Khalaigö zi samösa ama si fahuo-huo khö nononia si fitu fakhe. Imane khö nononia, ”Me mböröta, ifazökhi gulidanö Lowalangi awö nösinia maʼafefu. Aefa da’ö ifazökhi luo, baŵa hegöi döfi.” Mangera-ngera nononia sabata, aefa da’ö imane khö bapania, ”He Pa, haniha zomböi Lowalangi?”

Imane bapania, ”Lö hadöi somböi Lowalangi. So manö ia.” Me luo daʼö, ahono sibai dödö nononia andrö ba wehede bapania. Hizaʼi, me itugu ebua-bua nono daʼö, manofu-nofu manö ia. Lö aetu iʼera-era hewisa wa so manö na lö börö-börö. Talu mbanua manö ba so zamazökhi. Manofu-nofu manö ia, ’Hezo mböröta Lowalangi?’

Hadia niwaʼö Zura Niʼamoniʼö? Fanema linia fagölö simane nibeʼe zatua khö nononia andrö mege. Imane Moze: ”He Yehowa, . . . fatua lö si tumbu hili, fatua lö öwöwöi gulidanö ba tanö satabö sinanö, yaʼugö Lowalangi götö-götö wa’ara.” (Sinunö 90:1, 2) Imane göi Yesaya sama’ele’ö: ”Hadia lö öʼila? Hadia lö murongomö? Yehowa andrö Zamazökhi ulidanö maʼasagörö, ba ya’ia Lowalangi irugi zi lö aetu”! (Yesaya 40:28) Simanö göi ba zura Yuda, ifatunö wa no ”iʼotarai me föna” so Lowalangi.​—Yuda 25.

Ayati daʼö zangoroma’ö wa Lowalangi andrö ”Razo götö-götö waʼara” simane niwaʼö zinenge sotöi Faulo ba zura 1 Timoteo 1:17. Eluahania, hewaʼae na tafuli furi ginötö, hasambalö so Lowalangi. Ba lö tebulö so ia irugi zi lö aetu. (Fama’ele’ö 1:8) Börö da’ö, faʼalötebulönia sagötö faʼara, daʼö dane-dane gamuata Wondrege Zabölö.

Hana wa abua khöda wangi’ila daʼa? Börö me lö arara waʼaurida, ba faböʼö sibai wangeraida inötö moroi ba wangerai Lowalangi. Börö me so manö irugi zi lö aetu Lowalangi andrö, ba wamaiginia si saribu fakhe ha amaedola zi maʼökhö. (2 Fetero 3:8) Duma-dumania: Fa’ara waʼauri gao mazui tamo, ha 50 hari. Hadia aboto ba dödönia waʼaurida ya’ita niha si 70 mazui sirugi 80 fakhe? Tatu manö löʼö! Ifatunö khöda Sura Niʼamoniʼö wa yaʼita andre hulö damo ba wamaigi Zomböi yaʼita Sebua Lakhömi. Mendrua manö saʼae wangera-ngerada, no aröu fabö’ö moroi ba lala wangera-ngera Lowalangi. (Yesaya 40:22; 55:8, 9) Andrö lö ahöli-höli dödöda na so zi lö ikhamö fangera-ngerada yaʼita niha sanandrösa ba wetaro Yehowa.

Sindruhunia, fatema ba dödöda hewaʼae na abua khöda wangiʼila sanandrösa khö Lowalangi si lö tebulö sagötö faʼara. Na so danö böʼö samazökhi Lowalangi, tatu manö lafotöi niha daʼö Somböi. Hiza’i, ifatunö khöda Sura Niʼamoniʼö, ha Lowalangi Yehowa ”zamazökhi fefu hadia ia.” (Fama’ele’ö 4:11) Baero daʼö, aboto ba dödöda ba wamobörö wa lö hadöi banua si yawa awö danö. (1 Moze 1:1, 2) Hezo moroi mbörötania? Tatu oföna so ua zamazökhi. Oföna so ia moroi khö ndra malaʼika sogonekhe hegöi Ononia si ha sambua. (Yobi 38:4, 7; Kolose 1:15) Ba daʼa taʼila, wa ha yaʼia zi oföna so. Lö hadöi samazökhi yaʼia; lö hadöi si so fönania, andrö wa lö hadöi somböi yaʼia.

Börö me tefazökhi ita hegöi banua si yawa awö danö, daʼö dandra wa so Lowalangi si lö tebulö sagötö faʼara. Iʼotarai mböröta, no so zamatörö fefu zi so ba mbanua si yawa awö danö, sameʼe amakhoita ba wamatörö fefu hadia ia. Ha yaʼia zi tola mameʼe faʼauri ba ngawalö hadia ia.​—Yobi 33:4.