”Alua bencana ba gulidanö andre ya’ia da’ö fa’atebulö iklim. Ba zi lö ara tö, tebai sa’ae toröi niha ba gulidanö andre.”—The Guardian.

 Sindruhunia wa alua bencana andrö börö gamuata niha. Molo’ö ira sagatua-tua, tola alua pemanasan global börö nifalua niha gulidanö. Börö wa’aukhu si lö harumani, tebulö göi iklim ba alua ngawalö zi lö baga, simane:

•   Cuaca ekstrem. Itugu abölö-bölö ba itugu asese alua mbade, fa’oköli danö hegöi fa’aukhu sabölö-bölö. Lua-luania, abölö asese alua molö hegöi fa’akhozi gatua.

•   Esi hegöi gletser si so ba Kutub Utara tobali idanö.

•   Itugu möi yawa nasi.

 Fa’atebulö iklim andre molua-lua ia ba zi sagörö ulidanö. Imane New York Times ba zi sambua angombakhata sanandrösa ba zalua ba zi 193 soi, ”Sindruhunia mangandrö fanolo gulidanö andre.” Börö wa’atebulö iklim ato niha si tefakao ba mate. Imane Organisasi Kesehatan Dunia, ”Da’a wama’ala fondrege zebua si tola mamakiko fa’auri niha gulidanö.”

 Hiza’i, lö moguna so khöda wa’aombö dödö sanandrösa ba zi so miföna. I’otarai mböröta, no ifatunö Sura Ni’amoni’ö hadia zalua khöda iada’a. Ifatunö göi khöda hadia mbörö wa faduhu dödöda wa lö ihonogö manö ia Lowalangi ba zalua khöda ba hadia manö dania nifaluania ba zi so miföna.

 No ifatunö Sura Ni’amoni’ö ngawalö zalua iada’a.

 Niwa’ö Zura Ni’amoni’ö: ”So dania mbaŵa si lö sökhi sabua fanaögö ba ngaluo safuria andre. Amuata niha ba daʼö ha tana khöra laʼalui, sangomasiʼö anaʼa, . . . si faröi, . . . si lö fahasara dödö, . . . si manga mböli, sabe’e högö.”—2 Timoteo 3:1-4.

 No ifatunö Sura Ni’amoni’ö hadia manö gamuata niha ba götöda iada’a, ba amuatara andrö mbörö wa itugu lö sökhi wa’atebulö iklim. Ira samatörö hegöi sogale abölö la’alui dana khöra samösa hegöi kefe moroi na la’angeragö hewisa dania wa’auri niha ba zi so miföna. Hewa’ae na laforege falulu fohalöwö, hiza’i lö mofozu da’ö börö me lö khöra fahasara dödö ba nifaluara ba wombatogö pemanasan global.

 Moroi ba ayati no mege, tola ta’ila wa ato niha si lö omasi mamulö’ö amuatara ba lö omasi ira wangehaogö ulidanö andre. Itutunö Sura Ni’amoni’ö wa ”itugu monönö wa’alösökhi” niha sangalui tana khöra.—2 Timoteo 3:13.

 Ifatunö khöda Sura Ni’amoni’ö wa Lowalangi Yehowa, a Somböi ya’ita, i’ame’egö tödö gulidanö andre hegöi saliwa-liwa ba danö ma’afefu. Datatutunö tölu ayati sangoroma’ö wa lö itehegö tekiko gulidanö andre Lowalangi.

1.  1. ”Tenga si lö eluaha wamazökhi [Lowalangi gulidanö andre], hiza’i ena’ö mowanua niha ba da’ö.”—Yesaya 45:18.

    Da’ö nitötöna Lowalangi ba gulidanö andre, ba hasambalö alua da’ö. (Yesaya 55:11) Lö itehegö na tekiko gulidanö andre ba tobali planet si tebai la’iagö niha.

2.  2. ”Niha si so fangide-ngideʼö zokhö tanö dania, ba owua-wua dödöra börö me fahöna waʼatulö. Niha satulö tödö dania zokhö tanö, ba mowanua ira ba daʼö sagötö faʼara.”—Sinunö 37:11, 29.

    No ifabu’u Lowalangi wa owua-wua dödö niha gulidanö sagötö fa’ara.

3.  3. ”Tehori dania niha si lö sökhi ba gulidanö.”—Amaedola 2:22.

    No ifabu’u Lowalangi wa ihori dania niha si lö mamöhöli ba wamalua amuata si lö sökhi, farahu ba da’ö niha samakiko ulidanö.

 Simane nifabu’unia, ifuli dania ihaogö ngawalö zalua ba gulidanö andre Lowalangi. I’oguna’ö dania Wamatörönia ba wamatörö si sagörö ulidanö. (Matai’o 6:10) Mamatörö ia moroi ba zorugo. Lö moguna ifazökhi mbu’usa li hegöi fahasara dödö Famatörö Lowalangi ba gamatöröwa niha gulidanö ba wangasiwai salua ba gulidanö andre. Famatörö Lowalangi dania zangeheta famatörö niha gulidanö ma’afefu.—Danieli 2:44.

 Na tohare Wamatörö Lowalangi, fefu niha gulidanö lasöndra wa’omuso dödö ba ifuli sökhi gulidanö da’a. (Sinunö 96:10-13) Datatutunö ösa hadia manö nifalua Wamatörö Lowalangi dania.

•   I’ehaogö zi fasuida

   Niwa’ö Zura Ni’amoni’ö: ”Somuso tödö dania danö si mate hegöi tanö si lö niha-niha, sowua-wua tödö dania danö si lö niha-niha ba afönu ia bunga.”—Yesaya 35:1.

   Si lö ara tö alua: Ifuli i’ehaogö gulidanö andre Yehowa, farahu ba da’ö ngawalö nahia si no tekiko börö gamuata niha.

•   Ifatörö cuaca

   Niwa’ö Zura Ni’amoni’ö: ’Yehowa zamahono angi hegöi bade ba nasi.’—Sinunö 107:29.

   Si lö ara tö alua: Börö me so wa’abölö khö Yehowa ba wamatörö cuaca, lö hadöi sa’ae dania cuaca ekstrem si möi fama’ala niha gulidanö.

•   Ifaha’ö niha ba wondrorogö ulidanö

   Niwa’ö Zura Ni’amoni’ö: ”Ubeʼe dania khöu waʼaboto ba dödö ba ututuru khöu lala sinangea ötörö.”—Sinunö 32:8.

   Si lö ara tö alua: No ibe’e halöwö ba niha Yehowa ba wondrorogö ulidanö. (1 Moze 1:28; 2:15) Börö da’ö, ifaha’ö ita wangehaogö ulidanö ba tarorogö niwöwöinia.