Iʼotarai me ide-ide, omasido sibai wamaigi-maigi ngawalö zi sökhi ba zi fasuigu. Asese möiga yaʼaga si sambua omo ba wamaigi atua si sökhi hegöi ungo nidanö si so ba mbanuama Jyväskylä, ba Finlandia Tengah. Omasido sibai gurifö. Omasido usakhei nasu hegöi mao niʼilagu! Me itugu ebua-bua ndraʼo, lö omasido wamaigi niha samakao urifö. Ba gafuriata, faodo ba zi sambua organisasi solumöʼö urifö, ba daʼö göi falukhado niha sangomasiʼö urifö.

Asese malumöʼö gurifö. Mafaʼema göi informasi ba mafalua demo enaʼö lö saʼae samawa nukha moroi ba guli gurifö ba lö labaliʼö mai-maira gurifö andrö. Mafazökhi sambua organisasi ba wolumöʼö urifö. Börö me maforege wombulöʼö amakhoita, asese laʼohega ba gödo wolisi. No hauga kali göi laraʼu ndraʼo ba laʼohe föna zanguhuku.

Baero daʼö, lö omasido wamaigi ngawalö gabula dödö salua ba gulidanö. Andrö wa fao ndraʼo ba organisasi, simane Amnesty International hegöi Greenpeace. Uhorigö waʼabölögu ba wanuhini nifaluara. Uʼoʼawögö niha si numana, solofo ba si tosasa.

Hizaʼi, me itugu numalö ginötö, aboto ba dödögu wa tebai ubulöʼö gulidanö andre. Hewaʼae mofozu organisasi andrö ba wangasiwai abula dödö side-ide, hizaʼi monönö gabula dödö sebua. Hulö so waʼabölö si lö sökhi samakao ulidanö ba lö soʼameʼegö tödö. Lö khögu faʼabölö.

Abu dödögu börö me lö hadöi si tola ufalua. Andrö wa ibörögö uʼangerönusi sanandrösa khö Lowalangi hegöi Sura Niʼamoniʼö. No irai ufahaʼö ndraʼo khö ndra Samaduhuʼö Yehowa sanandrösa ba Zura Niʼamoniʼö. Hewaʼae uʼameʼegö tödö waʼomasi hegöi amuatara si sökhi, hizaʼi tebai nasa ubulöʼö waʼaurigu. Sakali daʼa, faböʼö sibai zalua.

Uhalö Zura Niʼamoniʼö, ba ubörögö wombaso. Daʼö zamadöhö sokho dödögu. Oya ayati Zura Niʼamoniʼö samahaʼö yaʼita ba woʼameʼegö tödö urifö. Duma-dumania, imane ba Gamaedola 12:10, ”Niha satulö tödö ihaogö wondrorogö urifönia.” Ufahaʼö göi ndraʼo wa tenga börö Lowalangi wa alua gabula dödö ba gulidanö andre. Itugu ebua gabula dödöda börö me ato niha si lö omasi moloʼö niwaʼö Lowalangi. Adöni sibai dödögu me ufahaʼö ndraʼo sanandrösa ba waʼomasi hegöi ba waʼebolo dödö Lowalangi Yehowa.​—Sinunö 103:​8-​14.

Aefa daʼö, usöndra kupon ba wangandrö buku Hadia Nifahaʼö Zura Niʼamoniʼö Khöda? ba ufaʼoheʼö daʼö. Lö ara, tohare zi sambua fongambatö ndra Samaduhuʼö Yehowa ba laʼandrö enaʼö ufahaʼödo ba Zura Niʼamoniʼö. Utema daʼö. Möido ba gangowuloa nifalua ba Balai Mbanua Lowalangi ba ibörögö mowaʼa zindruhu ba dödögu.

Börö waʼabölö Zura Niʼamoniʼö, tola ubulöʼö waʼaurigu. Uböhöli woroko ba famadu tuo. Uhaogö mbotogu hegöi fehedegu. Uzago göi gamuatagu khö ndra samatörö. (Roma 13:1) Iadaʼa, uröi gamuata wohorö nifaluagu mböröta.

Abula dödö sebua khögu yaʼia daʼö ba wamaudugu lala wangera-ngeragu sanandrösa ba organisasi kemanusiaan hegöi lingkungan. Tenga ha ba zi sara wongi ufalua wombulöʼö andre. Ba wamobörö, uwaʼö tödögu na ahetado moroi ba daʼö hulö zi manga mböli ndraʼo. Hizaʼi, faduhu dödögu wa ha Famatörö Lowalangi zi tobali tötönafö ba gulidanö andre. Uʼosambuaʼö dödögu ba uhorigö waʼabölögu ba wotuhini Famatörö andre hegöi ba wanolo niha enaʼö lafahaʼö ira sanandrösa ba Wamatörö Lowalangi.​—Mataiʼo 6:​33.

Me mböröta, yaʼodo andre aktivis. Ba wamaigigu, ha dombua ngawawa niha zi so ba gulidanö andre yaʼia daʼö niha si sökhi ba si lö sökhi, ba uforege sibai ba wolawa niha si lö sökhi. Hizaʼi, me no ufahaʼö ndraʼo ba Zura Niʼamoniʼö, lö saʼae fatuwu ndraʼo ba niha böʼö. Uforege ba wangomasiʼö niha fefu. (Mataiʼo 5:​44) Sambua lala ba wangoromaʼögu faʼomasi yaʼia daʼö ufaʼema duria somuso dödö sanandrösa ba Wamatörö Lowalangi. Omuso dödögu börö me halöwö daʼa zangaʼasogö faʼatulö, faʼomuso dödö hegöi tötönafö sindruhu ba niha sato.

Börö me ufaduhusi tödö Yehowa, andrö wa ohahau dödögu. Faduhu göi dödögu wa lö itehegö tefakao gurifö awö niha gulidanö sagötö faʼara, börö me yaʼia Zomböi faʼauri. Lö itehegö na lafakiko gulidanö si sökhi andre. Hizaʼi, ba Wamatörönia dania, ifuli iʼazökhi zi no lafakiko niha gulidanö. (Yesaya 11:​1-9) Omuso sibai dödögu, tenga ha me uʼila zindruhu, hizaʼi me tola utolo niha böʼö enaʼö faduhu göi dödöra ba zindruhu andrö. Lö saʼae uforege wamulöʼö salua ba gulidanö andre.