Sara Korindro 9:1-27
9 Hadia tenga tebai ufalua hadia ia zomasido? Hadia tenga sinenge ndraʼo? Hadia lö niʼilagu Yesu Soʼaya yaʼita?+ Hadia tenga bua halöwögu ami andrö khö Zoʼaya?
2 Hewaʼae tenga sinenge ndraʼo ba danö böʼö, no sinenge ndraʼo ba khömi! Yaʼami zamaduhuʼö wa yaʼodo andre sinenge khö Zoʼaya.
3 Daʼa wamuʼa ba hulugu ba niha sanguhuku yaʼo:
4 Hadia tenga sinangea na manga ba mamadu idanö ndraʼaga?
5 Simane ira sinenge tanö böʼö, talifusö Zoʼaya+ hegöi Kefa,*+ hadia tenga sinangea na fao khöma woʼomoma ira alawe si sara lala wamati?+
6 Mazui hadia ha Baranaba+ faoma yaʼo zi tebai mamöhöli wangalui soguna?
7 Hadia so zaradadu sohalöwö sangogunaʼö kefenia samösa? Hadia so zamazökhi kabu nagu ba lö iʼa mbua?+ Mazui, hadia so gubalo si lö mamadu susu gurifönia?
8 Hadia fehedegu andre ha fangera-ngera niha? Hadia tenga no tesura göi ba Goroisa Moze?
9 No tesura ba Goroisa Moze, ”Böi böbö mbawa zawi samöbörö gandru.”+ Hadia sawi daʼö nifaigi Lowalangi?
10 Hadia soguna khöda wehede daʼö? Wa lasura ia soguna khöda, börö me hasambalö latötöna luora he samaku tanö hegöi samöbörö basitö.
11 Börö me no mafazaewe danömö si otarai Lowalangi ba waʼaurimi, hadia fasala ndraʼaga na matema wanolo moroi khömi ba zoguna khöma?+
12 Na niha böʼö manö sinangea latema daʼö moroi khömi, hadia tenga mendrua manö ndraʼaga? Hewaʼae simanö, lö niʼandrö-andröma khömi.+ Mataögö manö fefu hadia ia, enaʼö lö tobali ndraʼaga taha-taha ba duria somuso dödö andrö sanandrösa khö Keriso.+
13 Hadia lö aboto ba dödömi wa ba gosali latema göra niha sohalöwö ba gosali, ba sohalöwö ba naha wanunu sumange ba daʼö latema dana khöra moroi ba naha wanunu sumange andrö?+
14 Simanö göi, ifatenge Soʼaya zanuriaigö turia somuso dödö enaʼö auri ira ba duria somuso dödö andrö.+
15 Hizaʼi, maʼifu na no uʼogunaʼö zi no mufakhoi andrö.+ Wa usura daʼa tenga enaʼö so dana khögu. Abölö sökhi na mate ndraʼo moroi na taya khögu gumbu waʼomuso dödö!+
16 Hewaʼae na uʼombakhaʼö khömi duria somuso dödö, tenga daʼa mbörö wa tesuno ndraʼo börö me sinangea ufalua daʼö. Alai sa ndraʼo na lö uʼombakhaʼö duria somuso dödö andrö!+
17 Na ufalua ia si fao faʼaoha gölö, hasambalö utema luogu. Ba na hulö nifaso ndraʼo wamalua yaʼia, lö tebulö wa tebeʼe khögu halöwö andrö.+
18 Tobali, hadia luogu? Yaʼia daʼö tola ufaʼema duria somuso dödö lö böli, irege lö fasala wangogunaʼögu hadia zinangea utema ba wanuriaigö turia somuso dödö.
19 Hewaʼae na tenga sawuyu niha ndraʼo, ubaliʼö ndraʼo sawuyu niha fefu enaʼö ato nitologu.
20 Ba niha Yahudi, ubaliʼö ndraʼo niha Yahudi enaʼö tola utolo ira.+ Ba niha si no teböbö ba huku, ubaliʼö ndraʼo hulö niha si no teböbö ba huku enaʼö tola utolo ira, hewaʼae sindruhunia lö si teböbö ndraʼo ba huku.+
21 Ba niha si lö teböbö ba huku, ubaliʼö ndraʼo si lö teböbö ba huku enaʼö tola utolo ira hewaʼae no teböbö ndraʼo ba huku Lowalangi hegöi huku Keriso.+
22 Ba niha sambö faʼabölö, ubaliʼö ndraʼo niha sambö faʼabölö enaʼö tola utolo ira.+ Gofu hewisa lala nitörö, uforege wamalua hadia ia enaʼö teʼorifi fefu niha.
23 Ufalua gofu hadia ia börö duria somuso dödö, ba wangombakha ba niha fefu.+
24 Hadia lö aboto ba dödömi wa fagohi fefu niha na fatandri ba wagohisa, hizaʼi ha samösa zanema buala? Börö daʼö, miforege wagohisa enaʼö mitema mbuala andrö.+
25 Fefu zi fatandri moguna lataha dödöra ba ngawalö hadia ia. Wa lafalua daʼö enaʼö latema dakula si tola tekiko,+ na yaʼita tatema dakula si tebai tekiko.+
26 Andrö lö fagohi ndraʼo na lö lua-lua,+ ba ufaudugö wanezugu enaʼö lö utezu dalu mbanua.
27 Ufakao* mbotogu+ ba uʼosawuyu enaʼö lö itimbagö* ndraʼo Lowalangi me no ufahaʼö niha böʼö.
