Sara Ngaʼötö 18:1-17
18 Samuza inötö, fasuwö Dawido ba niha Wilisiti ba ikalaisi ira, irabu Gata+ hegöi banua ba zi fasuinia ba danga niha Wilisiti.+
2 Lö ara, ikalaisi niha Moabi+ Dawido ba tobali sawuyunia niha Moabi ba laʼohe khönia mbeʼelö.+
3 Ikalaisi göi razo Zoba+ sotöi Hadadezeri+ sahatö ba Hamata,+ sofanö ba wamadöni Ungo Nidanö Oiferati.+
4 Moroi ba daʼö, faʼoya nirabu Dawido 1.000 gureta kudo, 7.000 zaradadu si fakudo ba 20.000 zaradadu sanörö tanö.+ Aefa daʼö, itaba gölu-ölu kudora, hatö 100 ngaʼeu iröi.+
5 Me tohare niha Ziria moroi ba Ndramaseko ba wanolo Hadadezeri razo Zoba, 22.000 niha Ziria nibunu Dawido.+
6 Ifataro zaradadunia Dawido ba Ziria ba Ndramaseko, ba tobali sawuyu Dawido niha Ziria andrö ba laʼohe khönia mbeʼelö. Gofu hezo möi ia, lö tebulö ifemöna* ia Yehowa.+
7 Baero daʼö, ihalö mbaluse zaradadu Hadadezeri andrö Dawido, baluse sowulo-wulo nifazökhi moroi ba ganaʼa, ba iʼohe ba Yeruzalema.
8 Oya sibai tembaga nihalö Razo Dawido moroi ba Deba hegöi ba Gunu, banua nifatörö Hadadezeri, ba iʼogunaʼö daʼö Selomo ba wamazökhi Asi Tembaga,+ ehomo, ba fakake tembaga.+
9 Me irongo Toʼu razo Hamata wa no ikalaisi fefu zaradadu Hadadezeri+ razo Zoba andrö Dawido,+
10 iʼanemaiʼö ifatenge nononia sotöi Hadoramo khö Razo Dawido ba wanofu hewisa duriania, ba wamaʼema fangowai me no ikalaisi Hadadezeri, börö me asese sibai fasuwö Hadadezeri wolawa Toʼu. Iʼohe Yoramo ngawalö gama-gama moroi ba ganaʼa, firö, ba tembaga.
11 Iʼamoniʼö gama-gama daʼö Razo Dawido khö Yehowa,+ simanö göi wirö awö ganaʼa nihalönia ba ngawalö soi, yaʼia daʼö moroi ba Gedomo awö ba Moabi, moroi ba niha Gamoni,+ niha Wilisiti+ hegöi niha Gamaleki.+
12 So 18.000 niha Gedomo nikalaisi Gabizaʼi+ ono Zeruya+ ba Ndraso Nasio.+
13 Ifataro zaradadunia Dawido ba zi sagörö tanö Gedomo, ba fefu niha Gedomo tobali sohalöwö khönia.+ Gofu hezo möi ia, lö tebulö ifemöna* ia Yehowa.+
14 Lö tebulö mamatörö Dawido ba zi sagörö tanö Gizaraʼeli,+ ba ifatörö huku satulö ba sindruhu ba nono mbanuania.+
15 Yoabi ono Zeruya zi tobali kumandru+ ba Yozafati+ ono Gahiludi tuka zanura,
16 Sadoki ono Gahitobi ba Ahimelekhi ono Gabiataro daʼö zi tobali ere, ba Sawesa zi tobali sekretaris.
17 Benaya ono Yehoyada zi tobali kafalo ba niha Gereti+ hegöi Feleti,+ ba dozi nono Dawido tebeʼe khöra dadaoma sebua ba waʼarazo.
