1. Hana wa moguna tarorogö wahuwusada khö Yehowa?

 ME SAMADUHUʼÖ Yehowa ndraʼugö, daʼö mbörö wa fahuwu ami. Ba daʼö no fondrege zebua böli. Hizaʼi, ulidanö tana khö Gafökha awö wa lö moʼahonoada, lö tarasoi wa tobali famandrö-ndröuda khö Yehowa. Andrö wa moguna tarorogö wahuwusada khönia.

2. (a) Hadia geluaha wahuwusa? (Faigi nisura ba gahe zura.) (b) Hewisa enaʼö itugu tedou wahuwusada khö Yehowa?

² Hadia tafaogö-faogö Yehowa ba waʼaurida? Hadia öbaliʼö ia si fahuwu khöu? Hadia omasiʼö itugu ahatö ami nasa? Yakobo 4:8 imane, ”Miʼondrasi Lowalangi, ba iʼondrasi ami.” Faoma so nifaluada enaʼö tola so wahuwusa. * Na öʼofönaiʼö ndraʼugö wahuwusa khö Yehowa, hasambalö ahatö ia khöu. Na itugu öfalua daʼö, itugu oroma Yehowa ba waʼauriu, itugu tedou wahuwusami. Na simanö, örasoi göi simane nirasoi Yesu me iwaʼö, ’Si  ndruhu-ndruhu wa so zamatenge yaʼo’, ba ”yaʼo zangila yaʼia”. (Yohane 7:28, 29) Hadia manö lala enaʼö fahuwu ita khö Yehowa?

3. Hewisa lala wahuhuosada khö Yehowa?

³ Na omasiʼö itugu tedou wahuwusau khö Yehowa, böi aetu fahuo-huo ami. Hewisa lalania? Na so nawöu si toröi ba mbanua saröu, hewisa lala enaʼö tola fahuhuo ami? Tola öfaʼoheʼö khönia zura mazui asese fahuhuo ami ba telefo. Simanö göi ita tola ta aseseʼö fahuhuo khö Yehowa ba wangandrö. (Baso Zinunö 142:3.) Tobali, hewisa watola örongo li Yehowa? Yaʼia daʼö na lö aetu tabaso daromalinia ba tafatou-tou tödöda. (Baso Yesaya 30:20, 21.) Datafahaʼö ita hadia mbörö wa fahuhuosa simane daʼö tola aro wahuwusada.

4, 5. Ba ginötö tafahaʼö ita ba Zura Niʼamoniʼö, hewisa wa tola fahuhuo khöda Yehowa? Beʼe duma-duma.

⁴ Fao dödöda wa fefu nösi Zura Niʼamoniʼö turia moroi khö Lowalangi sofeta ba niha. Ba hadia tola ihatöʼö ndraʼugö khö Lowalangi Sura Niʼamoniʼö andrö? Tatu manö! Ero na öbaso Zura niʼamoniʼö mazui na öfahaʼö ndraʼugö khönia, tandraigö faigi hewisa dödöu ba nibasomö andrö. Aefa daʼö, angeraigö hewisa wamalua yaʼia ba waʼauriu. Simane daʼö lala wa mondrongo li Yehowa. Na simane daʼö, itugu ahatö ndraʼugö khönia ba tola tobali ia si fahuwu khöu sanolo yaʼugö.—Heberaiʼo 4:12; Yakobo 1:23-25.

⁵ Duma-dumania, hewisa dödöu me öbaso wehede Yesu me iwaʼö, ”Böi mihöna khömi girö-girö ba gulidanö”? Na öʼofönaiʼö wangalui banua Lowalangi, faduhu dödöu wa omuso dödö Yehowa. Tobali, na lö nifaluamö awena öʼila wa moguna öʼalösi gisö-isö dödöu, ba öʼofönaiʼö wangalui somasi Lowalangi. Daʼö lala wanolo Yehowa enaʼö so khöu waʼaboto ba dödö hewisa lala wahuwusa khönia.—Mataiʼo 6:19, 20.

6, 7. (a) Ba hadia lua-luania na tafahaʼö ita ba Zura Niʼamoniʼö? (b) Hadia gohitö dödöda na tafahaʼö ita ba Zura Niʼamoniʼö?

⁶ Atulö wa baginötö tafahaʼö ita ba Zura Niʼamoniʼö, taʼila hadia zinangea  tabulöʼö bawangera-ngerada enaʼö tola möi ita enoni Yehowa. Baero daʼö, taʼila göi gamuatania sebua faʼomasi ba amuatania tanö böʼö sadöni dödöda. Na itugu tedou waʼomasida khönia itugu tedou waʼomasinia khöda göi. Lua-luania itugu fahuwu ita khönia.—Baso I Korindro 8:3.

⁷ Na omasi ita ahatö khö Yehowa, akha sökhi gohitö dödöda ba wamahaʼö ba Zura Niʼamoniʼö. Imane Yesu, ”Daʼö waʼauri si lö aetu, enaʼö aboto ba dödöra ndraʼugö, Lowalangi si ndruhu andrö, si ha sambua, ba enaʼö aboto ba dödöra zinengeu andrö, Yesu Keriso.” (Yohane 17:3) Si ndruhu wa oya zawena taʼila ba sadöni dödöda ba ginötö tafahaʼö ita ba Zura Niʼamoniʼö, tobali sabölö sökhi na ohitö dödöda enaʼö itugu aboto ba dödöda haniha Yehowa andrö.—Baso II Moze 33:13; Zinunö 25:4.

8. (a) Hadia manö niwaʼö niha me ihuku Gasaria Yehowa? (b) Na no aboto ba dödöu haniha Yehowa, hewisa dödöu ba nifaluania andrö?

⁸ Na si fahuwu khöda Yehowa, lö ide-ide dödöda na lö ifatunö hadia mbörö na so nifaluania. Duma-dumania, ba ginötö tobali razo Gasaria ba mado Yuda, lasömba nadu ono mbanuania. Lö iʼoʼö zimane daʼö Gasaria. ”Ba somasi Yehowa ilau.” (II Razo 15: 1-5) Hizaʼi, tehuku Gasaria göna ia bou auri. Hadia mbörö? Lö taʼila sibai hadia mbörönia. Hewisa moloʼö tödöu? Hadia ide-ide dödöu mazui fasala ia me ihuku Gasaria Yehowa lö börö-börö? Löʼö. Na no aboto ba dödöu haniha Yehowa, faduhu dödöu wa so mbörö wa tola ibeʼe hukuma. Ibeʼe wotu ha ”ndrohu-ndrohu”. (Yeremia 30:11) Hewaʼae lö öʼila hadia mbörö wa ihuku Gasaria Yehowa, faduhu dödöu wa atulö nifaluania.

9. Hana wa tola aboto ba dödöda hadia mbörö wa ihuku Gasaria Yehowa faoma bou auri?

⁹ No idunö-dunö khöda Sura Niʼamoniʼö sanandrösa ba waʼauri Razo Gasaria, mazui sotöi Usia. (II Razo 15:7, 32) Nidunö-dunö ba II Ngaʼötö 26:3-5, 16-21 iʼombakhaʼö wa ”somasi Yehowa ilau”. Tobali furi daʼö, ”fayawa dödönia, famakiko”. Ihalö halöwö gere si tenga sinangea ifalua. Ŵalu ngafuluʼasara gere zo tegu yaʼia. Ba hadia nifaluania? Börö wayawasa dödönia, mofönu ia khöra! Me no tarongo zimane daʼa, itugu aboto ba dödöda hana wa mofönu Yehowa khö Gasaria ba ibözi ia bou auri.

10. (a) Hadia mbörö wa lö manofu-nofu dödöda ba ngawalö nifalua Yehowa? (b) Hewisa enaʼö lö mamalö-malö faduhu dödöda wa si ndruhu fefu nifalua Yehowa?

¹⁰ Hadia zi tobali famahaʼö khöda? Ba hikaya Gasaria taʼila hadia mbörö wa ihuku ia Yehowa. Tobali, hewisa na lö nitutunö Zura Niʼamoniʼö khöda hadia mbörö na so zalua hadia ia? Hadia ömane dödöu fasala nifaluania? Mazui faduhu manö dödöu wa si ndruhu nifaluania andrö hewaʼae lö ahori öʼila fefu? (V Moze 32:4) Na itugu aboto ba dödöu haniha Yehowa, itugu tedou waʼomasimö khönia ba itugu faduhu dödöu khönia. Daʼö mbörö wa lö manofu-nofu dödöda ero na so nifalua Yehowa. Na lö öbato wamahaʼö yaʼugö ba Zura Niʼamoniʼö, itugu oroma khöu wa so Yehowa ba itugu fahuwu ami.—Zinunö 77:13, 14.

11-13. Hana wa faduhu dödöu wa ifondro-ndrongo Yehowa wangandröda? (Faigi gambara ba ngaʼörö 19.)

¹¹ Tahatöʼö ita khö Yehowa ba wangandrö. Tasuno ia, mangandrö saohagölö ita khönia, ba taʼandrö wanolo khönia. (Zinunö 32:8) Na omasiʼö fahuwu khö Yehowa, yafaduhu dödöu wa ifondro-ndrongo wangandröu.

¹² So zangumaʼö lö ifondro-ndrongo wangandröda Lowalangi. Moloʼö fangera-ngerara, fangandrö andrö ha enaʼö so waʼahono dödö. Faduhu dödöra wa fangandrö, ha enaʼö tola so khöra waʼohahau dödö na so gabula dödö ba enaʼö tola molala dödöra. Tola göi simane daʼö nifotöi fangandrö. Hizaʼi, ba ginötö fahuhuo ita khö Yehowa, si ndruhu-ndruhu wa ifondro-ndrongo khöda. Hana wa faduhu dödöu?

¹³ Tandraigö angeraigö: Fatua lö möi Yesu ba gulidanö, iʼila hewisa wanema Yehowa fangandrö zawuyunia. Me möi Yesu ba gulidanö, mangandrö ia khö Namania ifatunö hewisa nösi dödönia. No irai mangandrö ia sara wongi waʼara. (Luka 6:12; 22:40-46) Hadia ifalua zimane daʼö Yesu na iʼila wa lö ifondro-ndrongo wangandrönia Yehowa? Aefa daʼö ifahaʼö göi ndra nifahaʼönia ba wangandrö. Hadia omasi ia ifahaʼö ira na iʼila lö ifondro-ndrongo Yehowa? Ba daʼö taʼila wa iʼila Yesu wa ifondro-ndrongo wangandröda Yehowa. Imane wangumaʼö khö Namania, ”lö mamalö-malö wa öfondro-ndrongo ligu.” (Yohane 11:41, 42) Faduhu göi dödöda wa ifondro-ndrongo wangandröda Yehowa.—Zinunö 65:3.

14, 15. (a) Na so nizara-zarada ba wangandrö khö Yehowa, hadia gunania khöda? (b) Hewisa wangandrö Yuni tola itugu ahatö ia khö Yehowa?

¹⁴ Itaria lö taʼila wa no tatema wangandröda. Tobali na ötötöi zoguna khöu ba wangandrö khö Yehowa, ba  daʼö tola öʼila hewisa wotemania fangandröu, ba itugu oroma ia khöu. Na ödunö-dunö khönia gabula dödöu, ba ahatö ia khöu.

¹⁵ Duma-dumania, Yuni * asese möi ia manuriaigö, si ndruhunia lö omasi ia. Imane wangumaʼö, ”Lö omasido manuriaigö. Si ndruhu-ndruhu wa lö omasido.” Me no tebato ia wohalöwö, ifarou dödönia samösa satua sokubaloi enaʼö ihalö perintis biasa. Imane, ”Iʼameʼeʼö khögu garate nifoʼösi. Uhalö gangetula wangai perintis biasa, ero maʼökhö uʼandrö khö Yehowa wanolo enaʼö omasido wanuriaigö.” Hadia ifondro-ndrongo wangandrögu? Me irugi tölu fakhe merintis ia, itutunö, ”Börö me asese möido manuriaigö ba fao-fao ndraʼo khö ndra talifusö tanö böʼö, itugu toʼölö ndraʼo ba wanuriaigö. Iadaʼa tenga ha omasido wanuriaigö, tobali owölö-ölö sibai ndraʼo wamalua yaʼia. Fokonia, abölö aro wahuwusagu khö Yehowa iadaʼa moroi meföna.” Fangandrö Yuni si ndruhu-ndruhu daʼö zanolo yaʼia enaʼö ahatö khö Yehowa.

16, 17. (a) Hadia zinangea tafalua enaʼö itugu tedou wahuwusada khö Yehowa? (b) Hadia nifatunöda ba migu fönada?

¹⁶ Tola ahatö ita khö Yehowa sagötö faʼara. Andrö tafondro-ndrongo linia na tafahaʼö ita ba Zura Niʼamoniʼö, ba böi mamalö-malö mangandrö ita khönia. Lua-luania itugu tedou wahuwusada khönia ba tola tataögö na so wanandraigö.

¹⁷ Tobali, hewaʼae asese mangandrö ita khö Yehowa, lö iʼanemai tebato gabula dödöda. Na alua zimane daʼö, ibörögö so khöda waʼambö famati, wa lö ifondro-ndrongo wangandröda Yehowa, ba manofu-nofu dödöda hadia si ndruhu si fahuwu khönia ita. Na simane daʼö hadia zinangea tafalua? Ba wamahaʼö migu fönada so wanema li.