturu lala nitemada, tola sökhi wanimbagöda lala wangera-ngera si lö baga ba monönö waʼomuso dödöda ba wamalua halöwö fanuriaigö.