Sara Ngaʼötö 5:1-26
5 Daʼa nono Rubeno+ ono siaʼa khö Gizaraʼeli. Yaʼia andrö ono siaʼa, hizaʼi börö me no itaʼunöisi* naha wemörö namania,+ tebeʼe ba ndraono Yosefo+ ono Gizaraʼeli andrö waʼasiaʼania. Daʼö mbörö wa lö tesura döinia ba zura ngaʼötö tobali ono siaʼa.
2 Hewaʼae na tohude Yehuda+ moroi khö ndra talifusönia, ba ngaʼötönia dania zi tobali sondröniaʼö,+ Yosefo zangokhögö faʼasiaʼa.
3 Ono Rubeno ono siaʼa khö Gizaraʼeli yaʼia daʼö Hanokhi, Falu, Hezerono, ba Karemi.+
4 Ono Yoeli yaʼia daʼö Semaya. Ono Zemaya yaʼia daʼö Gogi. Ono Gogi yaʼia daʼö Simeʼi.
5 Ono Zimeʼi yaʼia daʼö Mikha. Ono Mikha yaʼia daʼö Reaya. Ono Reaya yaʼia daʼö Baʼali.
6 Ono Mbaʼali yaʼia daʼö Beʼera, niʼoloiʼö Digelata-fileneze+ razo Asiria. Yaʼia zondröniaʼö niha Rubeno.
7 Moloʼö sura ngaʼötö nösi nomora, ira talifusönia moroi ba ngaʼötöra yaʼia daʼö Yeieli nituyu tobali sondröniaʼö, aefa daʼö Zakharia,
8 Bela ono Gasa ono Zema ono Yoeli. Toröi ngaʼötö Mbela ba Naroeri+ irugi Nebo awö Mbaʼali-meono.+
9 Tanö ba gatumbukha, toröi ia ofeta ba zinga danö si mate ba Nungo Nidanö Oiferati,+ börö me monönö waʼoya guriföra ba danö Gileadi.+
10 Ba götö Zaulo, fasuwö ira ba lakalaisi ngaʼötö Hegara, irege toröi ira ba nose-ose niha Hegara ba zi sagörö tanö Gileadi tanö ba gatumbukha.
11 Ba zingara toröi ngaʼötö Gado, ba danö Mbazana irugi Zalekha.+
12 Ba Mbazana, Yoeli zi tobali sondröniaʼö, Safama ganetenia, ba so göi Yaenai faoma Safata.
13 So dafitu dalifusöra moroi ba nösi nomo zatuara ira matua yaʼia daʼö Mikhaʼeli, Mesula, Seba, Yorai, Yaeka, Sia ba Eberi.
14 Yaʼira andrö ono Gabihailo ono Huri ono Yaroahi ono Gileadi ono Mikhaʼeli ono Yezizai ono Yado ono Mbusi.
15 Ahi ono Gabidieli ono Guni, daʼö sondröniaʼö ba nösi nomo zatuara ira matua.
16 Toröi ira ba Gileadi,+ ba Mbazana+ hegöi banua ba zi fasuinia, simanö göi ba zi sagörö benua soduʼu ba Zarona irugi mbalönia.
17 No tesura döira fefu ba zura ngaʼötö me götö Yotamo+ razo Yehuda, simanö göi ba götö Yerobeamo*+ razo Gizaraʼeli.
18 Moroi ba mado Rubeno, mado Gado, ba matonga mado Manase, so 44.760 niha sagabölö solohe baluse faoma föda, solohe fana sinali* hegöi si no toʼölö ba wasuwöta.
19 Fasuwö ira lalawa niha Hegara,+ Yeturi, Nafisi,+ ba Nodaba.
20 Laʼandrö wanolo moroi khö Lowalangi ba wasuwöta daʼö, ba ifondrondrongo gangandröwara börö me faduhu dödöra khönia. Ba latema wanolo ba wasuwöta andrö, irege tebeʼe ba dangara fefu niha Hegara awö zi fao khöra.+
21 Larabu gurifö ndra niha daʼö, 50.000 ngaʼeu gondra, 250.000 ngaʼeu mbiri-biri, 2.000 ngaʼeu galide ba 100.000 niha.
22 Ato zi mate ba wasuwöta daʼö, börö me Lowalangi sindruhu+ zi fasuwö. Ba toröi ira ba nahia ndra niha daʼö irugi ngaluo laʼoloiʼö ira.+
23 So matonga moroi ba ngaʼötö mado Manase+ zi toröi ba soi daʼö, iʼotarai Mbazana irugi Mbaʼali-heremono, Seniri, ba Hili Heremono.+ Ato sibai ira.
24 Ira sondröniaʼö ba nösi nomo zatuara ira matua yaʼia daʼö Eferi, Yisei, Elieli, Aserieli, Yeremia, Hodawia, ba Yadieli. Yaʼira andre saradadu sagabölö, niha si tehöngö, ba sondröniaʼö ba nösi nomo zatuara ira matua.
25 Hizaʼi, faröi ira khö Lowalangi ndra tuara, ba mohorö ira khö lowalangi niha mbanua daʼö+ si no ihori Lowalangi fönara.
26 Börö daʼö, Lowalangi ndraono Gizaraʼeli zamarou tödö Wulo razo Asiria+ yaʼia daʼö Tigelata-fileneze+ ba wangoloiʼö niha Rubeno, niha Gado, ba matonga moroi ba mado Manase. Iʼohe ira ba Hala, Habora, Hara hegöi ba Nungo Nidanö Gozana+ irege toröi ira ba daʼö ofeta maʼökhö.
Nisura ba gahe zura
^ Mazui ”ifalua zi raʼiö ba”.
^ Eluahania Yerobeamo II.
^ Mazui ”samasa tali wana sinali”.
