Ero röfi, so ngafulu ribu ndruru danö salua ba zi sagörö ulidanö. Sasese alua ya’ia da’ö duru danö si lö abölö-bölö. Hewa’ae simanö, alua göi ndruru danö sabölö-bölö si tola möi famakiko, tola manö mate niha ba ato zi tosasa. Itaria alua tsunami börö ndruru danö simane da’ö irege tekiko zi so ba zinga nasi ba ato niha si mate. Hadia nifatunö Zura Ni’amoni’ö sanandrösa ba ndruru danö sabölö-bölö andrö?

Itutunö ba artikel da’a:

•  Hadia no tesura ba Zura Ni’amoni’ö sanandrösa ba ndruru danö?

•  Hadia sindruhu-ndruhu alua niwa’ö Zura Ni’amoni’ö andrö?

•  Hadia nasa nifatunö Zura Ni’amoni’ö khöda?

• Bua gera-era si lö tefaudu sanandrösa ba ayati Zura Ni’amoni’ö hegöi duru danö

 Noa. No irai ifatunö khöda Yesu hadia zalua ba götöda andre. Duma-dumania ya’ia da’ö duru danö. No tesura wehede Yesu andre ba zi tölu ngawua mbuku ba Zura Ni’amoni’ö:

 ”Maoso dania zi sambua soi isuwö soi bö’ö, simanö göi zalua ero sambu-sambua famatörö. Alua lofo sabölö-bölö misa hegöi duru danö.”—Matai’o 24:7.

 ”Maoso dania zi sambua soi isuwö soi bö’ö, simanö göi zalua ero sambu-sambua famatörö. Alua ndruru danö misa ba so lofo sabölö-bölö.”—Mareko 13:8.

 ”Alua ndruru danö sabölö-bölö, lofo sabölö-bölö hegöi ngawalö wökhö.”—Luka 21:11.

 Tobali no ifatunö Yesu wa hasambalö so ”ndruru danö sabölö-bölö” ba ngawalö soi misa. Ba ginötö si fagölö alua göi wasuwöta, lofo sabölö-bölö hegöi ngawalö wökhö. Fefu zalua andre, da’ö zi tobali tandra wa no auri ita ba ”gamozua götö da’a”, mazui ba ”ngaluo safuria”. (Matai’o 24:3; 2 Timoteo 3:1) Molo’ö fangerai inötö si te’odane-dane ba Zura Ni’amoni’ö, tebörögö ngaluo safuria i’otarai me 1914 irugi iada’a.

 Sindruhu. Fefu niwa’ö Yesu farahu ba da’ö simane duru danö, alua ia ba götöda andre. Töra 1.950 ndruru danö sabölö-bölö salua i’otarai me döfi 1914 ba töra dua zuta niha si mate. a Datafaigi ösa duma-dumania.

 2004—Samudra Hindia. Alua ndruru danö fa’abölö-bölönia 9,1 magnitudo irege alua tsunami ba ngawalö soi ba so mato 225.000 niha si mate.

 2008—Cina. Alua ndruru danö fa’abölö-bölönia 7,9 magnitudo irege adudu ösa mbanua segebua hegöi banua si gide-ide. So mato 90.000 niha si mate, 375.000 niha sesokho ba zuta niha si lö hadöi omo.

 2010—Haiti. Alua ndruru danö fa’abölö-bölönia 7,0 magnitudo ba ifuli alua göi ndruru danö si lö abölö-bölö irege töra 300.000 niha si mate ba töra sazuta niha si lö hadöi omo.

 2011—Jepang. Alua ndruru danö fa’abölö-bölönia 9,0 magnitudo irege alua tsunami. Lua-luania so mato 18.500 niha si mate ba ngaotu ribu niha si findra ba nahia bö’ö. Börö bencana andre, tekiko pembangkit listrik tenaga nuklir Fukushima, lua-luania agatöla pipa pembangkit listrik andrö ba tola möi fama’ala ba niha. Fulu fakhe aefa da’ö, so mato 40.000 niha si toröi ba nahia sahatö ba pembangkit listrik andrö, lö la’ila nasa mangawuli ba nomora börö me abölö-bölö radiasi nuklir ba mbanua da’ö.

 Tenga ha sanandrösa ba gangohorita götö da’a nitutunö Zura Ni’amoni’ö, simane duru danö. Hiza’i ifatunö göi hadia zalua aefa da’ö. Imane Yesu, ”Na mi’ila alua da’ö fefu, ya’aboto ba dödömi wa lö ara tö tohare Wamatörö Lowalangi.”—Luka 21:31.

 Ifatunö Sura Ni’amoni’ö wa Famatörö Lowalangi ya’ia da’ö sambua amatöröwa si so ba zorugo ba Yesu Keriso zi tobali Razo. Ifaha’ö ndra solo’ö khönia Yesu ena’ö la’angandröi wa’atohare Wamatörö andre.—Matai’o 6:10.

 Ba zi so miföna, na tohare Wamatörö Lowalangi ba gulidanö, i’asogö wa’ahono dödö ba niha fefu irege lö sa’ae larasoi lua-lua börö bencana alam simane duru danö. (Yesaya 32:18) Baero da’ö, iheta göi fefu wamakao mboto hegöi fa’ata’u nirasoi niha si göna duru danö. (Yesaya 65:17; Fama’ele’ö 21:3, 4) Ena’ö ö’ila danö bö’önia nasa, baso artikel ”Apa yang Akan Dilakukan Kerajaan Allah?”