1-3. Hana wa faduhu dödö Waulo khö Yehowa? (Faigi gambara ba ngaʼörö si 24.)

 TOLA teʼala na tobali ndraʼugö niha keriso ba götö Roma meföna. Lafakao niha keriso banua Roma meföna. Lafaluʼigö khöra wanunu banua Roma ba laböbögö khöra zi lö duhu wa fatuwu ira niha. Ato ndra talifusöda ni beʼe ba gurunga. Tanö böʼönia lafasawiʼö ba gutu ndruʼu, so göi niʼosö ba döla geu, ba latunu auri labaliʼö sulura ba zibongi. Na so ndraʼugö meluo daʼö, tola göna khöu zimanö.

² Meluo daʼö ba gurunga so Waulo. Meʼawena labeʼe ba gurunga Waulo, samösa lö sanolo yaʼia. Hizaʼi, itolo ia Yesu. Isura Faulo, ”Ba no faʼawö khögu Zoʼaya, ba no iʼabölöʼö ndraʼodo.” Ibeʼe Yesu waʼabölö khö Waulo. Irege isura Faulo no ”teʼefaʼö ndraʼo ba mbawa zingo.”—II Timoteo 4:16, 17. *

 ³ Itörö tödö Waulo wanolo Yehowa yaʼia. Daʼö zangabölöʼö yaʼia. Lafaduhuʼö khönia wa itolo ia Yehowa ba wanaögö famakao iadaʼa hegöi ba zi so föna. Faduhu sibai dödönia irege isura, ”Ba iʼefaʼö dania ndraʼo Soʼaya ba nifakhai dödö andrö, si lö sökhi, fefu.” (II Timoteo 4:18) Aboto ba dödö Waulo hewaʼae tebai la tolo ia ira talifusö ba wamakaonia, faduhu dödönia wa itolo ia Yehowa hegöi Yesu. Lö mangiwa dödönia.

4, 5. (a) Haniha zi lö faröi ba wanolo yaʼita? (b) Hewisa wangaʼaroʼömö fahuwusau khö Yehowa?

⁴ Hadia no irai so gabula dödöu mazui hulö na si lö awö ndraʼugö? Aheta ndraʼugö ba halöwöu, ma abula dödö salua ba zekola, mazui göna ndraʼugö fökhö sabölö-bölö, ma fanandraigö tanö böʼö. Noʼöʼandrö wanolo ba niha böʼö, ba afatö dödöu me tebai la tolo ndraʼugö. Atulö, so gabula dödö si tebai laʼasiwai niha gulidanö. Hadia ni faluau? Imane Sura Niʼamoniʼö ”Döna-döna khö Yehowa”. (Gamaedola 3:5, 6) Hadia faduhu dödöu waʼitolo ndraʼugö Yehowa? Yaʼia, oya duma-duma ba Zura Niʼamoniʼö zamaduhuʼö tödöda wa si ndruhu-ndruhu itolo mbanuania Yehowa.

⁵ Böi abao dödöu na lö hadöi sanolo yaʼugö ba ginötö so gabula dödöu. Tobali, oʼö duma-duma nibeʼe Waulo, ba dödönia na so wanandraigö daʼö ginötö wangoromaʼö faʼafaduhu dödö khö Yehowa. Daʼa göi ginötö si tola tarasoi wa iʼameʼegö tödö ndraʼugö. Na simanö, itugu tedou waʼafaduhu dödöu khönia ba itugu aro wahuwusami.

6. Hana wa itaria ambö faduhu dödöda khö Yehowa ba ginötö so gabula dödö?

⁶ Te so gabula dödö sameʼe afatö dödöu. No öforege wanaögö, ba no öʼandrö wanolo khö Yehowa. Hadia tola ahono dödöu iadaʼa börö mefaduhu dödöu wa itolo ndraʼugö Yehowa? Tola! (Baso Zinunö 62:9; I Fetero 5:7.) Naʼomasiʼö sökhi gamakhaitami Yehowa, moguna öfahaʼö ndraʼugö ba waʼafaduhu dödö khönia. Tobali, hana wa lö aoha wamalua daʼö? Börö me lö iʼanemai ibeʼe gangandröwada Yehowa.—Zinunö 13:2, 3; 74:10; 89:47; 90:13; Habakuki 1:2.

7. Hana wa lö iʼanemai ibeʼe gangandröwada Yehowa?

⁷ Hana wa lö iʼanemai ibeʼe gangandröwada Yehowa? Sura Niʼamoniʼö zangumaʼö, Yehowa simane ama ba ndraononia. (Zinunö 103:13) Lö iʼanemai ibeʼe ama na so niʼandrö nononia. Iʼila wa tola faböʼö zui dania niʼandrö nononia. Iʼila göi hadia niʼandrö nononia tola abu dödö niha tanö böʼö dania. Iʼila hadia zinangea moguna khö nononia ba hawaʼara tola ibeʼe. Na iʼoʼö fefu ama ni andrö nononia, tobali ia ngoni-ngoni nononia. Iʼomasiʼö ita amada, Yehowa. Me no somböi satua-tua ia, iʼila hadia zoguna khöda, ba iʼila hawaʼara ibeʼe gangandröwa dödöda. Andrö baga na tabaloi, ba da tafaigi hewisa  waʼmeʼe Yehowa angandröwada.—Fatimbaisi Yesaya 29:16; 45:9.

8. Hadia nifabuʼu Yehowa na tebai tataha wanandraigö?

⁸ Moguna aboto ba dödöda wa iʼila Yehowa hadia zi tola tafalua ba zi tebai. (Zinunö 103:14) Andrö, ibeʼe khöda waʼabölö sinangea moguna khöda. Itaria tebai tataögö göi. Tobali, no ifabuʼu Yehowa, na iʼila tebai tatögö hasambalö ifo lala. (Baso I Korindro 10:13.) Terara dödöda me taʼila wa aboto ba dödö Yehowa hadia zi tola tataögö ba hadia zi tebai.

9. Hadia nifaluada na lö iʼanemai ibeʼe niʼandröda Yehowa?

⁹ Na no mangandrö ita khö Yehowa ba lö iʼanemai ibeʼe, moguna tabaloi. Törö tödöu wa omasi sibai Yehowa wanolo yaʼita, hizaʼi ibaloi ginötö si sökhi ba wameʼe niʼandröda. Imane Sura Niʼamoniʼö, ”Andrö ifogasa Yehowa wangebua tödö khömi, andrö wa ahou dödönia wangahakhösi tödö yaʼami. Lowalangi ba waʼatulösa Yehowa. Yaʼahowu dozi sanötöna khönia.”—Yesaya 30:18.

10-12. (a) Hadia gabula dödö nirasoida na tarorogö nösi nomoda sofökhö? (b) Na faduhu dödöu khö Yehowa ba ginötö so gabula dödö, hewisa gamakhaitau khönia? Beʼe duma-duma.

¹⁰ Tola manö ebua gabula dödö si göna yaʼugö irege hulö zi so ba ”mbawa zingo” ndraʼugö simane Faulo. (II Timoteo 4:17) Na alua zimane daʼö, moguna sibai faduhu dödöda khö Yehowa. Duma-dumania, na örorogö nösi nomou si göna fökhö sabölö-bölö. Mangandrö ndraʼugö khö Yehowa enaʼö tola öhalö gangetula si sökhi ba enaʼö ibeʼe khöu waʼabölö. * Ohahau dödöu iadaʼa börö meʼitörö tödöu wa iʼameʼegö tödö ndraʼugö Yehowa ba aboto ba dödönia hadia zalua khöu.—Zinunö 32:8.

¹¹ Tola manö hulö lö itolo ita Yehowa. Angetula nihalö doto tola faböʼö moroi ba nitahö dödöda. Mazui ödöna-döna wa la rara dödöu ira talifusö ba waʼaniha, tobali nifaluara lanönö gabula dödöu. Böi böhöli wangandrö faʼabölö khö Yehowa ba hatöʼögö khönia. (Baso I Zamueli 30: 3, 6.) Na no aboto ba dödöu wa no itolo ndraʼugö Yehowa, itugu aro wahuwusau khö Yehowa.

¹² Daʼö nirasoi ga Lindra. * Ba zi haʼuga fakhe waʼara irorogö zatuania irege ba gafuriatania mate. Imane wangumaʼö, ”Sagötö fondrorogögu yaʼira, foʼomogu, gaʼagu ono matua, ba yaʼo samösa, asese lö maʼila hadia zinangea mafalua. Hulö na lö faʼabölöma. Ba na itörö-törö tödöma, awena maʼila wa lö niröi Yehowa yaʼaga. Iʼabölöʼö ndraʼaga, ibeʼe zoguna khöma, he waʼae hulö na si lö lala.”

13. Börö me faduhu dödö Rondra khö Yehowa, hewisa wa tola itaögö fefu gabula dödö si fatete manö?

¹³ Nafaduhu dödöda khö Yehowa, daʼö zi tola manolo yaʼita na so gabula dödö si lö mudöna-döna. Daʼö nirasoi Rondra. Iröi ia foʼomonia si tenga  Samaduhuʼö Yehowa. Ba ginötö daʼö göi göna fökhö sabölö-bölö dalifusönia ono matua. Haʼuga waŵa aefa daʼö mate woʼomo dalifusönia ono matua no mege. Me no ibörögö terara dödönia ba zalua andrö, awena ihalö perintis biasa. Lö ara aefa daʼö mate ninania. Hana wa tola itaögö fefu gabula dödö daʼa? Imane wangumaʼö, ”Lö ubato wolohe fefu ba wangandrö khö Yehowa ero maʼökhö iʼoroi wondrege zide-ide. Börö me ufalua daʼö, awena urasoi wa fao-fao khögu Yehowa. Awena ufahaʼö ndraʼo wangodaligö Yehowa tenga uʼodaligö niha ma tödögu samösa. Ba si ndruhu-ndruhu urasoi wanolonia. Fefu zoguna khögu ibönökhi. Lua-luania, urasoi wa falulu fohalöwö khögu Yehowa.”

14. Hewisa wanolo Yehowa yaʼugö na so nösi nomou niʼefasi?

¹⁴ Angeraigö gabula dödö tanö böʼö. Tamane so samösa nösi nomou si no laʼefasi ba gangowuloa. No göi aboto ba dödöu hadia niwaʼö Zura Niʼamoniʼö ba niha si no laʼefasi moroi ba gangowuloa wa tebai fariawö ita khöra. (I Korindro 5:11; II Yohane 10) Tobali, börö waʼomasimö khönia, abua khöu ba woloʼö goi-goi Zura Niʼamoniʼö. Hadia faduhu dödöu khö Yehowa wa ibeʼe khöu waʼabölö ba woloʼö oroisania? Hadia salua andre tola möi famahatöu khö Yehowa?

15. Hana wa lö iʼoʼö niwaʼö Yehowa Adamo?

¹⁵ Angeraigö zalua ba niha siföföna, Adamo. Hadia lö iʼila Adamo na isawö goroisa Yehowa ba mate ia? Iʼila,  börö me iwaʼö Sura Niʼamoniʼö ”tenga Adamo nifaelungu” (I Timoteo 2:14) Hana wa lö iʼoʼö? Iʼa mbua geu ni beʼe ngambatönia, börö me abölö iʼomasiʼö ngambatönia moroi khö Yehowa. Iʼoʼö niwaʼö woʼomonia tenga niwaʼö Yehowa.—I Moze 3:6, 17.

16. Haniha zabölö taʼomasiʼö ba hadia mbörö?

¹⁶ Salua khö Gadamo andrö zi tobali famahaʼö khöda wa abölö taʼomasiʼö Yehowa moroi ba nawöda niha. (Baso Mataiʼo 22:37, 38) Na ebua waʼomasida khö Yehowa, tola möi fanolo nösi nomoda si no laʼefasi. He na möi ira ba gangowuloa hegöi na löʼö. Andrö abeʼeʼö wamati ba faʼomasiu khö Yehowa. Na abu dödöu me no laʼefasi nösi nomou moroi ba gangowuloa, tutunö khö Yehowa nösi dödöu ba wangandrö. * (Roma 12:12; Filifi 4:6, 7) He na abu sibai dödöu, salua andre baliʼö fangaro wahuwusau khö Yehowa. Na öfalua zimane daʼö, itugu tedou waʼafaduhu dödöu khö Yehowa ba sökhi lua-luania.

17. Hadia guna na owölö-ölö ita wanuriaigö?

¹⁷ Hana wa iʼefaʼö Waulo moroi ba ”mbawa zingo” Yehowa? Imane Faulo, ”Enaʼö uʼasiwai wangombakha andrö.” (II Timoteo 4:17) No göi ibeʼe halöwöda Yehowa ba wangombakha ”turia somuso dödö” ba ifotöi ita ”sanolo ba halöwö khö Lowalangi.” (I Tesalonika 2:4; I Korindro 3:9) Na owölö-ölö sibai ita wamalua halöwö daʼa, faduhu dödöda wa ibönökhi fefu zoguna khöda Yehowa. (Mataiʼo 6:33) Ba so khöda wombaloi hawaʼara ibeʼe niʼandröda Yehowa.

18. Hewisa wangaʼaroʼö fahuwusau khö Yehowa, ba enaʼö abölö faduhu dödöu khönia?

¹⁸ Aʼaroʼö wahuwusau khö Yehowa ero maʼökhö. Na so wanandraigö si göna yaʼugö si tola mamangiwa tödöu, ogunaʼö ginötö daʼö ba wangahatöʼö yaʼugö khö Yehowa. Baso, fahaʼögö, ba fatou-tou tödöu Daromali Lowalangi. Böi mamalö-malö angandrö khö Yehowa ba ya owölö-ölö ndraʼugö wanuriaigö. Na öfalua daʼö, tola faduhu dödöu wa itolo ndraʼugö Yehowa ibeʼe khöu waʼabölö ba wanaögö fefu ngawalö gabula dödö salua iadaʼa hegöi ba zi so miföna.