Sara Korindro 10:1-33
10 Yaʼami ira talifusö, omasido na miʼila wa barö lawuo mowaö-waö ndra tuada me föna,+ ba laʼötö nasi.+
2 Fefu ira tebayagö idanö tobali soloʼö Moze me mowaö-waö ira barö lawuo ba me laʼötö nasi.
3 Fagölö-gölö laʼa gö si otarai khö Lowalangi,+
4 ba fagölö-gölö labadu nidanö si otarai khö Lowalangi.+ Labadu nidanö moroi ba gara si fao khöra andrö si otarai Lowalangi, yaʼia daʼö Keriso.+
5 Hewaʼae simanö, ato moroi ba gotaluara zi fatuwu Lowalangi yaʼia me tehori ira ba danö si mate.+
6 Fefu daʼa tobali famahaʼö khöda, enaʼö böi taʼisö zi lö sökhi simane nifaluara.+
7 Böi tafosumange nadu, simane nifaluara ösa. So ba zura, ”Manga ba mamadu ira, ba omuso-muso dödöra.”+
8 Böi tafalua gamuata wohorö* simane nifaluara ösa, irege 23.000 zi mate ha ba zi maʼö-maʼökhö.+
9 Böi tandraigö Yehowa*+ simane nifaluara ösa irege idou ira ulö ba mate.+
10 Böi mukökö-kökö ita simane yaʼira+ irege ibunu ira malaʼika.+
11 Fefu zalua andrö tobali famahaʼö, ba tesura ia si möi famangelama khöda+ yaʼita sauri ba götö safuria andre.
12 Na so zangumaʼö tödönia si zizio ia, ba yamufaigi enaʼö böi alau ia.+
13 Fanandraigö salua khömi sindruhunia ha fanandraigö si toʼölö alua ba niha.+ Lö faröi Lowalangi, lö ilulu ami ba wanandraigö si tebai mitaha.+ Na göna ami fanandraigö, ifaigi lala enaʼö tola anau gölömi ba wanaögö yaʼia.+
14 Börö daʼö yaʼami ira talifusö niʼomasiʼögu, miheta ami ba wanömba adu andrö.+
15 Fahuhuo ndraʼo khömi yaʼami niha sagatua-tua. Yaʼami zangai angetula hadia atulö niwaʼögu andre.
16 Hadia tenga do Keriso andrö geluaha mako nagu niʼandröda saohagölö khö Lowalangi?+ Hadia tenga boto Keriso andrö geluaha roti niboboto?+
17 Ha sambua roti ba yaʼita fefu zi manga. Hewaʼae ato ita, ha sambua boto ita maʼafefu.+
18 Tandraigö atö törö tödöu ndraono Gizaraʼeli ba waʼaniha: Niha si manga sumange ba naha wanunu sumange, hadia tenga hulö no fao ira falulu manga khö Lowalangi?+
19 Na simanö hewisa? Hadia so gunania zumange nibeʼe ba nadu mazui so geluaha nadu andrö?
20 Löʼö. Eluaha niwaʼögu, niha sanömba adu labeʼe zumange khö ndra malaʼika si lö sökhi tenga khö Lowalangi,+ ba lö omasi ndraʼo na falulu manga ami khö ndra malaʼika si lö sökhi andrö.+
21 Tebai faoma mibadu nösi mako moroi khö Yehowa* ba mibadu göi nösi mako moroi khö ndra malaʼika si lö sökhi, mazui manga ami ba ”meza Yehowa”*+ hegöi ba meza malaʼika si lö sökhi.
22 ’Hadia omasi ita taʼandrö wönu Yehowa’?*+ Hadia abölö ita moroi khönia?
23 Tola mufalua fefu hadia ia ba lö fefu oi moguna. Tola mufalua fefu ba lö fefu möi famarou dödö.+
24 Böi ha soguna khönia iʼangeragö zamösana, hizaʼi soguna ba niha böʼö.+
25 Tola muʼa fefu nagole niʼamawa ba fasa, ba lö moguna mizofu-zofu börö dödömi side-ide,
26 me ”Yehowa* zangokhögö ulidanö awö nösinia maʼafefu”.+
27 Na lakaoni ami si tenga si sara lala wamati ba edöna möi ami, miʼa fefu hadia ia nibeʼera fönami. Lö moguna mizofu-zofu daʼö börö dödömi side-ide.
28 Hizaʼi na so zangumaʼö, ”Ö daʼa sumange nibeʼe ba nadu”, böi miʼa. Enaʼö böi tobali fangala ba niha daʼö hegöi ba dödönia side-ide.+
29 Eluaha niwaʼögu tenga tödömi side-ide, hizaʼi tödö niha daʼö samösa. Lö omasido na ihuku ndraʼo tödö niha böʼö.+
30 Na uʼa gö si fao fangandrö saohagölö, hadia uʼa ia na tobali fangoʼayagu samösa?+
31 He si manga ami mazui samadu ba gofu hadia nifaluami, mifalua ia ba wamolakhömi Lowalangi.+
32 Böi tobali ami fangala ba niha Yahudi, ba niha Yunani, mazui ba mbanua niha Keriso khö Lowalangi.+
33 Miʼoʼö zimane yaʼo, sangomusoiʼö tödö niha ba ngawalö fefu hadia ia, tenga ha soguna khögu uʼera-era+ hizaʼi soguna ba niha böʼö enaʼö teʼorifi ira.+
Nisura ba gahe zura
^ Faigi Geluaha Ngawua Wehede.
