1, 2. Hadia zi no laʼila ira satua simöi ba mbanua niha keriso sakali önö waŵa?

 ARAKHAGÖ awai rafe ndra satua simöi ba mbanua niha keriso sakali önö waŵa faoma satua sokubaloi. Satua simöi ba mbanua niha keriso andrö iʼomasiʼö sibai ndra talifusöda si no erege tödö. So moroi ba gotalua ndra satua andrö zi no alawa döfi. Hewaʼae simanö, so sambua gabula dödönia. Isofu khö ndra talifusöda satua sokubaloi, ”Hadia zi no mifalua ba wamomaha ira talifusöda andre bakha ba gangowuloa niha keriso?” Itörö tödöra wa no irai ifarou ira satua simöi ba mbanua niha keriso me önö waŵa si lalö, enaʼö lafomaha ndra talifusöda tanö böʼö. Samösa zatua sokubaloi imane, ”Lö nifaluama.” Lamane göi sato, atulö.

 ² Na yaʼugö samösa zatua sokubaloi, te fagölö wanemau li. Ira satua simöi ba mbanua niha keriso laʼila wa ambö laʼodödögö wamahaʼö ira talifusöda tanö böʼö ba gangowuloa. Hewaʼae simanö, si ndruhu wa abua wamalua yaʼia. Hadia mbörö?

3. (a) Hadia niwaʼö Zura Niʼamoniʼö sanandrösa ba wamahaʼö niha tanö böʼö? Hana wamoguna khöda fefu wamomaha andre? (Faigi nisura ba gahe zura.) (b) Hadia mbörö wa abua khö ndra satua sokubaloi ba wamahaʼö niha tanö böʼö?

³ Yaʼami ira satua sokubaloi aboto ba dödömi wa moguna mifamaha ndra talifusöda tanö böʼö. * Miʼilasa wa moguna ato zi tobali sanolo ba wangaʼaroʼö ba bawangaʼasogö angowuloa si bohou dania. (Baso Yesaya 60:22.) Sura Niʼamoniʼö zangumaʼö wa moguna ’öfahaʼö dania niha böʼö.’ (Baso II Timoteo 2:2.) Atulö wa abua wamalua daʼö. Börö meʼoya ginötö niʼogunaʼömi ba wangalui soguna ba nösi nomo. Miʼangeraigö göi zoguna ba mbanua niha keriso ba halöwö tanö böʼö nasa. Tobali, datafaigi hana wamoguna tafahaʼö dalifusöda tanö böʼö.

4. Hana wa itaria lataha wamahaʼö talifusöda tanö böʼö ira satua sokubaloi?

⁴ Hana wa abua khö ndra satua sokubaloi wa meʼe inötöra ba wamahaʼö ira talifusöda? So zangumaʼö, ’So halöwö tanö böʼö sabölö aösö moroi ba daʼa, lö salania na tenga iadaʼa mufahaʼö ira.’ Hadia si ndruhu lö salania? Atulö so halöwö tanö böʼö sabölö aösö. Hewaʼae simanö, na ötaha-taha wameʼe famahaʼö khö ndra talifusöda, tola manö so gabula dödö dania ba gangowuloa niha keriso.

5, 6. Hadia zi tobali famahaʼö khöda ba nifalua zokhö moto?

⁵ Faigi duma-duma andre. Enaʼö lö tekiko moto, moguna mugati olinia ero inötö. Hizaʼi moloʼö sokhö moto abölö sökhi na fanikha zasese lafoʼösi, börö na lö fanikha lö mofanö motonia. Ba börö wa oya halöwönia, andrö iwaʼö tödönia sakalitö mugati olinia. Börö tola nasa mofanö motonia. Si ndruhunia tola so wangala. Na lö iʼaliokö wogati oli, alio ara hasambalö tekiko motonia. Lua-luania oya ginötö ba kefe iʼogunaʼö bawangaʼazökhi motonia. Hadia zitobali famahaʼö khöda?

⁶ Laʼaliokö wangasiwai halöwö sabölö moguna ira satua sokubaloi. Na lö lafalua daʼö, tola abu dödö mbanua niha keriso. Hulö simane sokhö moto samoʼösi fanikhania ero inötö, simanö göi zatua sokubaloi, enaʼö ’laʼila latimba tödöra hadia zi sökhi.’ (Filifi 1:10) Hizaʼi, so zatua sokubaloi sarörö ba halöwö tanö böʼö irege lö hadöi inötöra ba wamahaʼö ira talifusöda. Fagölö ira simane moto si lö mugati oli. Na lataha ba wa meʼe famahaʼö, arara manö lö ato ndra talifusö sangai halöwö ba gangowuloa.

7. Hewisa dödöda khö ndra satua sokubaloi samomaha ira talifusöda tanö böʼö?

 ⁷ Ba daʼa taʼila wa tebai taʼaohasi ba dödö wamomaha ira talifusöda tanö böʼö. Atua-tua sibai zatua sokubaloi soʼameʼegö tödö zoguna ba gangowuloa, moguna sibai ira khö ndra talifusöda. (Baso I Fetero 4:10.) Hadia gunania khö ndra talifusöda?

8. (a) Hana wa laʼodödögö ira satua sokubaloi wa meʼe famahaʼö? (b) Ato ndra satua sokubaloi si möi ba mbanua si lö ato sanuriaigö, hadia halöwö saösö nifaluara? (Baso duho ”Halöwö Saösö”.)

⁸ Atulö wa satua sokubaloi no toʼölö. Hizaʼi, moguna aboto ba dödöra wa yaʼira itugu atua, tebai lafalua halöwö simane nifaluara me abölö ira. (Mikha 6:8) Aboto göi ba dödöra wa lö laʼila hadia zalua ba zi so föna, si tola manaisi yaʼira ba wamalua halöwö. (Zangombakha 9:11, 12; Yakobo 4:13, 14) Börö waʼomasira khö ndra talifusöda, laʼodödögö wamatunö ba zi bohou ebua hadia zi no latörö.—Baso Zinunö 71:17, 18.

9. Hana wa moguna wamahaʼö ni beʼe ndra satua sokubaloi ba zi soföna?

⁹ Ira satua sokubaloi samomaha ira talifusö tanö böʼö, moguna ira ba wangaʼaroʼö angowuloa. Börö wamomaha andrö zi tola manolo ira talifusö sato enaʼö so wahasara dödö ba fa lö faröi khö Lowalangi. Moguna sibai daʼö ba ngaluo safuria andre, mendrua manö dania ba wamakao sabölö-bölö. (Mikha 5:5, 6; Hezekieli 38:10-12) Börö daʼö, yaʼami ira satua sokubaloi niʼomasiʼöma, iʼotarai iadaʼa mibeʼe ginötömi ba wamahaʼö ira talifusö tanö böʼö.

10. Enaʼö so ginötö ba wamomaha, hadia zinangea lafalua ira satua sokubaloi?

¹⁰ Aboto ba dödöma wa oya halöwömi ba gangowuloa. Tobali, bagi ginötö ba wamalua halöwö ba gangowuloa, taria fomaha göi ndra talifusöda tanö böʼö. (Zangombakha 3:1) Tenga zaya-zaya gölömi wamalua daʼö, moguna ba mbanua niha keriso ba zi so föna.

11. (a) Hadia wanema li ndra satua sokubaloi moroi ba mbanua si faböʼö-böʼö sanandrösa ba wamahaʼö? (b) Moloʼö sura Gamaedola 15:22, hana wa moguna tafahaʼö ita khöra?

¹¹ No lasofu khö ndra satua sokubaloi hewisa lalara ba wamomaha ndra talifusö tanö böʼö. * Arakhagö fagölö wanema lira hewaʼae faböʼö mbanuara. Hadia geluahania? Famahaʼö moroi ba Zura Niʼamoniʼö moguna gofu hezo mbanua niha keriso. (I Korindro 4:17) Ba wamahaʼö ba zi dua migu andre, ifatunö khöda mbua wangera-ngerara. (Gamaedola 15:22) Samomaha lafotöi ia samahaʼö, nifomaha lafotöi ia nifahaʼö.

12. Hadia zinangea ifalua samahaʼö? Ba hadia mbörö?

¹² Siʼoföna, samahaʼö ihalö dödö nifahaʼö. Hana wa moguna daʼa? Amaedola zohalöwö ba danö, iʼofönaiʼö wangehaogö tanö fatua lö itanö zinanö. Simanö göi zamahaʼö iʼofönaiʼö ifaʼanö dödö nifahaʼönia. Hewisa  wamaʼanö tödö nifahaʼö? Iʼoʼö duma-duma nibeʼe Zamueli, samahaʼö satua-tua.

13-15. (a) Hadia niʼandrö Yehowa khö Zamueli? (b) Hadia nifalua Zamueli khö Zaulo fatua lö ibayoini? (Faigi gambara ba ngaʼörö si 8.) (c) Hana wamoguna khö ndra satua sokubaloi nifalua Zamueli andrö?

¹³ Me 3.000 fakhe zi lalö, imane Yehowa khö Zamueli si no alawa döfi, ”Mane waʼalawa luo mahemolu ba ufatenge khöu niha, siʼoroi danö mado Mbeniyami, daʼö öbayoini razo mbanuagu Iraono Gizaraʼeli.” (I Zamueli 9:15, 16) Iʼila Samueli wa tenga yaʼia zondröniaʼö Iraono Gizaraʼeli, ba omasi göi Yehowa ibayoini razo si bohou. Enaʼö tola ifalua halöwönia niha nibayoini andrö, iʼera-era Samueli hadia zinangea ifalua.

¹⁴ Falukha Zamueli khö Zaulo mahemolunia. Imane Yehowa khö Zamueli, ”Daʼö niha andrö.” Iʼanemai ifalua Samueli zi no iʼera-era. Ifaigi ginötö si sökhi ba wahuhuosa khö Zaulo. Ikaoni manga Zaulo ba ono matua si fao khönia, ifedadao ira ba dadaoma si sökhi, ibeʼe öra gö sabölö sökhi. Imane Samueli, ”A ia, noa sa labeʼe yawa ia khöu.” Me no awai manga ira, iʼohe Zaulo ba nomonia Samueli. Fahuhuo ira ba lala. Me ofeta ira ba nomo, möi ira ”yawa ba dete nomo” ba lö aetu fahuhuo ira irege irugi inötö wemörö. Mahemolunia ibayoini Zaulo Samueli ba faʼago bawa ira, oya ibeʼe wanuturu lala. Aefa daʼö, mofanö Zaulo ba wanohugö halöwönia.—I Zamueli 9:17-27; 10:1.

¹⁵ Tebayoini Zaulo tobali sondröniaʼö sambua soi. Tatu manö wa faböʼö ira na lafataro ndra satua sokubaloi mazui enoni. Oya zinangea lahalö famahaʼö ira satua sokubaloi khö Zamueli ba wamaʼanö tödö Zaulo. Da tafaigi dombua zi tobali famahaʼö.

16. (a) Hadia nirasoi Zamueli me laʼandrö razora iraono Gizaraʼeli? (b) Hadia nifalua Zamueli me ifarou ia Yehowa ba wombayoini Saulo?

¹⁶ Böi fatou deʼala, anemai falua. Me irongo Samueli wa omasi ndraono Gizaraʼeli na so razora, afatö dödönia hulö na lö laʼogunaʼö ia. (I Zamueli 8:4-8) Tölu kali iwaʼö khönia Yehowa enaʼö ifondro-ndrongo niwaʼöra, börö me lö omasi Zamueli na so razora. (I Zamueli 8:7, 9, 22) Hewaʼae simanö dödö Zamueli, lö abao dödönia ba niha sogatini yaʼia tobali sondröniaʼö. Me ifarou ia Yehowa ba wombayoini Saulo, iʼanemai iʼoʼö Samueli. Wa iʼoʼö daʼö Samueli, tenga börö me nifaso ia, tobali börö wa omasinia Yehowa.

17. Hewisa woloʼö ndra satua sokubaloi zimane nifalua Zamueli? Ba hana waʼomuso dödöra?

¹⁷ Ba ginötö andre, ato ndra satua sokubaloi si no toʼölö soloʼö simane nifalua Zamueli. Lafahaʼö dalifusö tanö böʼö si fao faʼomasi. (I Fetero 5:2) Lö alimagö khöra wamahaʼö niha böʼö, ba lö ataʼu ira na tebagi halöwöra. Lamane dödöra, ira talifusö andre ”sanolo” yaʼira ba wamalua halöwö ba gangowuloa. (II Korindro 1:24; Heberaiʼo 13:16) Ira  satua sokubaloi andre si lö mangalui tana khönia, omuso dödöra me laʼila talifusö si no lafahaʼö, latolo nono mbanua Yehowa.—Halöwö Zinenge 20:35.

18, 19. Hadia nifalua zatua sokubaloi ba wanuturu lala ba niha nifahaʼöra? Ba hana wamoguna daʼö?

¹⁸ Baliʼö ndraʼugö awönia, böi ha samahaʼö. Tola manö ibayoini Zaulo Samueli me awena falukha ira enaʼö tobali razo. Tefataro razo si bohou, tobali lö iʼila idöniaʼö nono mbanua Yehowa. Andrö wa ibeʼe ginötönia Samueli ba wanuturu lala khö Zaulo enaʼö tola ifalua halöwö nibeʼe khönia. Me no awai manga ira, momöi manörö-nörö, fahuo-huo, ba awena molombase ira. Iʼila Samueli wa daʼö ginötö si sökhi ba wombayoini Saulo.

¹⁹ Simanö göi iadaʼa. Fatua lö mufahaʼö danö böʼö, fahuwu ua zatua sokubaloi khö nifahaʼö. Faböʼö-böʼö lala ba wameʼe famahaʼö, teʼodaligö moloʼö si toʼölö ba mbanua si so yaʼira. Gofu hezo toröi ndraʼugö, moguna öbeʼe ginötö ba wahuwusa khö niha nifahaʼöu he waʼae oya halöwöu. Na öfalua daʼö, aboto ba dödönia wa lö öʼosiwawöi ia. (Baso Roma 12:10.) Tatu manö wa iʼandrö saohagölö waʼomasi si no öforomaʼö khönia.

20, 21. (a) Hewisa enaʼö mowua halöwö zamahaʼö si sökhi andrö? (b) Hadia nifatunö ba migu fönada?

²⁰ Atulö wa samahaʼö si sökhi, omasi ia wamahaʼö niha böʼö. Tobali, na omasi ia mowua halöwönia moguna iʼomasiʼö niha nifahaʼönia. (Fatimbaisi Yohane 5:20.) Hana wa moguna daʼa? Na iʼila wa lö öʼosiwawöi ia, omasi ia tefahaʼö. Börö daʼö yaʼami satua sokubaloi, böi ha mifahaʼö manö, baliʼö ndraʼugö awönia göi.—Gamaedola 17:17; Yohane 15:15.

²¹ Na no awai ituturu lala satua sokubaloi khö nifahaʼönia, tola ibörögö wa meʼe famahaʼö. Hewisa lalania? Tafaigi ba nifatunö migu fönada.