Sara Korindro 2:1-16
2 Andrö yaʼami ira talifusö, me möi ndraʼo khömi wangombakha si tobini niʼamoniʼö andrö khö Lowalangi,+ lö uʼogunaʼö wehede sagalawa eluaha+ mazui faʼatua-tuagu enaʼö ahöli-höli dödömi,
2 börö me no uhalö gangetula enaʼö teʼosambuaʼö wangera-ngerami ha ba khö Yesu Keriso si no mate ba döla geu famakao.+
3 Me möi ndraʼo khömi, lö khögu faʼabölö, sataʼu ndraʼo ba sanizi-nizi.
4 Lö fahuhuo ndraʼo mazui mamahaʼö si fao fehede faʼatua-tua enaʼö faduhu dödömi, hizaʼi faoma fehede sangoromaʼö faʼabölö geheha niʼamoniʼö+
5 enaʼö mamati ami ba waʼabölö Lowalangi tenga ba waʼatua-tua niha.
6 Iadaʼa, ba gotalua niha saro famati,+ tafatunö sanandrösa ba waʼatua-tua, hizaʼi tenga faʼatua-tua ba gulidanö ba götö* daʼa mazui faʼatua-tua ndra samatörö si tola taya.+
7 Fahuhuo ita sanandrösa ba waʼatua-tua Lowalangi, si lö oroma ba zi tobini niʼamoniʼö andrö.+ Fatua lö lafazökhi gamakhoita ba waʼaniha, no ihonogöi Lowalangi nifaluania moloʼö faʼatua-tua andre enaʼö tefolakhömi ita.
8 Lö laʼila ira samatörö ba gulidanö ba götö* daʼa waʼatua-tua andrö,+ tatu na no laʼila, lö menaʼö labunu* Zoʼaya yaʼita andrö solakhömi.
9 Itörö niwaʼö ba zura, ”Hadia zi no ihenaigö Lowalangi ba niha sangomasiʼö yaʼia, lö irai oroma daʼö ba hörö niha, larongo talinga, mazui lakhalaigö.”+
10 Khöda ifatunö daʼö+ Lowalangi ba waʼabölö gehehania,+ börö me ehehania andrö zamatunö fefu hadia ia, farahu ba daʼö wangera-ngera Lowalangi sabölö abakha.+
11 Hadia so zi tola mangila fangera-ngera niha? Hadia tenga ha niha daʼö zangila? Simanö göi, lö sangila fangera-ngera Lowalangi baero na ifatunö khöda ehehania.
12 Tenga eheha gulidanö andre zameʼe fanuturu lala khöda, hizaʼi eheha niʼamoniʼö moroi khö Lowalangi+ irege aboto ba dödöda hadia zi sökhi niʼamualagönia khöda.
13 Tafatunö daʼö fefu, tenga faoma fehede nifahaʼö moloʼö faʼatua-tua niha,+ hizaʼi moloʼö fehede nifahaʼö geheha niʼamoniʼö.+ Tatutunö zanandrösa khö Lowalangi faoma fehede si otarai geheha niʼamoniʼö.
14 Na faʼaniha, lö itema ngawalö niforomaʼö geheha Lowalangi börö me lö faduhu dödönia. Tebai aboto ba dödönia, börö me moguna mufareso daʼö fefu faoma eheha Lowalangi.
15 Niha sangokhögö eheha Lowalangi, ifareso fefu hadia ia+ ba lö hadöi si tola manguhuku yaʼia.
16 So ba zura, ”Haniha sa zi no aboto ba dödö era-era Yehowa* irege tola lafahaʼö ia?”+ Hewaʼae simanö, taʼokhögö wangera-ngera Keriso.+
Nisura ba gahe zura
^ Faigi Geluaha Ngawua Wehede.
^ Mazui ”labunu ba döla geu”.
^ Faigi Geluaha Ngawua Wehede.
