Sara Korindro 11:1-34
11 Miʼoʼö ndraʼo, simane foloʼögu Keriso.+
2 Usuno ami börö me itörö-törö tödömi ndraʼo ba miʼoʼö wanuturu lala nibeʼegu khömi.
3 Omasido na miʼila wa högö ndra matua yaʼia daʼö Keriso,+ högö ndra alawe yaʼia daʼö ira matua,+ ba högö Keriso yaʼia daʼö Lowalangi.+
4 Na mangandrö mazui mamaʼeleʼö ndra matua ba ifake mbalu-balu högö, no iʼoʼaya högönia.
5 Na mangandrö mazui mamaʼeleʼö ndra alawe+ ba lö ifake mbalu-balu högö, no iʼoʼaya högönia börö me fagölö ira ndra alawe si no muhori bu högö.
6 Na lö ifake mbalu-balu högö ira alawe, sökhi na itöwö ia. Na aila ia nitöwö, sökhi na ifake mbalu-balu högö.
7 Tebai lafake mbalu-balu högö ira matua börö me khili-khili ba lakhömi Lowalangi ira,+ na ira alawe khili-khili lakhömi ndra matua.
8 Tenga moroi ba ndra alawe tewöwöi ndra matua, hizaʼi moroi ba ndra matua tewöwöi ndra alawe.+
9 Wa tewöwöi ndra matua tenga börö ndra alawe, hizaʼi wa tewöwöi ndra alawe börö ndra matua.+
10 Börö daʼö, lö tola löʼö ifake mbalu-balu högö ira alawe si tobali tandra wa barö mbawa so ia, börö ndra malaʼika andrö.+
11 Hewaʼae simanö, ba gotalua zoloʼö Soʼaya, lö tefabali ndra alawe moroi ba ndra matua ba lö göi tefabali ndra matua moroi ba ndra alawe.
12 Moroi ba ndra matua ndra alawe,+ ba moroi ba ndra alawe tumbu ndra matua. Hizaʼi fefu hadia ia moroi khö Lowalangi.+
13 Mitimba tödömi: Hadia moadu ba ndra alawe na mangandrö ia khö Lowalangi na lö ifake mbalu-balu högö?
14 Si toʼölönia, hadia tenga fangoʼaya ba ndra matua na anau mbunia,
15 awö wa no lakhömi ndra alawe na anau mbunia? Tebeʼe mbu sanau ba ndra alawe si tobali balu-balu högönia.
16 Hizaʼi, na so zi lö fao tödö ba omasi ia iʼoʼö zi toʼölö lafalua niha, aboto ba dödöda wa lö toʼölö tafalua danö böʼö, simanö göi mbanua niha Keriso khö Lowalangi.
17 Me ubeʼe khömi wanuturu lala andre, lö usuno ami börö me lö gunania gangowuloa nifaluami andrö, no tobali fangawuwu.
18 Si oföna, no urongo me owulo ami ba mbanua niha Keriso, so waʼudusa ba gotaluami. Faduhu dödögu me urongo daʼö.
19 Tatu alua khömi waʼafaehu gera-era ba aboto wahasara dödömi+ irege oroma dania niha nitema Lowalangi ba gotaluami.
20 Me owulo ami wemanga ba Mbongi Watomesa Zoʼaya,+ sindruhunia tenga daʼö gohitö dödömi.
21 Me manga ami, so ba gotaluami zi no oföna manga, irege so zolofo ba so zi mabu.
22 Hana wa tenga ba nomomi manga ba mamadu ami? Hadia miʼosiwawöi mbanua niha Keriso ba miʼailasi niha si numana? Hadia zinangea uwaʼö khömi? Hadia usuno ami? Lö usuno ami ba daʼö.
23 Hadia nitemagu moroi khö Zoʼaya no ufatunö khömi. Ba mbongi+ fatua lö teʼa mböli Zoʼaya Yesu, ihalö roti
24 ba iʼandrö saohagölö, iboboto roti andrö imane, ”Amaedola mbotogu daʼa+ nibeʼe soguna khömi. Böi miböhöli wamalua daʼa ba wanörö tödö yaʼo.”+
25 Me no aefa manga ira ba zi bongi, ifalua göi zimane daʼö ba mako andrö.+ Imane, ”Mako andre amaedola mbuʼusa li si bohou+ si no muʼetuʼö ba ndrogu.+ Ero na mibadu daʼa, mitörö-törö tödömi ndraʼo.”+
26 Ero na miʼa roti ba mibadu nösi mako andre, miʼombakhaʼö waʼamate Zoʼaya irege tohare ia.
27 Tobali, na so zi manga roti ba samadu ösi mako andrö khö Zoʼaya si tenga sinangea, fasala ia börö me no iʼosiwawöi mboto awö ndro Zoʼaya.
28 Dozi niha moguna isekhegö dödönia ua na sinangea ia,+ awena tola iʼa roti ba ibadu nösi mako andrö.
29 Na so zi manga awö zamadu hizaʼi lö aboto ba dödönia geluaha mboto andrö, no iʼa ba ibadu zi möi fanguhukunia.
30 Daʼö mbörö wa ato ba gotaluami zambö faʼabölö, sofökhö ba mate.*+
31 Hizaʼi, na no tasekhegö dödöda ba na sinangea ita, lö tehuku ita.
32 Na tehuku ita, Yehowa* zameʼe khöda fotu,+ enaʼö lö fao ita na tehuku gulidanö andre.+
33 Andrö yaʼami ira talifusö, faoma mibaloi nawömi na owulo ami ba wemanga.
34 Na so zolofo, akha manga ia ua ba nomo, enaʼö lö mifobörö khömi huku na owulo ami.+ Ba hadia ia danö böʼö, na so ndraʼo dania awena uʼatulöʼö.
