”Me ide-ide ndra’o, ero ma’ökhö iböbözi ba ilele-lele ndra’o ga’agu. Me no mangowaludo, ba asese göi ifalua khögu zimane da’ö inagu matuagu. Ya’ia hegöi amagu matuagu labali’ö ndra’o sawuyu. Irege tumbu ba dödögu wamunu ya’o.”—Madhu, a India.

 Moloʼö Organisasi Kesehatan Dunia (WHO), ”Ba zi sagörö ulidanö asese mufalua zi lö sökhi khö ndra alawe.” Moloʼö si no muʼerai, samösa moroi ba gotalua zi datölu ira alawe, no irai lafakao mazui lataögö waʼalösökhi ba waʼorudu.

 Na no irai alua ba waʼauriu zimane daʼö, te so khöu waʼataʼu ba ömane tödöu wa gofu hezo möiʼö, hasambalö so zamakao yaʼugö mazui samalua khöu si lö sökhi, he ba wehede hegöi ba gamuata. Börö me ato ndra alawe nifakao mazui sanaögö faʼalösökhi, te ömane tödöu wa ato niha sangumaʼö wa ’Lö moguna ndra alawe.’ Hizaʼi, hadia sindruhu-ndruhu moguna ndra alawe andrö ba wamaigi Lowalangi?

 Ayati: ”Ifazökhi ndra matua hegöi ira alawe [Lowalangi].”—1 Moze 1:27.

 Eluahania: Lowalangi zamazökhi ira matua hegöi ira alawe. Ba wamaiginia no sinangea na mufosumange ira. Baero daʼö, itötöna khö woʼomo ira matua enaʼö ’iʼomasiʼö woʼomonia ira alawe simane fangomasiʼönia botonia’, lö ifakao mazui lö talafo abeʼe wamatörönia, lö iwaʼö wehede sangafökhöiʼö tödö mazui lö ifalua zi lö sökhi. (Efeso 5:33; Kolose 3:19) Ba daʼa taʼila wa omasi sibai Lowalangi na larasoi waʼohahau dödö ira alawe ba lö khöra faʼataʼu.

 ”Me iraono ndra’o, ifalua khögu pelecehan seksual si fahatö khögu. Me 17 fakhe ndröfigu, ifeta’u ndra’o kafalogu wohalöwö wa iheta ndra’o ba halöwögu na lö ufalua khönia wa’orudu. Me no mangowaludo, lö ifosumange ndra’o fo’omogu, satuagu, hegöi si falazi omo khögu. Hiza’i, ba gafuriata ufaha’ö ndra’o sanandrösa khö Yehowa, b Somböi ya’ita. I’ame’egö tödö sibai ndra alawe. Da’a zame’e khögu fa’afaduhu dödö wa hasambalö i’omasi’ö ndra’o ba ebua mböligu fönania.”—Maria, Argentina.

 Ayati: ”So zi fahuwu sabölö ahatö moroi ba zi fatalifusö.”—Amaedola 18:24.

 Eluahania: Sindruhu si fahuwu hasambalö ituhini ndraʼugö. Na daʼö zi tola manolo yaʼugö, tola ötutunö khö zi samösa niha si tola öfaduhusi tödö hadia nirasoimö.

 ”Sagötö zi 20 fakhe, lö irai ufatunö ba niha bö’ö wa no lafalua khögu pelecehan seksual. Lua-luania, lö khögu fa’omuso dödö, so wa’ata’u ba fa’afawuka wangera-ngera. Hiza’i, awena urasoi wa’ahono dödö me no ufatunö khö zi samösa niha somasi mamondrondrongo ya’o hadia zi no irai alua khögu.”—Elif, Türkiye.

 Ayati: ”Mitouʼö ba danga [Lowalangi] na so zabu dödömi gofu hadia ia, so so sa dödönia ami.”—1 Fetero 5:7.

 Eluahania: Hasambalö ifondrondrongo Lowalangi na mangandrö ndraʼugö. (Sinunö 55:22; 65:2) Börö me iʼameʼegö tödö ndraʼugö, tola itoloʼö enaʼö aboto ba dödömö wa ebua sibai mbölimö fönania.

 ”Me no ufaha’ö ndra’o sanandrösa khö Yehowa, ibörögö alö wa’afökhö dödögu hegöi fa’afawuka wangera-ngeragu. Iada’a, lö taha-tahagu wahuhuosa khö Yehowa ba ututunö khönia hadia nirasoigu. Hulö zimane sindruhu si fahuwu ia, aboto ba dödönia nirasoigu.”—Ana, Belize.

 Ayati: ”Yehowa . . . öfalua waʼatulö ba ndraono si lö ama hegöi niha nifakao, enaʼö lö saʼae niha gulidanö sametaʼu yaʼira.”—Sinunö 10:​17, 18.

 Eluahania: Lö ara tö iheta ngawalö zi lö atulö Lowalangi, farahu ba daʼö faʼalösökhi ba famakao nifalua khö ndra alawe.

 ”Börö me no ufaha’ö ndra’o khö Yehowa wa lö ara tö iheta ngawalö wa’alösökhi nifalua khö ndra alawe hegöi ba ndraono alawe, amaedola dalu-dalu samadöhö fökhö nirasoigu da’ö, irege urasoi wa’ahono wangera-ngera.”—Roberta, Mexico.

 Enaʼö tola öfahaʼö ndraʼugö ba dötönafö si so ba Zura Niʼamoniʼö, hadia mbörö wa tola öfaduhusi tödö daʼö, ba hewisa ndra Samaduhuʼö Yehowa ba wameʼe khöu fanolo moroi ba Zura Niʼamoniʼö, andrö enaʼö lafuli lafalukhaisi ndraʼugö.

 Download versi tercetak artikel andre.