Sara Ngaʼötö 28:1-21
28 Iʼowuloi fefu zondröniaʼö iraono Gizaraʼeli ba Yeruzalema Dawido, yaʼia daʼö ira sondröniaʼö ngawalö mado, sondröniaʼö ngawawa+ zangai halöwö khö Razo, kumandru zi saribu ba si daotu,+ samaigi-maigi harato Razo,+ urifö hegöi iraononia+ awö zondröniaʼö ba gödo razo ba fefu niha sagabölö si tola muʼodaligö.+
2 Mosindro Razo Dawido imane,
”Yaʼami ira talifusögu hegöi soigu, mifondrondrongo ndraʼo. Edöna ndraʼo ba wamazökhi omo si tobali nahia dawöla amabuʼula li Yehowa ba si tobali dane-dane gahe Lowalangida,+ ba no uhenaigö zoguna ba wamazökhi yaʼia.+
3 Hizaʼi, imane khögu Lowalangi sindruhu, ’Tenga yaʼugö zamazökhi omo ba döigu,+ börö me samösa saradadu ndraʼugö ba no öduwagö ndro niha.’+
4 Hewaʼae simanö, no ifili ndraʼo Yehowa Lowalangi ndraono Gizaraʼeli moroi ba gotalua nösi nomo namagu maʼafefu enaʼö tobali razo sagötö faʼara.+ Ifili Yehuda tobali sondröniaʼö,+ ba moroi ba ngaʼötö Yehuda ifili nösi nomo namagu.+ Ba moroi ba gotalua nono matua ono namagu, yaʼo nifilinia si tobali razo ba ndraono Gizaraʼeli.+
5 Oya khögu nono matua+ niʼamualagö Yehowa, ba moroi ba gotaluara ifili nonogu Selomo+ enaʼö modadao ia ba wamatörö andrö khö Yehowa, ba mamatörö ia ba ndraono Gizaraʼeli.+
6 ”Imane khögu, ’Onomö Selomo andrö zamazökhi omogu hegöi olayamagu, börö me no ufili ia tobali onogu, ba amania ndraʼo.+
7 Uʼaroʼö wamatörönia sagötö faʼara,+ na sindruhu-ndruhu soroi ba dödönia wamalua oroisa hegöi angetula huku+ si no uhonogöi simane nifaluania iadaʼa.’
8 Börö daʼö, umane ba ndraono Gizaraʼeli, ono mbanua Yehowa, ba irongo Lowalangida: Yaʼaboto ba dödömi ba miʼoʼö fefu goroisa Yehowa Lowalangimi, enaʼö miʼokhögö danö si sökhi+ ba mibeʼe daʼö ba ndraonomi tobali ondröita irugi zi lö aetu.
9 ”Ba yaʼugö onogu Selomo, yaʼaboto ba dödöu Lowalangi nifosumange namau ba enaʼö mangai halöwö ndraʼugö khönia soroi ba dödö+ si fao faʼaoha gölö,* börö me isekhegö dödö niha+ Yehowa ba anehe ia nikhoi dödö awö gera-era.+ Na öʼalui ia, itehegö ösöndra ia.+ Hizaʼi na öröi ia, iröi ndraʼugö irugi zi lö aetu.+
10 No ifili ndraʼugö Yehowa ba wamazökhi omo si tobali nahia niʼamoniʼö khönia. Andrö, haogö töngöni. Enaʼö barani ndraʼugö ba börögö wohalöwö.”
11 Aefa daʼö, ibeʼe Dawido khö nononia Selomo duma-duma+ kaki lima+ awö goto-otonia, simanö göi naha wangiröʼö, bateʼe tanö yawa, bateʼe tanö bakha hegöi omo nahia lagö-lagö fangatulö.*+
12 Ibeʼe göi duma-duma ba ngawalö zi no itema börö geheha niʼamoniʼö, yaʼia daʼö olayama+ nomo Yehowa, fefu nahia wemanga ba zi fasuinia, naha wangiröʼö harato ba nomo Lowalangi sindruhu, awö naha wangiröʼö gama-gama niʼamoniʼö.*+
13 Ibeʼe göi khönia wanuturu lala sanandrösa ba ngawawa gere+ awö niha Lewi, fefu halöwö ba nomo Yehowa, ba fefu gama-gama wamosumange si so ba nomo Yehowa.
14 Itatugöi waʼabua ganaʼa hegöi firö ba wamazökhi ngawalö fakake niʼogunaʼö ba wamosumange;
15 faʼabua ngawalö naha wandru+ ba fandru moroi ba ganaʼa, faʼabua ngawalö naha wandru ba fandru moroi ba wirö, moloʼö fangogunaʼö yaʼia;
16 faʼabua ganaʼa ero sambua meza roti nifalaete,*+ simanö göi waʼabua wirö ba meza nifazökhi moroi ba wirö,
17 faʼabua garafu, mako hegöi teko moroi ba ganaʼa si sökhi, faʼabua ero sambua mako side-ide moroi ba ganaʼa,+ ba faʼabua ero sambua mako side-ide moroi ba wirö.
18 Ifatunö göi hawaʼabua ganaʼa si no mufatörö ba galitö soguna ba naha wanunu sumange somuhua+ hegöi famaedo gureta wasuwöta+ khö Lowalangi, yaʼia daʼö kerubi+ anaʼa samologö afira ba sombalugö tawöla amabuʼula li Yehowa.
19 Imane Dawido, ”Tanga Yehowa zanuturu lalagu, ba yaʼia zameʼe khögu faʼaboto ba dödö ba wanura+ fefu ngawalö duma-duma+ ba wamazökhi tomosa andrö.”
20 Imane Dawido khö nononia Selomo, ”Yaʼabölö ndraʼugö ba enaʼö barani ba börögö wohalöwö. Böi ataʼufi mazui maniziʼö, börö me Lowalangi Yehowa, Lowalangigu, zi fao khöu.+ Lö ilulu ndraʼugö mazui iröiʼö.+ Yaʼia zi fao khöu irege no awai öfazökhi nomo Yehowa.
21 Daʼa ngawawa gere+ awö niha Lewi+ sangai halöwö ba nomo Lowalangi sindruhu. Ato khöu zohalöwö si no aoha ölö ba sogonekhe ba ngawalö hadia ia,+ simanö göi ndra sondröniaʼö+ awö nono mbanua soloʼö fefu nifakhoimö.”
Nisura ba gahe zura
^ Mazui ”faʼowua-wua dödö”.
^ Mazui ”omo fangatulö”.
^ Mazui ”nilulu khö Lowalangi”.
^ Daʼa roti nibaliʼö sumange.