Sara Fetero 1:1-25
1 Moroi khö Wetero sinenge+ Yesu Keriso, nifaʼema ba niha si fatewu ba mbanua Wondro, Galatia, Kafadokia,+ Asia, hegöi Bitinia, ba niha si no mutuyu
2 moloʼö niʼila Namada Lowalangi andrö ba wamobörö,+ ba si no muʼamoniʼö faoma eheha,+ enaʼö so khöra woloʼö ba tesasai ira ba ndro Yesu Keriso.+
Yafahöna khömi waʼasökhi dödö sebua* ba faʼohahau dödö.
3 Tesuno Lowalangi, Ama Zoʼaya yaʼita Yesu Keriso. Börö waʼahakhö dödönia sebua, no ifuli ifatumbuʼö ita+ irege taʼokhögö dötönafö saro+ me tesusugi Yesu Keriso ba gotalua niha si no mate.+
4 No ibeʼe khöda gondröita si tebai taya, si lö taʼunö, ba si tebai tekiko.+ No iʼiröʼö daʼö ba zorugo.+
5 No ilumöʼö ami kuaso Lowalangi börö me mamati ami enaʼö mitema wangorifi niʼombakhaʼö ba ngaluo safuria.
6 Andrö wa omuso sibai dödömi hewaʼae mitörö ngawalö wamakao gasa-gasa,+
7 enaʼö tesuno ami börö me no tetandraigö wamatimi,+ ba mitema lakhömi awö zumange ba waʼatoʼele Yesu Keriso.+ Famati simane daʼö zabölö ebua böli moroi ba ganaʼa si tola tekiko hewaʼae no mutunu ba galitö.
8 Hewaʼae lö irai miʼila ia, hizaʼi miʼomasiʼö ia. Lö miʼila ia iadaʼa, ba tola mamati ami khönia si fao faʼowua-wua dödö ba faʼomuso dödö sebua si tebai mukhalaigö,
9 börö me mifaduhusi tödö wa famatimi andrö zangorifi yaʼami.+
10 Fangorifi daʼa niʼalui ba niʼosisiʼö ndra samaʼeleʼö, si no mamaʼeleʼö faʼasökhi dödö sebua* andrö niforomaʼö khömi.+
11 Ba zilalö, no ifaduhuʼö khöra eheha niʼamoniʼö sanandrösa ba wamakao nitaögö Keriso+ hegöi lakhömi niʼokhögönia dania. Börö daʼö, lahaogö wangosisiʼö hadia zalua khö Keriso ba hawaʼara alua daʼö.+
12 Lafatunö khöra wa tenga soguna khöra halöwö nifaluara, hizaʼi soguna khömi. Lasura fefu zi no laturiaigö khömi, nirongomi ba niha sanuriaigö turia somuso dödö börö wanolo geheha niʼamoniʼö moroi ba zorugo.+ Daʼa göi zomasi laʼila ira malaʼika.
13 Börö daʼö, mifaʼanö wangera-ngerami ba halöwö andrö.+ Mirorogö wangera-ngerami enaʼö ohahau.+ Miʼanötöna ba waʼasökhi dödö sebua* nitemami dania na iforomaʼö kuasonia Yesu Keriso.
14 Börö me iraono soloʼö-loʼö ami, böi saʼae ifatörö ami fangisö andrö nifaluami mböröta, fatua lö misöndra waʼaboto ba dödö.
15 Hizaʼi, simane Lowalangi Niʼamoniʼö sogaoni yaʼami, miʼamoniʼö ami ba ngawalö gamuatami,+
16 börö me so ba zura, ”Miʼamoniʼö ami, me no niʼamoniʼö ndraʼo.”+
17 Na muʼao ami khö Nama, sanguhuku si lö ebua dödö zambuana+ moloʼö amuata zamösana, miforomaʼö ba gamuatami wa miʼataʼufi ia+ sagötö tobali ami niha si fatewu ba gulidanö.
18 No tehöli* ami moroi ba lala waʼauri si möi zaya-zaya gölö niröi ndra tuami, ba miʼila wa sangefaʼö yaʼami tenga si taya, tenga firö mazui anaʼa,+
19 hizaʼi do Keriso+ sebua böli,+ si hulö ndro nono mbiri-biri si lö taʼunö ba si lö sinegu.+
20 Sindruhu sa wa no laʼila waʼatoharenia fatua lö tumbu ngaʼötö niha ba gulidanö,*+ hizaʼi iforomaʼö ia ba ngaluo safuria börö ami.+
21 Börö ia wa tola faduhu dödömi khö Lowalangi,+ sanusugi yaʼia moroi ba gotalua niha si no mate+ ba sameʼe khönia lakhömi,+ irege mamati ba manötöna ami khö Lowalangi.
22 Iadaʼa no muhaogö ami börö me no miʼoʼö zindruhu irege miʼokhögö waʼomasi ba waʼafatalifusöta si lö famini tödö.+ Andrö, sindruhu-ndruhu faoma miʼomasiʼö nawömi soroi ba dödö.+
23 No ifuli tumbu ami,+ tenga moroi ba danömö si tola taya, hizaʼi moroi ba danömö si tebai taya,+ si otarai ba daromali Lowalangi sauri, si lö tebulö sagötö faʼara.+
24 So ba zura, ”Fefu niha amaedola ndruʼu, ba lakhöminia hulö mbunga ba mbenua; oköli ndruʼu ba aleu mbunga,
25 hizaʼi lö tebulö daromali* Yehowa* andrö irugi zi lö aetu.”+ Eluaha ”daromali”* andrö yaʼia daʼö turia somuso dödö nifaʼema khömi.+
Nisura ba gahe zura
^ Faigi Geluaha Ngawua Wehede.
^ Faigi Geluaha Ngawua Wehede.
^ Faigi Geluaha Ngawua Wehede.
^ Mazui ”teʼefaʼö”.
^ Eluahania daʼa iraono Gadamo ba Khawa.
^ Mazui ”wehede”.
^ Mazui ”wehede”.
