Tumbu ndraʼo ba mbanua side-ide ba Roma, ba mbanua niha sohalöwö si numana. Marase sibai waʼauri niha ba daʼö. Lö irai uʼila ninagu, ba lö sökhi wahuwusama namagu. Auri ndraʼo misa ba zinga lala.

Me fulu fakhe ndröfigu, ubörögö managö. Me 12 fakhe ndraʼo, mofanödo moroi ba nomo. Hauga kali ifaondragö ndraʼo amagu ba gödo wolisi ba ifuli iʼohe ndraʼo ba nomo. Asese sibai faʼudu ndraʼo ba niha böʼö, mofönu sibai ndraʼo ba aukhudo ba niha. Me 14 fakhe ndraʼo, mofanödo moroi ba nomo ba lö mangawulido saʼae. Ubörögö uʼogunaʼö narkoba ba auri ndraʼo misa ba zinga lala. Börö me lö hadöi naha wemörögu, uboto sambua mbawandruhö moto ba ulau mörö irugi moluo. Aefa daʼö, uʼalui hele-hele ba wanasai tangagu hegöi bawagu.

Onekhe sibai ndraʼo wanagö, iʼotarai ba wanagö tasi ofeta ba wanagö ba apartemen hegöi vila ba zi bongi. Ibörögö tehöngö döigu ba lakaoni ndraʼo enaʼö faodo ba geng si tehöngö irege so ”ginötö” khögu weʼamöi managö ba bank. Börö waʼalösökhi gamuatagu, iʼanemaiʼö tobali ndraʼo anggota geng nifosumange. Gofu hezo möido hasambalö uʼohe pistol; na mörödo ubeʼe barö dandrayagu. Afönu faʼalösökhi waʼaurigu, ubadu narkoba, managö, lö sökhi wehedegu ba ulau mohorö. Lagohi-gohi ndraʼo ira folisi. No mewulu kali lataha ndraʼo, ba asese labeʼedo ba gurunga ba zi no ngafulu fakhe.

Samuza inötö me kalua ndraʼo moroi ba gurunga, möido ufalukhaisi tatögu. Lö uʼila wa no tobali Samaduhuʼö Yehowa ia hegöi ononia si darua. Lawaʼö khögu weʼamöi ba gangowuloa ndra Samaduhuʼö. Börö me omasido uʼila, andrö wa möido. Me ofetado ba Nahia Gangowuloa, ulau modadao ba zinga mbawandruhö ba ufaigi-faigi na so zi möi bakha hegöi si möi baero. Me luo daʼö no uʼohe pistol.

Tebulö waʼaurigu me möido ba gangowuloa andrö. Umane tödögu, hulö ba planet tanö böʼö so ndraʼo. Latemaʼö ndraʼo si fao faʼasökhi dödö ba laboho khögu mbawa. Lö olifudo me lafaigi ndraʼo soroi ba dödö. Aröu sibai faböʼö moroi ba waʼaurigu ba zilalö!

Ubörögö ufahaʼö ndraʼo ba Zura Niʼamoniʼö khö ndra Samaduhuʼö. Itugu oya zi no ufahaʼö yaʼo, itugu aboto ba dödögu wa moguna ubulöʼö lala waʼaurigu. Utanö ba dödögu ngawua wehede ba Gamaedola 13:20, ”Niha si fao ba zatua-tua, ba atua-tua ia göi dania, hizaʼi niha si faʼawö ba niha si bodo, ba falukha ia wamunu.” Aboto ba dödögu wa moguna uheta ndraʼo moroi ba geng. Abua khögu wamalua daʼö, hizaʼi börö wanolo Yehowa wa mofozu ndraʼo.

Uhaogö göi waʼaurigu. Uforege enaʼö ubato woroko ba lö saʼae uʼogunaʼö narkoba. Utaba mbugu sanau, uheta gati-atigu ba lö saʼae uʼogunaʼö wehede si lö si lö sökhi. Awena sibai ba waʼaurigu andre so khögu wanaha tödö.

Lö omasido mombaso hegöi famahaʼö, andrö wa abua sibai khögu wangosambuaʼö tödögu na ufahaʼö ndraʼo ba Zura Niʼamoniʼö. Hizaʼi börö me uforege, arara manö itugu uʼomasiʼö Yehowa. Ibörögö urasoi wa so zi tebulö, ibörögö itegu-tegu ndraʼo tödögu side-ide. Ibörögö so khögu wangera-ngera si lö baga sanandrösa ba waʼaurigu, so khögu waʼaombö dödö hadia tola iʼefaʼö zalagu Yehowa börö gamuata si lö sökhi nifaluagu ba zilalö. Ba ginötö daʼö, terara dödögu ba waö-waö waʼauri Razo Dawido me iʼefaʼö zalania Yehowa me no ifalua horö sebua.​—2 Samueli 11:​1–12:​13.

Abula dödö tanö böʼö yaʼia daʼö abua khögu wanutunö famatigu ba niha böʼö ba wanuriaigö ba nomo-omo misa. (Mataiʼo 28:19, 20) Ataʼu sibai ndraʼo na falukhado dania niha si no irai ufakao mazui si no urabu! Hizaʼi, arara manö tola ufalua daʼö. Ibörögö so khögu waʼomuso dödö sindruhu börö me utolo niha böʼö ba wamahaʼö yaʼira sanandrösa khö Namada si so ba zorugo, sebua faʼahakhö dödö ba sangefaʼö sala.

Möi fangorifigu wamahaʼö moroi khö Yehowa! Ato moroi ba gotalua ndra awögu ba zilalö, so zi no mate ba so ösa zi so ba gurunga, hizaʼi na yaʼo, usöndra waʼahono dödö hegöi fanötöna si sökhi ba zi so föna. Ufahaʼö ndraʼo enaʼö so khögu wangide-ngideʼö hegöi fanaha tödö enaʼö lö alio mofönu. Buania, uʼokhögö wahuwusa si sökhi ba niha si fasui yaʼo. Yaʼo hegöi foʼomogu si baga-baga sotöi Carmen, masöndra waʼohahau dödö ba wongambatö. Omuso dödöma ba wanolo niha böʼö ba wamahaʼö yaʼira ba Zura Niʼamoniʼö.

Iadaʼa, usöndra halöwö si sökhi. Itaria moʼamakhaita daʼö ba bank, hizaʼi tenga ba wanagö, no ba wangehaogö!