Sara Ngaʼötö 13:1-14
13 Mamagölö Dawido khö ndra kumandru zi saribu ba kumandru zi daotu hegöi khö ndra sondröniaʼö maʼafefu.+
2 Imane Dawido ba ndraono Gizaraʼeli, ”Na fao dödömi, ba na omasi Lowalangida Yehowa, datafaʼoheʼö goroisa khö ndra talifusöda si toröi nasa ba mbanua Gizaraʼeli maʼasagörö hegöi khö ndra ere awö niha Lewi ba mbanuara,+ sangokhögö benua soduʼu, enaʼö möi ira ba daʼa ba fao ira khöda.
3 Datafuli taʼohe Dawöla+ Lowalangida.” Lö laʼameʼegö tödö Dawöla andrö ba götö Zaulo.+
4 Fao dödö nono mbanua fefu ba wamalua daʼö börö me sökhi ba wamaigira.
5 Andrö iʼowuloi fefu ndraono Gizaraʼeli Dawido, iʼotarai nungo nidanö* ba Miserai ofeta ba Lebo-hamata*+ ba wolohe Tawöla Lowalangi sindruhu iʼotarai Giriati-yeari.+
6 Mofanö Dawido ba fefu ndraono Gizaraʼeli ba Mbaʼala,+ ba Giriati-yeari tana khö Yehuda ba wangai Tawöla Yehowa Lowalangi sindruhu, si dadao yawa* kerubi,+ Tawöla nifotöi ba döinia.
7 Hizaʼi, labeʼe ba dete goroba si bohou+ Dawöla Lowalangi sindruhu andrö ba laʼohe moroi ba nomo Gabinadabi. Usa ba Ahio zanuturu lala goroba andrö.+
8 Dawido hegöi iraono Gizaraʼeli lafalua gowasa soroi ba dödö föna Lowalangi sindruhu si fao fanunö, harafa, fakake zinunö nifosinali, tamburu,+ siʼöli nifaondra wamözi*+ hegöi torofe.+
9 Hizaʼi, me ofeta ira ba naha wamöbörö si so ba Gidono, itufa tangania Usa ba wololohe Tawöla börö me arakhagö asoʼa Dawöla andrö ba hulu zawi.
10 Daʼö mbörö wa mofönu sibai Yehowa khö Gusa. Andrö ibunu Gusa börö me itufa tangania Dawöla andrö.+ Mate Gusa ba daʼö föna Lowalangi.+
11 Hizaʼi, mofönu* Dawido me ifalua wönunia Yehowa khö Gusa. Andrö wa lafotöi nahia daʼö Feresi-usa* irugi maʼökhö.
12 Ba zi maʼökhö daʼö, ataʼu Dawido khö Lowalangi sindruhu ba imane, ”Hewisa wa tola uʼohe ba mbanuagu Dawöla Lowalangi sindruhu?”+
13 Lö iʼohe Dawöla andrö Dawido ba nahiania ba Mbanua Dawido, hizaʼi iwaʼö ba niha enaʼö laʼohe ba nomo Gobedi-edomo niha Gata.
14 Toröi Dawöla Lowalangi sindruhu andrö ba nomo Gobedi-edomo tölu waŵa waʼara, ba ifahowuʼö Yehowa nösi nomo Gobedi-edomo awö gokhötania maʼafefu.+
Nisura ba gahe zura
^ Mazui ”moroi ba Zihoro”.
^ Mazui ”lala si numalö ba Hamata”.
^ Mazui te ”ba gotalua”.
^ Mazui ”simbal”. Daʼa alat musik moroi ba ziʼöli, si hulö wiga niʼogaolo, lafaondra wamözi yaʼia na muʼogunaʼö.
^ Mazui ”abao dödö”.
^ Eluahania ”Fönu Sabölö-bölö khö Gusa”.
