Sara Korindro 4:1-21
4 Omasiga na miʼila wa enoni Keriso ndraʼaga ba sangonorogö tödö si tobini niʼamoniʼö andrö khö Lowalangi.+
2 Mutötöna ba niha sangonorogö tödö andrö enaʼö lö faröi ira ba halöwö nibeʼe khöra.
3 Moloʼö yaʼo, lö moguna khögu wanguhuku moroi khömi hegöi ba zanguhuku niha gulidanö. Lö göi uhuku ndraʼo samösa.
4 Lö uʼila na so zala nifaluagu, hizaʼi tenga daʼö geluahania wa niha satulö ndraʼo. Yehowa* zanguhuku yaʼo.+
5 Andrö, böi mihuku+ gofu haniha na lö irugi inötönia, fatua lö tohare Zoʼaya. Iforomaʼö dania ngawalö zi tobini andrö si so ba zogömi-gömi ba ifatunö nösi dödö niha, ba dozi niha latema wanuno moroi khö Lowalangi.+
6 Yaʼami ira talifusö, ubaliʼö ndraʼo duma-duma hegöi Afolo+ ba wahuhuosa khömi enaʼö aboto ba dödömi nifakhoi andre: ”Böi misawö zi no tesura.” Na mifalua daʼö, lö khömi fayawasa+ ba lö miwaʼö tödömi wa so niha sabölö sökhi moroi khömi.
7 Hadia gamaehutami ba niha böʼö? Sindruhunia, hadia tenga buala fefu niʼokhögömi andrö?+ Na sindruhu buala daʼö, hana wa fayawa ami hulö na tenga buala?
8 Hadia no ahono dödömi ba zi so khömi? Hadia no kayo ami? Hadia no mamatörö ami tobali razo+ ba zi lö yaʼaga? Utötöna sibai wa no mamatörö ami tobali razo, enaʼö fao ndraʼaga göi khömi ba wamatörö tobali razo.+
9 Hulö no ifataro ndraʼaga Lowalangi tobali sinenge nibunu, nifaigi-faigi zato ba gafuriata,+ börö me no tobali ndraʼaga famaʼiki gulidanö,+ malaʼika, hegöi niha.
10 Sambö tödö ndraʼaga+ ba khö Keriso, hizaʼi atua-tua ami ba khö Keriso. Si tebai ndraʼaga ba sabölö ami. Nifosumange ami ba niʼoʼaya-aya ndraʼaga.
11 Irugi iadaʼa solofo ndraʼaga+ ba sowökhi tödö,+ si lö famohani,* niböbözi,+ si lö omo,
12 maforege wohalöwö faoma tangama samösa.+ Me laʼoʼaya ndraʼaga, mafahowuʼö ira.+ Me lafakao ndraʼaga, ba mahöna khöma waʼebolo dödö ba wanaögö.+
13 Me laböbögö khöma zi lö duhu, mahaogö wanema li.+ Irugi iadaʼa, hulö zasao gulidanö ndraʼaga nitiboʼö niha.
14 Wa usura daʼa fefu tenga ba wangailasi yaʼami, hizaʼi ba wameʼe khömi mene-mene börö me onogu omasiö ami.
15 Hewaʼae na so 10.000 zanuturu lala samahaʼö yaʼami ba woloʼö Keriso, lö ato namami. Hizaʼi, tobali ndraʼo amami börö me yaʼo zolohe turia somuso dödö khömi sanandrösa khö Keriso Yesu.+
16 Börö daʼö, uʼandrö khömi enaʼö miʼoʼö ndraʼo.+
17 Iadaʼa, ufatenge khömi Dimoteo, börö me onogu omasiö ia si lö faröi ba wangai halöwö khö Zoʼaya. Yaʼia dania zamasugi ba dödömi hewisa lalagu ba wangai halöwö khö Keriso Yesu,+ simane nifahaʼögu ba mbanua niha Keriso misa.
18 So ösa ba gotaluami zi fayawa börö me lawalinga lö tohare ndraʼo.
19 Hizaʼi, lö ara tö tohare ndraʼo na daʼö nitehegö Yehowa.* Omasido uʼila niha si fayawa andrö, tenga enaʼö urongo wehedera, hizaʼi ba wamaigi hadia niʼoʼou geheha Lowalangi ira mazui tenga,
20 börö me Famatörö Lowalangi tenga ba wehede, hizaʼi faʼabölö Lowalangi.
21 Hezo zomasi ami: tohare ndraʼo si fao fönu sabölö-bölö,*+ mazui si fao faʼomasi ba falöʼalio mofönu?
