Hadia Tola So Sistem Ekonomi Satulö?

FUTA

Ba ngawalö soi misa, ato niha samalua demo börö me larasoi wa so walöʼatulö sanandrösa ba ekonomi. Itugu abölö-bölö zalua börö me alua wökhö COVID-19. Itugu monönö waʼaombö dödö niha börö me göna ira lockdown, faʼambö-ambö soguna, ba abua khöra ba wangalui dalu-dalu. Itugu oroma gamaehuta niha si kayo ba niha si numana.

Hadia tola teʼasiwai gabula dödö salua ba gulidanö sanandrösa ba ekonomi? Tola. Ifatunö khöda Sura Niʼamoniʼö hadia nifalua Lowalangi ba wangasiwai abula dödö niha gulidanö.

Abula dödö niʼasiwai Lowalangi

Abula dödö: Niha gulidanö tebai lafazökhi sistem ekonomi sangaʼasogö soguna ba niha fefu

Lala wangasiwai: Iheta dania wamatörö niha gulidanö Lowalangi, ba igati daʼö faoma famatörönia, nifotöi Famatörö Lowalangi. Mamatörö ia moroi ba zorugo ba ifatörö gulidanö maʼasagörö.—Danieli 2:44; Mataiʼo 6:10.

Buania: Börö me Famatörö Lowalangi dania zamatörö ba zi sagörö ulidanö, hasambalö sökhi fefu zalua ba gulidanö. Lö hadöi niha si numana mazui si tosasa ba wangalui soguna. (Sinunö 9:7-9, 18) Latema mbua ba waʼerege dödöra ba lasöndra waʼohahau dödö wefao ba nösi nomora. Ifabuʼu Sura Niʼamoniʼö, ”Lalau nomo ba toröi ira ba daʼö, lafazökhi kabu nagu, ba laʼa mbuania. Lalau nomo, ba tenga niha böʼö zangiagö, latanö zinanö, ba tenga niha böʼö zi manga bua.”—Yesaya 65:21, 22.

Abula dödö: Niha gulidanö tebai laheta ira moroi ba zalua sangaʼasogö famakao hegöi faʼambö soguna.

Lala wangasiwai: Iʼogunaʼö Wamatörönia Lowalangi ba wangeheta fefu zangaʼasogö faʼataʼu hegöi famakao ba niha gulidanö.

Buania: Na tohare Wamatörö Lowalangi, hasambalö tebönökhi fefu zoguna ba niha. Lö hadöi saʼae fasuwöta, faʼambö soguna hegöi pandemi. (Sinunö 46:9; 72:16; Yesaya 33:24) Imane Lowalangi, ”Mowanua dania nono mbanuagu ba nahia safönu faʼohahau dödö, ba nahia si lö ametaʼuö ba sahono dödö.”—Yesaya 32:18.

Abula dödö: Ato niha sangokhögö amuata fakhögusa ba sangogunaʼö awönia niha ba wangalui tana khönia samösa.

Lala wangasiwai: Ono mbanua Lowalangi, lafahaʼö ira ba wangoromaʼö faʼomasi sindruhu si lö mangalui tana khöra.—Mataiʼo 22:37-39.

Buania: Na tohare Wamatörö Lowalangi, fefu niha laforomaʼö waʼomasi sindruhu si ’lö mangalui tana khönia’. (1 Korindro 13:4, 5) Imane Sura Niʼamoniʼö, ”Lö lafalua zi möi famaʼala mazui lafalua zi möi famakiko ba hili niʼamoniʼö andrö khögu, börö me anönö danö faʼaboto ba dödö sanandrösa khö Yehowa a simane faʼanönö doyo nasi andrö asi.”—Yesaya 11:9.

Itutunö khöda Sura Niʼamoniʼö wa so ita ba gangohorita götö daʼa, ba lö ara tö ifalua mbuʼusa linia Lowalangi ba wangeheta fefu abula dödö sanandrösa ba ekonomi. b (Sinunö 12:5) Gasa-gasa daʼö, tola itolo ndraʼugö goi-goi Zura Niʼamoniʼö ba wanaögö abula dödö. Duma-dumania, faigi artikel ”Caranya Berhemat Saat Penghasilan Berkurang” hegöi ”Pandangan yang Benar tentang Uang”.

Lala wangera-ngera si lö tefaudu sanandrösa ba Zura Ni’amoni’ö hegöi ekonomi

Si lö tefaudu: Lö tebulö so wa’anumana, börö me imane Yesu, ”Lö tebulö fao khömi zi numana.”—Mataiʼo 26:11.

Sindruhu: Imane Yesu: Sagötö mamatörö nasa gulidanö si lö atulö andre, hasambalö so wa’anumana. Hewa’ae simanö, ifa’ema Yesu ’duria somuso dödö ba niha si numana’, farahu ba da’ö mbu’usa li wa Famatörö Lowalangi dania zangeheta fa’anumana.—Luka 4:18, 43.

Si lö tefaudu: Niha sangomusoi’ö tödö Lowalangi, hasambalö numana. Börö me imane Yesu, ”Famawa fefu haratomö ba kefe da’ö be’e ba zi numana.”—Mataiʼo 19:21.

Sindruhu: Lö nitatugöi Yesu hadia zi lö tola lö’ö lafalua ira solo’ö khönia. Ibe’e mene-mene da’ö Yesu khö zi samösa ono matua si no mangosambua’ö tödönia ba haratonia. Ifarou ia Yesu ena’ö i’öna-öna’i wa’aurinia ba itema’ö wogaoni tobali solo’ö khönia.

Si lö tefaudu: Ifahowu’ö zi samösa niha Lowalangi ya’ia na ibe’e wa’akayo, börö me imane Sura Ni’amoni’ö, ”Howu-howu Yehowa zame’e fa’akayo ba niha.”—Amaedola 10:22.

Sindruhu: Ba Zura Ni’amoni’ö ”howu-howu Yehowa” mu’amaedolagö ia fa’akayo ba wamati simane fa’auri si sökhi, fahuwusa saro khö Lowalangi hegöi tötönafö si sökhi ba zi so föna. (Sinunö 25:14; Yohane 17:3) Hewa’ae na so ösa niha si kayo ba gotalua nono mbanua Lowalangi, hiza’i ato ba gotaluara niha si to’ölö manö. (1 Moze 24:34, 35; Yakobo 2:5) Yesu manö lö oya gokhötania.—Mataiʼo 8:20.

Si lö tefaudu: Ifaha’ö ita Sura Ni’amoni’ö wa so sambua ngawawa samalua simane nifalua niha Keriso ba götö siföföna: ”Faoma mamuala ira khö nawöra, lafamawa fefu haratora.”—Halöwö Zinenge 2:44, 45.

Sindruhu: Ayati da’a zangoroma’ö hewisa niha Keriso me götö föna ba wame’era fanolo ba niha sawena tebayagö idanö. Möi ira ba Yeruzalema ba wangondrasi Owasa Fendrakose nifalua niha Yahudi. (Halöwö Zinenge 2:5) Hiza’i, me tobali ira niha Keriso, toröi ira nasa ba Yeruzalema abölö ara moroi ba zi no lakhalaigö börö me lafaha’ö nasa ira sanandrösa ba wamati sawena la’okhögö. Börö da’ö, ira niha Keriso la’owuloi fefu haratora ba wanga’asogö gö hegöi nahia wa’atoröi.—Halöwö Zinenge 2:41, 42, 46, 47.

a Yehowa ya’ia da’ö töi Lowalangi si so ba Zura Ni’amoni’ö.—Sinunö 83:18.

b Ena’ö tola faduhu dödömö ba Zura Ni’amoni’ö, faigi artikel ”Sura Ni’amoni’ö—Dane-Dane Zindruhu si Tola Mufaduhusi Tödö”.

Te Göi Adöni Dödöu

MANURIAIGÖ

Hadia Nifalua Wamatörö Lowalangi Dania?

Aboto ba dödö Yesu wa ha Famatörö Lowalangi zi tola mangeheta gabula dödö si so ba gulidanö. Hadia zi no ifalua Wamatörö andrö irege so khöda waʼafaduhu dödö?

TUHO TANÖ BÖ’Ö SADÖNI DÖDÖDA