Sara Ngaʼötö 12:1-40
-
Niha si fa’awö khö Razo Dawido (1-40)
12 Daʼa niha sangondrasi Dawido ba Zikelagi+ sagötö foloinia börö Zaulo+ ono Gisi. Tefarahu ira ba gotalua zaradadu sagabölö sanolo yaʼia ba wasuwöta.+
2 Laʼohe wana sinali ba tola laʼogunaʼö dangara kabera+ hegöi kambölö ba wamazaumba kara faoma ribo-ribo+ mazui fafana. Yaʼira andrö talifusö Zaulo, ngaʼötö Mbeniami.+
3 Sondröniaʼö yaʼira yaʼia daʼö Ahieseri ba Yoasi, ono Zemaʼa niha Gibea;+ ba fao göi Yesieli ba Feleti ono Gasimaweti,+ Berakha, Yehu niha Ganatoti,
4 Yisimaya niha Gibeona,+ saradadu sagabölö si farahu ba gotalua zi 30 niha andrö+ ba yaʼia zondröniaʼö yaʼira; fao göi Yeremia, Yehazieli, Yohanano, Yosabada niha Gedera,
5 Eluzai, Yerimoto, Bealia, Semaria, Sefatia niha Harifo,
6 Elikana, Yisia, Asareʼeli, Yoezeri, ba Yasobea, yaʼia daʼö ngaʼötö Gora;+
7 ba Yoela hegöi Sebadia ono Yeroha moroi ba Gedoro.
8 So ösa niha Gado zi möi khö Dawido ba wamaigi yaʼia ba naha waminiʼö yaʼia ba danö si mate.+ Yaʼira andrö saradadu sagabölö, saradadu si no toʼölö ba wasuwöta, si no mamaʼanö balusera sebua faoma toho, si hulö mbawa zingo ba sabölö fagohi ba hili simane nago.
9 Sondröniaʼö yaʼira yaʼia daʼö Ezeri, numero dua Obadia, numero tölu Eliabi,
10 numero öfa Misimana, numero lima Yeremia,
11 numero önö Ataʼi, numero fitu Elieli,
12 numero walu Yohanano, numero siwa Elisabada,
13 numero fulu Yeremia, ba numero felezara Makhabanai.
14 Yaʼira andrö ngaʼötö Gado,+ ira kafalo zaradadu. Fondrege zi tebai fagölö ia ba zi 100 niha, ba fondrege zabölö fagölö ia ba zi 1.000 niha.+
15 Yaʼira zangötö Ungo Nidanö Yoridano me baŵa siföföna, me falawu nungo nidanö daʼö irugi ngöfi. Lafofanö göi fefu niha mbanua ba danö saloʼo numalö ba gatumbukha hegöi ba gaekhula.
16 So ösa niha Mbeniami hegöi niha Yehuda si möi khö Dawido ba naha waminiʼönia yaʼia.+
17 Ba möi Dawido wamalukhaisi yaʼira imane, ”Na tohare ami si fao faʼatulö ba wanolo yaʼo, tola fao ami khögu.* Hizaʼi, na tobali ami si manga mböli ba mibeʼe ndraʼo ba danga nudu hewaʼae lö si fasala dangagu, yaʼanehe Lowalangi ndra tuada ba yaʼia zanguhuku yaʼami.”+
18 Lö ara, mohalöwö geheha niʼamoniʼö khö Gamasai+ kafalo zi tölu ngafulu niha andrö ba imane,
”Tana khöu ndraʼaga andre Dawido, ba fao ndraʼaga khöu ono Gizaʼi.+
Yaʼahowu, yaʼahowu ndraʼugö, ba yaʼahowu niha sanolo yaʼugö,+Börö me itolo ndraʼugö Lowalangimö.”
Andrö wa itemaʼö ira Dawido ba ifataro ira tobali kafalo zaradadu.
19 So ösa niha Manase si faʼawö khö Dawido me fao ira niha Wilisiti ba wolawa Saulo. Me luo daʼö, lö itolo niha Wilisiti börö no aefa mamagölö ira ba lafofanö ia ira sondröniaʼö niha Wilisiti.+ Lamane khönia, ”Tola manö ifuli fao ia khö Zaulo sokhö yaʼia ba lua-luania si mate ita.”+
20 Me mofanö ia ba Zikelagi,+ daʼa ngaʼötö Manase si fao khönia: Adena, Yosabada, Yediaeli, Mikhaʼeli, Yosabada, Elihu, ba Siletaʼi, sondröniaʼö niha Manase si hauga ribu faʼato.+
21 Latolo Dawido ba wolawa niha sorabu börö me agabölö ira, lö khöra faʼataʼu+ ba tobali ira kumandru zaradadu.
22 Ato niha zangondrasi Dawido+ ero maʼökhö ba wanolo yaʼia irege ato zaradadura simane saradadu Lowalangi.+
23 Daʼa fefu gafalo zaradadu solohe fakake wasuwöta si möi khö Dawido ba Heberona+ enaʼö labaliʼö ia razo fangali Zaulo simane niwaʼö Yehowa.+
24 Niha Yehuda si no mamaʼanö yaʼira ba wasuwöta 6.800 niha, solohe baluse sebua faoma toho.
25 Moroi ba mado Zimeoni 7.100 zaradadu sagabölö ba si barani.
26 Moroi ba mado Lewi 4.600 niha.
27 Yehoyada+ zondröniaʼö iraono Gaʼaroni,+ ba fao khönia 3.700 niha,
28 simanö göi Zadoki,+ ono matua sabölö ba si barani, fao khönia 22 zondröniaʼö ba nösi nomo zatuania ira matua.
29 Moroi ba mado Mbeniami, ira talifusö Zaulo+ 3.000 niha. Ato ba gotaluara mböröta zi lö faröi ba wozago ösi nomo Zaulo.
30 Moroi ba mado Geferai 20.800 niha sagabölö ba si barani, si tehöngö ba gotalua nösi nomo zatuara ira matua.
31 Moroi ba zi matonga mado Manase so 18.000 niha nitötöi töi enaʼö möi ira ba wamataro Dawido tobali razo.
32 Moroi ba mado Gisasari, so zi no aboto ba dödö inötö ba laʼila hadia zinangea lafalua iraono Gizaraʼeli, yaʼia daʼö 200 niha zondröniaʼö ba laʼoʼö wehedera ira talifusöra.
33 Moroi ba mado Zebuloni 50.000 niha zi no mamaʼanö yaʼira tobali saradadu, si no lafaʼoli ba wasuwöta ba ahori dozi ira ngawalö wakake wasuwöta. Laʼoʼö Dawido ba sindruhu-ndruhu lö faröi* ira fefu.
34 Moroi ba mado Nafetali so 1.000 zondröniaʼö ba fao khöra 37.000 niha solohe baluse sebua faoma toho.
35 Moroi ba mado Dano so 28.600 niha zi no mufaʼoli ba wasuwöta.
36 Moroi ba mado Gaseri 40.000 niha zi no mamaʼanö yaʼira tobali saradadu, si no mufaʼoli ba wasuwöta.
37 Moroi ba zi tambai Nungo Nidanö Yoridano,+ moroi ba mado Rubeno, mado Gado, ba matonga moroi ba mado Manase 120.000 zaradadu solohe ngawalö fakake wasuwöta.
38 Yaʼira andrö fefu zaradadu si no hasara tödö weʼamöi fasuwö. Soroi ba dödöra weʼamöi ba Heberona ba wamataro Dawido tobali razo ba Gizaraʼeli maʼasagörö. Baero daʼö, fefu ndraono Gizaraʼeli tanö böʼö göi hasara dödöra ba omasi ira na Dawido zi tobali razo.+
39 Tölu hari waʼara toröi ira ba daʼö khö Dawido, manga ira ba labadu zi no lahenaigö khöra ira talifusöra.
40 Niha sahatö ba daʼö ofeta ba mbanua Gisasari, Zebuloni ba Nafetali, laʼohe gö faoma kalide, ondra, kalide sebua* ba sawi. Laʼohe hamo darigu, kue nifaruka bua ara soköli ba kue nifaruka bua nagu,* agu, fanikha, ba oya sibai zawi hegöi biri-biri börö me so waʼomuso dödö sebua ba Gizaraʼeli.
Nisura ba gahe zura
^ Mazui ”tola hasara dödöda”.
^ Mazui ”si lö mamodombua tödö”.
^ Ba li Heberaiʼo eluahania ngaʼötö galide ba kudo.
^ Mazui ”kue kismis”.
