Ero röfi, zuta niha si mate börö me la’oguna’ö zat-zat si möi famunu, farahu ba da’ö narkoba. Sagötö pandemic COVID-19, itugu monönö zalua. Ato niha si no tetolo ena’ö lö sandru ira ba narkoba börö mene-mene Zura Ni’amoni’ö. Na da’ö nifaluamö iada’a ba wolawa fa’asandru, tola möi fanolomö mene-mene Zura Ni’amoni’ö andre. a

Itutunö khöda artikel da’a:

•  Hadia sindruhu-ndruhu möi fanoloda Zura Ni’amoni’ö ba wolawa fa’asandru?

•  Öfa ngawalö lala si te’odane-dane ba Zura Ni’amoni’ö si tola möi fanolo ba wolawa fa’asandru

•  Ayati si tola manolo ya’ugö ba wolawa fa’asandru

•  Bua gera-era niha si no morasoi mene-mene Zura Ni’amoni’ö

•  Hadia no iwa’ö Sura Ni’amoni’ö wa niha si sandru, böi latema wanolo moroi khö ndra medis?

•  Hadia so ösa dalu-dalu si tebai mu’oguna’ö ba medis molo’ö Sura Ni’amoni’ö?

 Molo’ö ira peneliti, tola alua nifotöi fa’asandru börö gabula dödö tanö bö’ö, simane fa’afawuka gera-era, fa’aombö dödö, fa’ide-ide dödö mazui falö’awö-awö. Tola itolo ndra’ugö Sura Ni’amoni’ö ba wangokhögö famati saro irege tola ötaögö fefu da’ö. Ifatunö göi Sura Ni’amoni’ö lala ba wangokhögö fahuwusa khö Lowalangi. (Sinunö 25:14) Börö wanolonia, andrö wa tola ötaögö gabula dödö si tebai ötaögö ba wamaigimö.—Mareko 11:22-24.

1.  1. Forege ena’ö aboto ba dödöu Lowalangi Yehowa. b (Yohane 17:3) Ya’ia andrö Somböwöi ba Umbu wa’abölö. Ba tenga ha da’ö manö, ya’ia andrö Ama sangomasi’ö ya’ugö. Omasi Lowalangi na fahuwu ia khöu ba ibe’e khöu wa’abölö. (Yesaya 40:29-31; Yakobo 4:8) Na sindruhu-ndruhu ö’ame’egö tödö wa’omasi niforoma’ö Lowalangi, hasambalö ibe’e khöu dötönafö sahöli-höli dödö ba zi so miföna.—Yeremia 29:11; Yohane 3:16.

2.  2. Andrö wanolo moroi khö Yehowa. Lau angandrö khö Lowalangi ba andrö wanolo moroi khönia ena’ö tola ölawa wa’asandru irege te’amoni’ö, lö ra’iö ba itema ndra’ugö Lowalangi. (Roma 12:1) I’oguna’ö gehehania Lowalangi ba wame’e khöu ’fa’abölö sahöli-höli dödö’. (2 Korindro 4:7; Luka 11:13) Tola itolo ndra’ugö eheha ni’amoni’ö ba wamöhöli fangoguna’ö narkoba ba ö’okhögö ’gamuata si bohou’ si möi fangomuso dödö Lowalangi.—Kolose 3:9, 10.

3.  3. Okhögö lala wangera-ngera Lowalangi. (Yesaya 55:9) Itolo ndra’ugö Lowalangi ba wombulö’ö fangera-ngeramö irege tola ölawa wa’asandru. (Efeso 4:23) Sura Ni’amoni’ö no bua gera-era Lowalangi, börö da’ö ba so ia ero ma’ökhö. (Sinunö 1:1-3) Ato niha zangokhögö fa’aboto ba dödö sanandrösa ba Zura Ni’amoni’ö börö me latema wanolo moroi ba niha bö’ö. (Halöwö Zinenge 8:30, 31) Ira Samaduhu’ö Yehowa lafalua wamaha’ö moroi ba Zura Ni’amoni’ö si lö mu’andrö kefe. Omasiga makaoni göi ndra’ugö ba wangondrasi angowuloa nifaluama. Tola ö’ila hadia geluaha ayati nitutunö ba gangowuloa andrö ba hewisa lalamö ba wangaurifagö ya’ia ba wa’aurimö sero ma’ökhö.

4.  4. Lau fariawö ba niha si sökhi amuata. Tola itolo ndra’ugö awöu ba wariawösa ba wolawa fa’asandru mazui i’ohe ndra’ugö ba wa’atekiko. (Amaedola 13:20) No ibe’e khöda Lowalangi zi fahuwu si sökhi, ya’ia da’ö niha samosumange ya’ia. Ba omasi Lowalangi na ötema mbua ba wariawösa si sökhi andrö. (Sinunö 119:63; Roma 1:12) Baero da’ö, moguna göi mangelama ndra’ugö ba wamili hiburan. Hadia mbörö? Ba ginötö öfaigi, öfondrondrongo mazui öbaso gofu hadia ia, sindruhunia no fariawö ndra’ugö ba niha nitutunö ba da’ö. Andrö, forege wanimbagö gofu hadia ia zi tola möi fangawuwumö ba wamalua si sökhi.—Sinunö 101:3; Amosi 5:14.

 Filifi 4:13: ”Tola utaögö fefu hadia ia börö waʼabölö nitemagu moroi khö Lowalangi.”

 ”Aboto ba dödögu, na u’odaligö wa’abölögu samösa tebai uböhöli wangoguna’ö narkoba. Börö da’ö, ulau mangandrö khö Lowalangi ena’ö itolo ndra’o ba ibe’e khögu wa’abölö.”—Patrizia, moroi ba Italia.

 Te’ebua Joseph Ehrenbogen ba gotalua niha samalua si lö sökhi. Tobali ia niha si sandru ba duo, ba roko, ba ganja hegöi heroin. Börö me talafo oya wangoguna’önia, no hauga kali arakhagö mate ia. Hiza’i, so sambua ayati Zura Ni’amoni’ö same’e khönia fa’afaduhu dödö wa tola ibulö’ö wa’aurinia. Baso waö-waö wa’aurinia ba artikel ”Ufaha’ö Ndra’o ba Wamosumange Ira Alawe Hegöi Botogu Samösa.”

 Iforege Dmitry Korshunov ba wamöhöli famadu-madu tuo. Hiza’i, ba zi hauga kali ifuli sandru ia. Hadia zanolo ya’ia ba gafuriata? Faigi video ’Alangu Dödögu Wa’aurigu’.

 Lö’ö. Imane Sura Ni’amoni’ö, ”Tenga ba niha sabölö moguna doto, hizaʼi ba niha sofökhö.” (Matai’o 9:12) Imane Institut Nasional Bidang Penyalahgunaan Narkoba AS, ”Fa’asandru ba narkoba andrö no fökhö sabua sibai. Börö da’ö, lö obönö na ha muwa’ö bakha ba dödö wamöhöli ya’ia.” Sindruhu sa, ibe’e göi wa’abölö sahöli-höli dödö Lowalangi. Börö me la’o’ö mene-mene Zura Ni’amoni’ö, ato niha si no mofozu ba wolawa fa’asandru. Hiza’i, ato göi zanguma’ö wa moguna khöra wanolo moroi khö ndra medis. c Duma-dumania, imane si samösa ira matua sotöi Allen, ”Me uböhöli wamadu-madu tuo, oi agafökhö nösigu. Ba ginötö da’ö, aboto ba dödögu wa tenga ha fanolo ba wamati zinangea utema, hiza’i moguna göi khögu wanolo moroi khö ndra medis.”

 Lö’ö. Itutunö Sura Ni’amoni’ö wa tuo tola tobali dalu-dalu mazui möi fangalösi wa’afökhö ba nösi nirasoi zi samösa niha si göna fökhö sabölö-bölö. (Amaedola 31:6; 1 Timoteo 5:23) Hiza’i fagölö simane duo, dalu-dalu ni’oguna’ö ba wo’alösi fa’afokhö nirasoi zi samösa niha tola möi fa’asandru. Börö da’ö, na mu’oguna’ö dalu-dalu sabe’e ba wo’alösi fa’agafökhö ba nösi (sito’ölönia moguna mu’o’ö resep ndra doto), moguna atua-tua zi samösa niha ba mangelama ia faböi te’ala wa’aurinia.—Amaedola 22:3.