Sara Korindro 12:1-31
12 Iadaʼa yaʼami ira talifusö, omasido na miʼila fefu mbuala si otarai Lowalangi.+
2 Aboto ba dödömi me lö samati ami nasa,* ladönisi ba lafaelungu ami ba wanömba adu si lö hede,+ ba miʼoʼö manö gofu hezo laʼohe ami.
3 Iadaʼa, omasido na miʼila wa tebai iwaʼö niha si fahuhuo niʼoʼou geheha Lowalangi, ”Si göna fangelifi Yesu!” Ha niʼoʼou geheha niʼamoniʼö zi tola mangumaʼö, ”Yesu andrö Soʼaya!”+
4 Oya ngawalö mbuala, hizaʼi ha sambua geheha niʼamoniʼö.+
5 Oya ngawalö halöwö khö Lowalangi,+ hizaʼi ha samösa Zoʼaya.
6 Oya ngawalö halöwö, hizaʼi ha samösa Lowalangi, ba yaʼia mbörö wa tola lafalua ngawalö halöwöra niha.+
7 Oroma wanolo geheha niʼamoniʼö ba waʼauri zi samösa niha ba soguna khönia wa tebeʼe daʼö.+
8 So zanema buala faʼatua-tua ba wahuhuosa börö geheha niʼamoniʼö, so göi zanema buala faʼaboto ba dödö ba wahuhuosa börö geheha niʼamoniʼö si fagölö,
9 so zanema famati+ börö geheha niʼamoniʼö si fagölö, so zi tola mamadöhö fökhö+ börö geheha niʼamoniʼö,
10 so zamalua tandra sahöli-höli dödö,+ so zamaʼeleʼö, so göi zi tola mamaehusi hadia fehede daʼö moroi khö Lowalangi,+ so zi tola fahuhuo ba li böʼö,+ so zi tola mamoʼeluaha li.+
11 Fefu mbuala andrö moroi ba geheha niʼamoniʼö si fagölö, ba tebeʼe ba niha moloʼö somasi Lowalangi.
12 Ha sambua mboto ba oya ndroto-ndrotonia, hewaʼae oya ndroto-ndroto ba ha sambua mboto.+ Simanö göi mboto Keriso.
13 Tebayagö ita idanö tobali sambua boto ba zi sambua eheha. Hewaʼae niha Yahudi ita mazui niha Yunani, sawuyu mazui niha niʼefaʼö, dozi ita tatema geheha niʼamoniʼö si fagölö.
14 Boto andrö tenga ha sambua ndroto-ndrotonia, hizaʼi oya.+
15 Na imane ahe, ”Börö me tenga tanga ndraʼodo, tenga si faböbö ba mboto ndraʼo”, lö tebulö sa wa si faböbö ba mboto ia.
16 Na imane talinga, ”Börö me tenga hörö ndraʼodo, tenga si faböbö ba mboto ndraʼo”, lö tebulö sa wa si faböbö ba mboto ia.
17 Na fefu mboto andrö oi hörö, hadia tabeʼe famondrongo? Na fefu oi talinga, hadia tabeʼe fangago?
18 Hizaʼi, no ihonogöi Lowalangi nahia ndroto-ndroto ba mboto moloʼö somasi ia.
19 Na fagölö fefu ndroto-ndroto, hewisa khala-khala mboto andrö saʼae?
20 Sindruhu sa, oya ndroto-ndroto andrö, hizaʼi ha sambua mboto.
21 Tebai imane hörö ba danga, ”Lö moguna khögu ndraʼugö.” Ba tebai imane högö ba gahe, ”Lö moguna khögu ndraʼugö.”
22 Hizaʼi, moguna khöda ndroto-ndroto mboto sambö faʼabölö ba wamaigida,
23 ndroto-ndroto mboto sambö tafolakhömi ba no abölö taʼameʼegö tödö.+ Sambö moadu, ba abölö tafoadu nasa,
24 lö moguna tafoadu ndroto-ndroto si no moadu. No ihaogö ifaʼanö mboto andrö Lowalangi, iʼameʼegö tödö ndroto-ndroto sambö tefolakhömi,
25 enaʼö böi so waʼafabali ba mboto ba faoma laʼameʼegö tödö nawöra ndroto-ndroto andrö.+
26 Na mofökhö zi sambua ndroto-ndroto, ba oi irasoi ndroto-ndroto böʼö.+ Na tesuno zi sambua ndroto-ndroto, ba oi omuso dödö ndroto-ndroto böʼö.+
27 Yaʼami mboto Keriso,+ ba dozi ami ndroto-ndrotonia.+
28 No ihonogöi Lowalangi enaʼö so ba mbanua niha Keriso: si oföna sinenge,+ si dua samaʼeleʼö,+ si tölu samahaʼö,+ aefa daʼö halöwö safönu faʼabölö,+ buala ba wamadöhö fökhö,+ buala ba wameʼe fanolo, faʼatua-tua ba wondröniaʼö,+ ba buala ba wahuhuosa ba ngawalö li.+
29 Hadia fefu oi sinenge? Hadia fefu oi samaʼeleʼö? Hadia fefu oi samahaʼö? Hadia fefu oi samalua halöwö safönu faʼabölö?
30 Hadia oi dozi mangokhögö buala wamadöhö fökhö? Hadia oi dozi tola fahuhuo ba ngawalö li?+ Hadia oi dozi tobali samoʼeluaha? Tatu löʼö!+
31 Börö daʼö, miforege wangalui buala sabölö ebua+ ba uforomaʼö khömi dania lala sabölö sökhi.+
Nisura ba gahe zura
^ Sin.: ”me tobali ami niha baero”.
