”Omasi ita na ifuli simane si to’ölö wa’aurida.”—Angela Merkel, kanselir Jerman.

 Tatu fao dödöda ba ngawua wehede da’ö, börö me lö aetu so pandemi COVID-19 ba zi sagörö ulidanö ba tarasoi lua-luania. Na simanö, hadia geluaha ngawua wehede ”simane si to’ölö”? Hadia nidöna-döna niha?

•   Fa’auri ba zilalö fatua lö alua pandemi. So ösa niha la’amalösi hadia zalua ba zilalö, simane fatalagu bagi, fara’u tanga ba tola manörö-nörö ira gofu hezo manö. Imane dr. Anthony Fauci, a ba wamaigi niha sato ”fa’auri si to’ölö” eluahania tola ifuli möi ira ba ”restoran ba bioskop hegöi tanö bö’önia.”

•   Fa’auri si sökhi. So ösa niha sanötöna ena’ö itugu sökhi wa’aurira moroi ba zilalö. Lamane tödöra wa oya zinangea mubulö’ö ba gulidanö andre simane fa’oya ginötö ni’oguna’ö ba wohalöwö, famabö’ö-bö’öni niha molo’ö status sosial hegöi sanandrösa ba wökhö wangera-ngera. Imane Klaus Schwab, pendiri Forum Ekonomi Dunia, ”Börö me so pandemi, tebe’e khöda ginötö ba wo’angeragö sanandrösa ba wa’aurida, hewisa zomasi ita gulidanö hegöi ba wamalua fombulö’ö. Tenga si’ogötö’ö tebe’e khöda ginötö andre, börö da’ö moguna tahaogö wangoguna’ö ya’ia.”

 Ato niha sorasoi wa itugu oya gabula dödö salua börö pandemi. Duma-dumania, aheta ira ba halöwöra, lö hadöi omora, mofökhö ira, ba mate niha ni’omasi’öra, irege lawa’ö tödöra wa tebai sa’ae simane ”si to’ölö” wa’aurira.

 Tatu manö lö hadöi niha sangila hewisa wa’aurida na no aheta pandemi andre. (Sangombakha 9:11) Hewa’ae simanö, itolo ita Sura Ni’amoni’ö ba wangokhögö fangera-ngera si tefaudu ba tola tataögö hadia ia zalua. Baero da’ö, ifatunö göi khöda Sura Ni’amoni’ö dötönafö si tola tafaduhusi tödö ba zi so miföna, si lö irai takhalaigö.

 No ara ifa’ele’ö Sura Ni’amoni’ö wa sagötö ”gamozua götö da’a”, alua wasuwöta, duru danö, lofo hegöi fökhö waba. (Luka 21:11; Matai’o 24:3) Börö da’ö, lö tokea ita na alua nifa’ele’ö Zura Ni’amoni’ö andre, duma-dumania fökhö waba simane COVID-19.

 Bua nitemada me no aboto ba dödöda da’a: Aboto ba dödöda wa tola itugu alö pandemi andre, hiza’i no ifangelama ita Sura Ni’amoni’ö wa no auri ita ba ”mbaŵa si lö sökhi ba sabua fanaögö.” (2 Timoteo 3:1) Na ta’ila da’ö, tola ta’okhögö wangera-ngera si tefaudu sanandrösa ba wa’aurida iada’a.

 Ibe’e khöda lala wangera-ngera si sökhi Sura Ni’amoni’ö: Hewa’ae oya gabula dödö salua ba wa’aurida, hiza’i lö ara tö tebulö da’ö fefu ba zi so miföna. Hewisa wa’atebulönia?

 Tenga ha abula dödö salua iada’a nidunö-dunö Zura Ni’amoni’ö khöda, hiza’i ifatunö göi dötönafö si sökhi ba zi so miföna si lö ara tö alua. Ha Lowalangi zi tola mamalua da’ö. Tebai ifalua da’ö famatörö niha gulidanö. ”Iʼosi dawa hörö fefu ba höröra. Lö hadöi saʼae faʼamate, faʼabu dödö, fege-ege, mazui fökhö.”—Fama’ele’ö 21:4.

 Ifabu’u Lowalangi Yehowa, b ”Hiza! Ubohouni fefu hadia ia.” (Fama’ele’ö 21:5) Iheta dania Lowalangi fefu gabula dödö, farahu ba da’ö abula dödö börö pandemi. Da’a dania nifaluania:

•   Mo’ahonoa fefu niha, lö fökhö ba fa’amate.—Yesaya 25:8; 33:24.

•   Ibe’e khöra halöwö sanga’asogö fa’owua-wua dödö, tenga fa’afawuka wangera-ngera ba fa’erege dödö.—Yesaya 65:22, 23.

•   I’asogö zoguna khöra, lö hadöi sa’ae fa’anumana hegöi fa’olofo.—Sinunö 72:12, 13; 145:16.

•   Iheta wa’ata’u börö zalua ba zilalö, ba tola ifuli falukha ira ba niha ni’omasi’öra si no mate.—Yesaya 65:17; Halöwö Zinenge 24:15.

 Bua nitemada me no aboto ba dödöda da’a: Imane Sura Ni’amoni’ö, ”Fanötöna andre no amaedola zao ba waʼaurida.” (Heberai’o 6:19) Tola möi fangaro’öda wanötöna andre. Tola tataögö ngawalö zalua iada’a simane fa’aombö-aombö dödö, ba lö tebulö tarasoi wa’ahono dödö ba fa’omuso dödö.

 Na simanö, hadia sindruhu-ndruhu tola mufaduhusi tödö nifabu’u Zura Ni’amoni’ö? Faigi artikel ”Sura Ni’amoni’ö—Dane-Dane Zindruhu si Tola Mufaduhusi Tödö”.

•   Ame’egö tödö wa’aurimö

   Ayati: ”Fa’atua-tua moguna ia ba wondrorogö fa’auri zokhö ya’ia.”—Sangombakha 7:12.

   Eluahania: Moguna so khöu wa’atua-tua na öhalö gangetula ena’ö lö göna’ö COVID-19. Faigi hewisa zalua ba mbanua si toröi ya’ugö, simane hawa’ato niha si göna COVID-19, hawa’ato zi no mu-vaksin lengkap ba hadia protokol kesehatan si no mutatugöi.

•   Moguna mangelama

   Ayati: ”Mangelama niha satua-tua ba i’aröu’ö ia ba zi lö sökhi, hiza’i ilau-lau manö niha si bodo ba talafo ifaduhusi tödö ia samösa.”—Amaedola 14:16.

   Eluahania: Böi böhöli wolo’ö protokol kesehatan. Faduhu dödö ndra sagatua-tua wa ara aheta virus corona andre.

•   Alui informasi si tola mufaduhusi tödö

   Ayati: ”Niha sambö tödö ifaduhusi tödö fefu wehede, hiza’i niha satua-tua ihaogö ifatimbaisi mbekania.”—Amaedola 14:15.

   Eluahania: Haogö angeragö hadia wanuturu lala sinangea ö’o’ö. Angetula nihalömö, ebua lua-luania ba wa’aurimö. Na ö’o’ö informasi si fasala, tola te’ala wa’aurimö.

•   Okhögö wangera-ngera si tefaudu

   Ayati: ”Böi ömane, ’Hana wa abölö sökhi götö föna moroi ba götö iada’a?’ Tenga fanofu niha satua-tua wanofu da’ö.”—Sangombakha 7:10.

   Eluahania: Gofu hadia ia zalua khöu iada’a, forege ba wamalua sabölö sökhi. Böi ömane wa abölö sökhi wa’auriu ba zilalö fatua lö alua pandemi. Ba böi so ba wangera-ngeramö wa lö hadöi zi tola öfalua börö pandemi.

•   Foroma’ö wa öfosumange niha bö’ö

   Ayati: ”Mifosumange fefu niha.”—1 Fetero 2:17.

   Eluahania: Oya lala wangera-ngera niha si fabö’ö-bö’ö sanandrösa ba pandemi COVID-19. Ame’egö tödö mbua gera-erara, hiza’i böi bulö’ö gangetula si sökhi si no öhalö. Angeragö niha salio göna fökhö, simane niha si lö mu-vaksin, niha si no alawa döfi hegöi niha sanaögö fökhö sabölö-bölö.

•   Foroma’ö wa’ebolo dödö

   Ayati: ”Fa’omasi andrö ba no sebolo tödö ba si sökhi tödö.”—1 Korindro 13:4.

   Eluahania: Foroma’ö wa’asökhi dödö ba niha sorasoi fa’aombö-aombö dödö börö me tebai lafalua halöwöra simane si to’ölö. Hewa’ae na no itugu sökhi zalua, ba oya halöwö si no ö’era-era öfalua, hiza’i böi tebulö so khöu wanaha tödö.

 Terara dödö ndra Samaduhu’ö Yehowa börö me la’ila mbu’usa li Zura Ni’amoni’ö sanandrösa ba zi so miföna. Da’a göi zanolo ya’ira ena’ö lö aetu dötönaföra hewa’ae so pandemi. La’o’ö göi niwa’ö Zura Ni’amoni’ö ba wamalua angowuloa ba wamosumange Lowalangi ba lafarou dödö nawöra zamösana. (Heberai’o 10:24, 25) Gofu haniha manö tola la’ondrasi gangowuloa ndra Samaduhu’ö Yehowa nifalua secara virtual sagötö pandemi.

 Ato niha si no manema bua me fao ira ba gangowuloa ndra Samaduhu’ö Yehowa. Duma-dumania, samösa ndra alawe si no göna COVID-19 itema wogaoni moroi khö ndra Samaduhu’ö Yehowa wefao ba gangowuloa secara virtual. Da’a zanolo ya’ia ba wangokhögö lala wangera-ngera si sökhi hewa’ae na lö si döhö wökhönia. Imane wanguma’ö, ”Hulö no tobali ndra’o ösi nomora. Me ubaso Zura Ni’amoni’ö u’okhögö lala wangera-ngera si sökhi hegöi fa’ahono dödö. Da’ö zanolo ya’o ba wangosambua’ö tödögu ba dötönafö ba zi so miföna tenga ba gabula dödögu. U’andrö sibai saohagölö börö me no latolo ndra’o ena’ö ahatö khö Lowalangi, da’a ni’aluigu ba wa’aurigu.”