Hadia Lö Hadöi Sa’ae Dania Terorisme?
Na alua terorisme, no sinangea manofu ita: ’Hadia i’ame’egö tödö ita Lowalangi? Hadia mbörö wa alua zimane da’ö? Hadia lö hadöi sa’ae dania teroris a andre? Hewisa ndra’o ba wolawa fa’ata’u?’ Ibe’e khöda wanema li Sura Ni’amoni’ö sanandrösa ba wanofu-nofu da’ö.
Hewisa dödö Lowalangi sanandrösa ba terorisme?
Fatuwu Lowalangi ba zi lö sökhi hegöi terorisme. (Sinunö 11:5; Amaedola 6:16, 17) Me so Yesu ba gulidanö tobali salahi Lowalangi no irai itegu ndra nifaha’önia me lafalua wa’udusa. (Mataiʼo 26:50-52) Hewa’ae so zanguma’ö wa lafalua da’ö börö döi Lowalangi, hiza’i lö fao dödö Lowalangi ba gamuatara andrö ba lö ifondrondrongo wangandröra.—Yesaya 1:15.
Ahakhö dödö Lowalangi ba niha si göna abula dödö, farahu ba da’ö niha si tefakao börö teroris. (Sinunö 31:7; 1 Fetero 5:7) Itutunö göi khöda Sura Ni’amoni’ö wa lö ara tö ihori wa’alösökhi Lowalangi.—Yesaya 60:18.
Hadia mbörö wa alua terorisme?
Ifatunö khöda Sura Ni’amoni’ö hadia mbörö wa alua terorisme ya’ia da’ö börö me ”ibali’ö ia niha samatörö awönia niha irege te’ala ia”. (Sangombakha 8:9) Sagötö sejarah, lafalua terorisme ira niha segebua kuaso irege lafakao niha bö’ö, ba niha nifakaora andrö lafalua göi gamuata simane da’ö.—Sangombakha 7:7.
Lö hadöi sa’ae dania terorisme
Ifabu’u khöda Lowalangi wa lö hadöi dania ameta’uö hegöi fa’alösökhi ba ibali’ö nahia si sökhi gulidanö andre. (Yesaya 32:18; Mikha 4:3, 4) Duma-dumania:
Iheta dania zi tobali börö wa alua terorisme. Iheta fefu wamatörö niha gulidanö Lowalangi ba ifasindro wamatörönia irege ya’ia zamatörö ba zi sagörö ulidanö. Yesu Keriso zi tobali Samatörö nifili Lowalangi. Ibe’e wa’atulö ba niha gulidanö ba iheta fefu wamakao hegöi fa’alösökhi. (Sinunö 72:2, 14) Börö da’ö, lö hadöi sa’ae dania terorisme ba ”owua-wua dödöra börö me fahöna wa’atulö”.—Sinunö 37:10, 11.
Iheta fefu ngawalö zalua börö terorisme. Tola manö cacat mazui agata’u niha si göna terorisme. Hiza’i, hasambalö ifadöhö ira Lowalangi he ba mboto mazui ba wangera-ngerara. (Yesaya 65:17; Fama’ele’ö 21:3, 4) No göi fawu’u li ia wa hasambalö isusugi niha si no mate ba auri ira ba gulidanö safönu fa’ohahau dödö.—Yohane 5:28, 29.
Faduhu dödöda wa hasambalö ifalua da’ö Lowalangi börö me no itutunö ba Zura Ni’amoni’ö. Hiza’i, te manofu-nofu ndra’ugö, ’Hadia mbörö wa lö nasa iheta terorisme andre Lowalangi?’ Ena’ö ösöndra wanema linia, faigi video Hana Wa Itehegö So Wamakao Lowalangi?
a Eluaha ”terorisme” ya’ia da’ö fameta’u mazui fa’alösökhi nifalua ba niha si to’ölö. Ohitö dödöra ya’ia da’ö ba wameta’u mazui ba wolohe fa’atebulö ba politik, agama mazui sosial. Hiza’i, hewa’ae so zanguma’ö wa nifaluara andrö terorisme, tola manö tenga da’ö zi so ba wangera-ngera niha bö’ö.
Te Göi Adöni Dödöu
MANURIAIGÖ
Hadia Nifalua Wamatörö Lowalangi Dania?
Aboto ba dödö Yesu wa ha Famatörö Lowalangi zi tola mangeheta gabula dödö si so ba gulidanö. Hadia zi no ifalua Wamatörö andrö irege so khöda waʼafaduhu dödö?
ESSENTIAL BIBLE TEACHINGS
Hana Wa Itehegö So Wamakao Lowalangi?
Ato niha sanofu hadia mbörö wa no afönu faʼalösökhi hegöi fangarö-ngarö gulidanö andre. So wanema linia ba Zura Niʼamoniʼö, si tefaudu ba si möi fondrara dödö.
