Hadia no irai so ba wangera-ngerau wanofu simanö? Na simanö tenga ha yaʼugö zimane daʼö. Niha ba zi sagörö ulidanö oya zi nofu dödöra sanandrösa ba waʼauri. Hadia tola ösöndra wanema linia?

Ato niha sangumaʼö, ”Tola!” Hadia mbörö? Börö me no lasöndra wanema li si faudu ba dödöra moroi ba Zura Niʼamoniʼö. Hadia omasiʼö öʼila nösi Zura Niʼamoniʼö? Na omasiʼö, tola öfahaʼö ndraʼugö khö ndra Samaduhuʼö Yehowa, lö muʼandrö gefe. *

Ato niha sangumaʼö, ”Lö inötögu” ba wamahaʼö ba Zura Niʼamoniʼö.” ”Abua ae.” ”Lö omasido abakha ba dödögu daromali.” So göi zomasi. Omuso dödöra me laʼila hadia nifahaʼö Zura Niʼamoniʼö. Tandraigö baso zalua khöra:

• ”No möi ndraʼo ba gosali Katolik, ba gosali Protestan, ba agama Buda, ba sekola wandrita. Hizaʼi, fanofugu sanandrösa khö Lowalangi lö nisöndragu fanema li. So Zamaduhuʼö Yehowa si möi ba nomo khögu. Ahöli dödögu me labeʼe wanema li si tefaudu ba dödö moroi ba Zura Niʼamoniö, andrö wa ufahaʼö ndraʼo.”—Gill, England.

• ”Oya wanofugu sanandrösa ba waʼauri andre, lö tefaudu ba dödögu wanema li pastor ba gosali. Faböʼö wanema li ndra Samaduhuʼö Yehowa. Labeʼe wanema li ha moroi ba Zura Niʼamoniʼö. Me lawaʼö khögu fahaʼö ndraʼugö ba Zura Niʼamoniʼö, lö fatimba khögu.”—Koffi, Benin.

• ”Manofu-nofu dödögu hewisa niha si no mate. Faduhu dödögu wa tola ifakao niha sauri si no mate, tobali omasido uʼila hadia niwaʼö Zura Niʼamoniʼö. Andrö ubörögö ufahaʼö ndraʼo ba Zura Niʼamoniʼö khö nawögu, samösa Samaduhuʼö Yehowa.”—José, Brazil.

• ”Ubaso-baso Zura Niʼamoniʼö, tobali lö uʼila geluaha. So samösa Zamaduhuʼö Yehowa simöi khögu. Itutunö sanandrösa nifaʼeleʼö Zura Niʼamoniʼö. Omasido uʼila hadia nasa zinangea ufahaʼö yaʼo.”—Dennize, Mexico.

• ”Lö faduhu dödögu wa iʼosinangegö ndraʼo Lowalangi. Andrö wa mangandrö ndraʼo khö Lowalangi samaʼanö Sura Niʼamoniʼö. Mahemolunia, so Zamaduhuʼö Yehowa itoko mbawandruhö nomogu, ba ubörögö ufamaha ndraʼo ba Zura Niʼamoniʼö.”—Anju, Nepal.

Fefu zalua andre daʼö zamasugi ba dödöda niwaʼö Yesu, ”Yaʼahowu niha saboto ba dödö wa moguna gö wamati” (Mataiʼo 5:3, Terjemahan Dunia Baru.) Fefu niha omasi ira aboto ba dödöra Lowalangi. Ha Lowalangi zi tola mamönökhi somasi dödöra andrö, iʼodela Zura Niʼamoniʼö ba wa malua yaʼia.

Hewisa wamahaʼö ba Zura Niʼamoniʼö andrö? Hadia gunania? Fanema li, so ba ngaʼörö aefa daʼa.