Melani: Yahowu ina. Omuso dödögu me no faluka ita ba wanönörö tödö faʼamate Yesu me migu si lalö. * Hewisa dödöu me luo daʼö?

Susan: Baga wö sa andrö. Awaiʼi lö ubiniʼö, lö aboto ba dödögu huhuo nifaʼema meluo daʼö. Niʼilagu ha fanörö tödö faʼatumbu Yesu ba femaosonia nifotöi fasa. Tobali na fanörö tödö faʼamatenia lö irai urongo.

Melani: Atulö, sasese laʼowasaini niha ba zi sagörö ulidanö ha faʼatumbu ba femaosonia. Tobali na yaʼaga Samaduhuʼö Yehowa moguna sibai khöma wanörö tödö faʼamate Yesu. Na so ginötöu hadia tola fahuhuo ita?

Susan: Tola bale.

Melani: Börö daʼö ina, wa latörö tödö waʼamate Yesu ira Samaduhuʼö Yehowa börö me no iʼoroisi Yesu khö ndra nifahaʼönia me bongi fatua lö mate ia. Hadia itörö tödöu me falulu manga Yesu khö ndra nifahaʼönia?

Susan: Makasumö Femanga gö Niʼamoniʼö ba?

Melani: Atulö ina. So göi zangumaʼö bongi watomesa zoʼaya. Meluo daʼö ibeʼe goroisa Yesu khö ndra nifahaʼönia. Tesura ia ba Luka 22:19. Tola tabaso ba?

Susan: Lau. ”Ihalö roti, iʼaohasi gölö Lowalangi, iboboto roti ba ibeʼe khöra, imane: Botogu daʼe, nibeʼe salahimi; mitörö-törö tödömi ndraʼo, ba zi mane.”

Melani: Saoha gölö ina, datafaigi niwaʼö Yesu ba gafuriata ayati andre, ”Mitörö-törö tödömi ndraʼo ba zimane.” Ba ngawua wehede si oföna mege, itutunö Yesu hadia mbörö wa lö tola löʼö lafalua. Imane wangumaʼö, ibeʼe nosonia salahi niha sato. Simanö göi niwaʼönia ba Mataiʼo 20:28. Imane ayati daʼö, ”Si mane Ono Niha, tenga si möi mangoni, no si möi enoni, si möi mameʼe nosonia höli zato.” Daʼö mbörö wa lafalua wanörö tödö faʼamate Yesu ira Samaduhuʼö Yehowa börö höli ni beʼe Yesu. Ba faʼamatenia tola möi fangorifi niha samati.

Susan: Asese urongo wamate Yesu ba wangöhöli yaʼita. Si ndruhunia lö aboto ba dödögu geluahania.

Melani: Tenga hayaʼugö zi lö mangila eluahania ina. Sanandrösa ba höli andrö abua wangalui eluahania. Hizaʼi, daʼa sambua famahaʼö sindruhu sabölö sökhi moroi ba Daromali Lowalangi. E . . . hadia so ginötöu nasa?

 Susan: Tola bale maʼifutö.

Melani: Lau, na simanö tola tatohugö. Awena ubaso me haʼuga bongi sanandrösa ba höli andrö. Daʼututunö he.

Susan: Lau.

Melani: Enaʼö aboto ba dödöda nifotöi höli andre, moguna aboto ba dödöda ua hewisa Gadamo faoma Khawa me no aekhu ira ba horö ba kabu Edena. Enaʼö taʼila da tabaso Roma 6:23. Hadia tola öbaso khöda?

Susan: Tola le. ”Luo horö sa, ba faʼamate, ba buala faʼebua dödö Lowalangi andrö, ba no faʼauri si lö aetu ba khö Keriso Yesu, Soʼaya yaʼita.”

Melani: Saoha gölö he. Da tafaigi sambu-sambua. Siʼoföna ngawua wehede ayati daʼö imane, ”Luo horö sa ba faʼamate.” Daʼa huku nibeʼe Lowalangi ba niha si föföna. Huku horö ba faʼamate. Ba wamobörö mege lö samalua horö. Moʼahonoa wamazökhi Adamo faoma Khawa mege, ba moʼahonoa göi dania nonora na tumbu. Na simanö, lö hadöi faʼamate. Adamo faoma Khawa hegöi ngaʼötönia tola lasöndra waʼauri si lö aetu sohahau dödö. Ba hadia lasöndra dania waʼauri si lö aetu?

Susan: Löʼö. No laʼa mbua geu nitegu Lowalangi ira Adamo faoma Khawa.

Melani: Atulö. Me inötö laʼa, no laʼosiwawöi Lowalangi. Andrö fasala ira. Mazui tamane, omasi ira enaʼö lö moʼahonoa, enaʼö aekhu ira ba horö. Angetula nihalöra aekhu ba waʼatekiko irugi ngaʼötöra.

Susan: Eluahania?

Melani: Duma-dumania simane daʼa. Hadia omasiʼö wamazökhi kue?

Susan: Omasido le! Daʼö halöwö somasido naʼi.

Melani: Duma-dumania, sokhöu tuanga kue sawena öʼöli. Lö fakhamö öfake noʼawai atoru, lua-luania tekiko. Na öfake manö tuanga kue daʼö, hadia zalua? Tekiko göi kuenia lö?

Susan: Tatumanö.

Melani: Simanö göi Gadamo faoma Khawa. Me luo lö laʼoʼö niwaʼö Lowalangi tobali ”tekiko” ira, ma fasala tobali niha si lö moʼahonoa. Börö me fatua lö soʼono ira lafalua horö, andrö wa fefu ngaʼötöra ”tekiko” eluahania me tumbu ira göna khöra horö. Na ba Zura Niʼamoniʼö, horö eluahania tenga ha na tafalua zala, tobali börö horö ondröita si fao khöda. Börö daʼö ina, hewaʼae lö nifaluada horö, duma-dumania lö nasa si tumbu ita, tobali börö me no lafalua horö ira Adamo faoma Khawa fefu ita no göna fangelifi, tobali si so horö ita, lö moʼahonoa, ba mate. Simane niwaʼö Roma 6:23, luo horö sa ba faʼamate.

Susan: Lö atulö zimane daʼö bale, Adamo ba Khawa zamalua horö ba yaʼita zi göna huku.

Melani: Atulö ina, na tafaigi lö baga zimane daʼö. Andrö börö me atulö nifalua Lowalangi, andrö wa ihuku Gadamo faoma Khawa hukuma faʼamate. Hizaʼi, yaʼita ngaʼötönia so wanötönada. No ibeʼe höli Lowalangi yaʼia Yesu Keriso enaʼö lö mate ita. Datafuli tafaigi ina ba Roma 6:23. Me no aefa wehede ”luo horö sa ba faʼamate,” so dohu-tohunia. ”Ba buala faʼebua dödö Lowalangi andrö, ba no faʼauri si lö aetu ba khö Keriso Yesu Soʼaya yaʼita.”  Börö me no mate Yesu tola aefa ita ba horö ba bawaʼamate. *

Melani: So nasa danö böʼö sinangae taʼila ina moroi ba ayati daʼa.

Susan: Hadia daʼö?

Melani: Imane ba ayati daʼa, ”Buala faʼebua dödö Lowalangi andrö ba no faʼauri si lö aetu ba khö Keriso Yesu.” Na Yesu nifakao, na Yesu zi mate, Yesu zameʼe faʼaurinia, hana wa iwaʼö ba ayati daʼa, ”Buala faʼebua dödö Lowalangi”? Hana wa lö iwaʼö ”buala faʼebua dödö Yesu”? *

Susan: Atulö, hadia mbörö ia andrö?

Melani: Lowalangi zamazökhi Adamo faoma Khawa. Me inötö lafalua horö si ndruhunia Lowalangi nilawara. Tatu manö waʼafökhö dödö Lowalangi me lalawa ia ononia andrö. Hizaʼi, iʼanemai ibeʼe lala khöra Lowalangi. * No iʼera-era enaʼö samösa Malaʼikania möi ba gulidanö tobali niha, ba mate tobali höli. Si ndruhunia, daʼa fefu moroi khö Lowalangi. Aefa daʼö, hana wa tawaʼö daʼa buala moroi khö Lowalangi. Hadia no irai ökhalaigö ina hewisa dödö Lowalangi me labunu nononia Yesu?

Susan: Lö irai ukhalaigö zimane daʼö.

Melani: Ufaigi mege föna nomomö ina so mai-mai ndraono, so khöu ndraono yaʼö?

Susan: So, samösa nono matua, ba samösa nono alawe.

Melani: Yesu andrö ono Lowalangi. Me yaʼugö satua, tandraigö angeraigö hewisa dödö Lowalangi me iʼila mate nononia. Khalaigö Lowalangi ba zorugo, ono niʼomasiʼönia so ba gulidanö, ifaigi-faigi me laraʼu nono niʼomasiʼönia, ladiloi mbawania, la böbözi ia. Ba gafuriata iʼila nononia andrö laʼosö ba döla geu mate ba waʼafökhö.

Susan: Atulö lö! Löʼirai ukhalaigö zimane daʼö, si ndruhu waʼafökhö dödö Lowalangi.

Melani: Atulö ina. Lö ikhamö fangera-ngerada wokhalaigö hewisa waʼafökhö dödö Lowalangi me luo daʼö. Hizaʼi, taʼila wa irasoi waʼafökhö, ba taʼila göi hadia mbörö waʼitehegö alua zimanö. Ba daʼö taʼila ina ba zura Yohane 3:16, sasese tarongo. Tola öbaso khöda ba?

Susan: Tola. Imane, ”Si manö sa waʼomasi Lowalangi nösi gulidanö, no ibeʼe Nononia andrö si ha sambua, enaʼö lö tekiko dozi samati khönia, enaʼö so khöra waʼauri si lö aetu.”

Melani: Saohagölö. Datafaigi zui ina wehede si oföna ba ayati daʼa imane, ”Si manö sa waʼomasi Lowalangi nösi gulidanö.” Daʼö ia ina faʼomasi. Börö waʼomasi Lowalangi wa ifatenge nononia ba gulidanö mate salahida. Höli nibeʼenia andrö si ndruhu-ndruhu tandra waʼebua waʼomasinia khöda. Börö daʼö ira Samaduhuʼö Yehowa owulo ira ba wanörö tödö faʼamate Yesu sakali ba zi döfi. Hadia aboto ba dödöu ina?

Susan: Saohagölö he, zi no öʼombakhaʼö khögu.