Sara Ngaʼötö 14:1-17
14 Hiramo+ razo Diro, ifatenge niha khö Dawido ba ifaʼoheʼö geu eresi, sanoto kara,* ba tuka geu ba wamazökhi gödo razo khö Dawido.+
2 Aboto ba dödö Dawido wa no ifoʼahonoa ia Yehowa tobali razo ba Gizaraʼeli,+ me no muʼalawaʼö wamatörönia börö nono mbanuania Izaraʼeli.+
3 Ato woʼomo+ Dawido nihalönia ba Yeruzalema, ba itugu ato nononia matua hegöi ononia alawe.+
4 Töi ndraononia si tumbu ba Yeruzalema+ yaʼia daʼö Samua, Sobaba, Natano,+ Selomo,+
5 Yibihara, Elisua, Elifeleto,
6 Noga, Nefegi, Yafia,
7 Elisama, Beʼeliada ba Elifeleti.
8 Me no larongo ira niha Wilisiti wa no tebayoini Dawido tobali razo ba Gizaraʼeli maʼasagörö,+ tohare fefu niha Wilisiti ba wangalui yaʼia.+ Me irongo daʼö Dawido, möi ia baero ba wolawa yaʼira.
9 Tohare niha Wilisiti ba lö laböhöli wanuwö niha mbanua si so ba Ndraso Refaʼi.+
10 Manofu Dawido khö Lowalangi, ”Hadia sökhi na möido ulawa niha Wilisiti? Hadia öbeʼe ira ba dangagu?” Imane Yehowa, ”Aeʼe, hasambalö ubeʼe dania ira ba dangau.”+
11 Börö daʼö, möi Dawido ba Mbaʼali-werasi+ ba ikalaisi ira ba daʼö. Imane Dawido, ”No iʼogunaʼö dangagu Lowalangi sindruhu ba wokalaisi si faʼudu khögu, hulö nidanö sanölaʼö lalania.” Daʼö mbörö wa lafotöi nahia daʼö Baʼali-werasi.*
12 Laröi ba daʼö lowalangira ira niha Wilisiti, ba latunu daʼö fefu simane niwaʼö Dawido.+
13 Samuza inötö zui, ifuli tohare niha Wilisiti ba lasuwö niha mbanua ba ndraso daʼö.+
14 Ifuli manofu Dawido khö Lowalangi, hizaʼi imane Lowalangi sindruhu, ”Böi suwö ira moroi föna. Fuliʼö furi, öʼotarai daʼö ba wanuwö yaʼira föna ndruʼu sodoi.*+
15 Na örongo ruru zanörö duʼu sodoi* andrö, suwö ira börö me no idari-dari Lowalangi sindruhu fönamö ba wokalaisi saradadu Wilisiti.”+
16 Ifalua daʼö Dawido simane sibai niwaʼö Lowalangi sindruhu khönia+ ba lakalaisi zaradadu Wilisiti iʼotarai Gibeona ofeta ba Gezeri.+
17 Ibörögö tehöngö Dawido ba soi misa, ba laʼataʼufi ia fefu soi ibeʼe Yehowa.+
Nisura ba gahe zura
^ Mazui ”samazökhi towa”.
^ Eluahania ”Sonekhe ba Wanölaʼö”.
^ Sin.: ”duʼu baka”. Duʼu sodoi ba li Heberaiʼo.
^ Sin.: ”duʼu baka”. Duʼu sodoi ba li Heberaiʼo.
