Hadia zi so ba wangera-ngeramö na örongo ngawua wehede faʼatua danö mazui ”apokalips”? Te ökhalaigö sambua wamakao sebua salua ba zi sagörö ulidanö samunu saliwa-liwa ba danö maʼafefu. So zi faduhu tödö wa lö ara tö adudu gulidanö andre, mendrua manö na labaso duria simane daʼa:

•   ”Alua wasuwöta nuklir. Tola manö alua daʼö börö me niʼodödögö mazui tenga niʼodödögö, mazui börö me faböʼö wamoʼeluahara wehede nawöra.”—Bulletin of the Atomic Scientists.

•   ”Barö zi fulu fakhe andre, oya sibai bencana sebua si no alua, simane angi sabölö-bölö, faʼakhozi gatua, baŵa lökhö, fa’atekiko terumbu karang, faʼakhu si lö harumani hegöi molö salua ba zi sagörö ulidanö.”—National Geographic.

•   ”Itugu oya ngawawa damo ba Afrika ba itugu oya nifakikora moroi ba zi hauga fakhe silalö.”—The Associated Press.

 Hadia adudu gulidanö andre börö bencana salua ba zi sagörö ulidanö? Hadia niwaʼö Zura Niʼamoniʼö sanandrösa ba daʼö?

 Löʼö. Ibeʼe khöda waʼafaduhu dödö Taromali Lowalangi yaʼia daʼö Sura Niʼamoniʼö wa lö tebulö so gulidanö sagötö faʼara. (Sangombakha 1:4) Lö idudugö gulidanö si no ifazökhi andre Lowalangi, hizaʼi ”ifakiko niha samakiko ulidanö”.—Famaʼeleʼö 11:18.

 ”Ulidanö” nitutunö Zura Niʼamoniʼö si lö ara tö tehori yaʼia daʼö niha si lö moʼameʼegö tödö Lowalangi ba samalua gisö-isö dödönia. Simane ba götö Noakhi tehori dania ”niha si lö mamosumange Lowalangi.”—2 Fetero 2:5; 3:7.

 Simane niwaʼönia ba 1 Yohane 2:17, ”si taya nösi gulidanö awö waʼomasinia andrö”. Eluahania, tenga ulidanö andre nifakiko Lowalangi, hizaʼi niha samalua gisö-isö dödö si fasala.

 Lö nitutunö Zura Niʼamoniʼö khöda hawaʼara ginötönia. (Mataiʼo 24:36) Hizaʼi, tola taʼila wa no ahatö ginötö andrö börö me no ifatunö khöda Sura Niʼamoniʼö hadia manö dandra-tandrania. Duma-dumania:

•   Alua wasuwöta, faʼambö balazo, epidemi mazui duru danö sabölö-bölö salua ”misa” ba zi sagörö ulidanö.—Mataiʼo 24:3, 7, 14; Luka 21:10, 11; Famaʼeleʼö 6:1-8.

•   Arakhagö fefu niha ha tana khöra laʼalui. Duma-dumania, tobali ira niha ”sangomasiʼö anaʼa”, ”si lö mangila mangandrö saohagölö”, ba ”si lö fanaha tödö”.—2 Timoteo 3:1-5.

 Ato niha si fao tödö wa iʼotarai me döfi 1914, no alua nifaʼeleʼö Zura Niʼamoniʼö ba gulidanö andre ba no itugu ahatö ginötö andrö. Enaʼö öʼila danö böʼönia nasa, faigi artikel ”Apa yang Nubuat Alkitab Tunjukkan tentang Tahun 1914?” hegöi ”Apa Saja Tanda ’Hari-Hari terakhir’, atau ’Akhir Zaman’?”

 Ba li Yunani, ngawua wehede ”apokalips” nitutunö ba Zura Niʼamoniʼö eluahania ”famaʼeleʼö”. Asese muʼogunaʼö wehede daʼa ba wangoromaʼö si sambua angombakhata si no tobini. Iʼogunaʼö göi ngawua wehede daʼa Sura Niʼamoniʼö me itutunö hewisa na ”iforomaʼö [mazui, iʼombakhaʼö] waʼabölönia Soʼaya Yesu”. Eluahania, ba luo daʼö taʼila wa so waʼabölö khö Yesu ba wangohori faʼalösökhi ba gulidanö ba hasambalö ifahowuʼö niha samosumange Lowalangi.—2 Tesalonika 1:6, 7; 1 Fetero 1:7, 13.

 Buku safuria ba Zura Niʼamoniʼö, mufotöi ia Apokalypsis, mazui Famaʼeleʼö börö me ösinia itutunö hadia zalua ba zi so miföna. (Famaʼeleʼö 1:1) Ba mbuku Wamaʼeleʼö so duria somuso dödö hegöi fanötöna. (Famaʼeleʼö 1:3) Moroi ba mbuku daʼa taʼila wa lö ara tö iheta Lowalangi fefu walöʼatulö ba ibaliʼö faradaiso gulidanö andre. Na alua daʼö, lö hadöi saʼae niha sofökhö, si göna famakao mazui si mate.—Famaʼeleʼö 21:3, 4.

 Hadia adöni dödömö ba wangiʼila hadia manö mbuʼusa li sahöli-höli dödö moroi ba Zura Niʼamoniʼö? Hubungi ndra Samaduhuʼö Yehowa enaʼö tola ötema wamahaʼö ba Zura Niʼamoniʼö si lö muʼandrö kefe.