Sara Ngaʼötö 10:1-14
-
Mate Zaulo hegöi iraononia matua (1-14)
10 Fasuwö niha Wilisiti lalawa ndraono Gizaraʼeli. Moloi niha Gizaraʼeli labeʼe ira niha Wilisiti ba ato zi mate ba Hili Giliboa.+
2 Lö laböhöli ira niha Wilisiti wolohi Saulo hegöi iraononia matua. Labunu nono Zaulo sotöi Yonata, Abinadabi ba Malikhi-sua.+
3 Itugu abölö-bölö wasuwöta andrö khö Zaulo. Me no lakhamö ia si fafana ba lafana ia irege mesokho.+
4 Imane Saulo ba zolohe fangönania, ”Söbi wödamö ba taruʼö khögu, enaʼö lö möi niha si lö nisuna andrö ba daʼa wamahö yaʼo ba lafakaodo.”+ Hizaʼi, lö ifalua daʼö solohe fangönania andrö börö waʼataʼunia. Andrö, ihalö wödania Saulo ba itaruʼö khönia.+
5 Me iʼila wa no mate Zaulo, ihalö wöda daʼö solohe fangönania ba ibunu göi ia.
6 Mate Zaulo, simanö göi nononia matua si datölu, ba ahori mate fefu göi nösi nomonia.+
7 Me laʼila iraono Gizaraʼeli si so ba ndraso wa no moloi fefu ndra saradadu ba no mate göi Zaulo awö nononia, laröi mbanuara ba moloi ira. Tohare niha Wilisiti, laʼiagö mbanua daʼö.
8 Mahemolunia, me möi niha Wilisiti ba wangai gama-gama ndra saradadu si no mate, laʼila Zaulo hegöi ononia matua no mate ba Hili Giliboa.+
9 Lahalö gama-gamania, lahalö högönia hegöi fangönania, ba lafatenge niha ba woʼanöröi banua Wilisiti ba wamaʼema turia andrö misa ba gosali nadu khöra+ hegöi ba niha mbanua.
10 Aefa daʼö, labeʼe wangönania ba gosali nadu khöra ba laʼosö högönia ba nomo Dagono.+
11 Me larongo ira niha Yabesi+ ba Gileadi nifalua niha Wilisiti khö Zaulo,+
12 mofanö fefu ndra saradadu sagabölö ba wangai amatela Zaulo hegöi iraononia. Laʼohe fefu daʼö ba Yabesi, ba lakoʼo dölania barö geu sebua ba Yabesi,+ ba fuasö ira fitu hari waʼara.
13 Mate Zaulo börö me faröi ia khö Yehowa. Lö iʼoʼö goroisa Yehowa,+ ba iʼandrö wanuturu lala ba niha si tola mogaoni bekhu niha si no mate,+
14 tenga fanuturu lala moroi khö Yehowa. Börö daʼö ibunu ia Lowalangi, ba khö Dawido ono Gizaʼi+ ibeʼe wamatörö tobali razo.
