Sara Korindro 3:1-23
3 He ira talifusö, fahuhuo ndraʼo khömi me föna tenga simane ba niha si so eheha Lowalangi,+ hizaʼi simane ba niha si so isö-isö dödö ba gulidanö, si hulö nono sawuyu+ ba khö Keriso.
2 Ubeʼe ömi susu tenga ö sabeʼe, börö me ambö nasa faʼabölömi. Iadaʼa manö lö khömi faʼabölö,+
3 börö me fangera-ngera niha niʼoʼömi.+ Na faoma afökhö dödömi ba faʼudu ami khö nawömi, hadia tenga fangera-ngera niha niʼoʼömi+ ba sasese lafalua niha böʼö?
4 Na imane si samösa ”khö Waulo ndraʼo”, imane tanö böʼö ”khö Afolo ndraʼo”,+ hadia tenga no fagölö mbua-buami simane niha böʼö?
5 Sindruhunia haniha Afolo andrö? Haniha Waulo andrö? Ha enoni+ Zoʼaya ndraʼaga sangai halöwö ba wanolo yaʼami tobali soloʼö khönia.
6 Yaʼodo zananö,+ Afolo zombuwui+ ba Lowalangi zamanöi.
7 Tobali, faya zananö ba faya zombuwui na tenga Lowalangi zamanöi.+
8 Ha sambua gohitö dödö zananö ba sombuwui, ba latema sa luora zamösana balazi halöwöra.+
9 Si falulu fohalöwö sa ndraʼaga ba halöwö Lowalangi, ba yaʼami nowi Lowalangi, tomosa Lowalangi.+
10 Börö me no utema waʼasökhi dödö sebua* moroi khö Lowalangi, andrö wa tola ufasa fondrasi+ simane tuka sonekhe, hizaʼi niha böʼö zamasindro tomosa ba detenia. Ba yamufaigi zamösana hewisa wamazökhinia tomosa andrö.
11 Lö hadöi si tola mamazökhi fondrasi tanö böʼö ba wogati fondrasi si no mufasa, yaʼia daʼö Yesu Keriso.+
12 Ba dete wondrasi andrö so niha samazökhi faoma anaʼa, firö, kara sebua böli, eu, duʼu soköli, mazui töla wakhe,
13 hizaʼi ba ginötönia dania oroma halöwö niha zamösana ba tetandraigö ba galitö,+ ba alitö andrö zangoromaʼö tomosa hadia zi no ifazökhi niha zamösana.
14 Na lö akhozi ba galitö domosa nifazökhi zi samösa niha, itema luonia dania.
15 Na akhozi, ba ebua ahori ia. Hewaʼae simanö, teʼorifi ia hizaʼi hulö niha niʼefaʼö moroi ba galitö.
16 Hadia lö miʼila wa osali Lowalangi ami+ awö wa nahia geheha niʼamoniʼö dödömi?+
17 Na so zamakiko osali Lowalangi andrö, nifakiko Lowalangi göi ia dania. Niʼamoniʼö sa gosali Lowalangi ba yaʼami gosalinia andrö.+
18 Böi milimo ami. Na so ba gotaluami zangumaʼö tödönia wa atua-tua ia moloʼö famaigi niha gulidanö ba götö* daʼa, abölö baga na hulö zambö era-era ia, enaʼö atua-tua ia ba wamaigi Lowalangi.
19 Faʼatua-tua niha gulidanö andre ba no faʼambö era-era ba khö Lowalangi, börö me so ba zura, ”Ibeʼe dandrawa ba niha sagatua-tua ba waʼonekhera samösa.”+
20 So ba zura, ”Iʼila Yehowa* wa zaya-zaya gölö gera-era niha satua-tua.”+
21 Börö daʼö, böi suno-suno niha. Fefu hadia ia ba no tobali okhötami.
22 Faulo, Afolo, Kefa,*+ ulidanö daʼa, faʼauri, faʼamate, he si so iadaʼa, mazui ba götö dania, fefu daʼö oi tana khömi.
23 Okhöta Keriso ami,+ ba okhöta Lowalangi Keriso.
Nisura ba gahe zura
^ Faigi Geluaha Ngawua Wehede.
^ Faigi Geluaha Ngawua Wehede.
^ Töi böʼö khö Wetero.
