1 Moze 11:1-32
11 Me luo daʼö, ha sambua li niʼogunaʼö niha ba gulidanö ba fagölö ngawua wehedera.
2 Me mofanö ira numalö ba gatumbukha, lasöndra ndraso sebolo ba mbanua Zineara+ ba toröi ira ba daʼö.
3 Ba faoma lamane khö nawöra, ”Datafazökhi batu bata ba tatunu.” Laʼogunaʼö batu bata fangali gara, ba asipala zi tobali famakitö.
4 Aefa daʼö lamane, ”Datafazökhi khöda mbanua sebua hegöi malige salawa sirugi mbanua si yawa, enaʼö tehöngö döida ba lö muzawili ita misa ba zi sagörö ulidanö.”+
5 Möi mitou Yehowa ba wamaigi banua andrö awö malige nifazökhi ndra niha daʼö.
6 Imane Yehowa, ”Hiza! Hasara dödö ndra niha daʼa börö me ha sambua li niʼogunaʼöra.+ Na tola lafalua daʼa, tatu manö tola lafalua dania zomasi dödöra.
7 Aine! Möi ita+ mitou ba tafawukaisi lira enaʼö faoma lö laʼila geluaha.”
8 Daʼö nifalua Yehowa ba wamazawili yaʼira misa ba zi sagörö ulidanö,+ ba ara manö laböhöli wamazökhi banua andrö.
9 Daʼö mbörö wa lafotöi mbanua andrö Babeli,*+ börö me ba daʼö ifawukaisi Yehowa li niʼogunaʼö niha ba zi sagörö ulidanö, ba muzawili niha ibeʼe Yehowa misa ba zi sagörö ulidanö.
10 Daʼa waö-waö Zemi.+
Dua fakhe me no aefa Anönö Danö Idanö, me no 100 fakhe ndröfi Zemi, tumbu khönia nono sotöi Arafasa.+
11 Me no tumbu khönia Garafasa, 500 fakhe tö nasa waʼanau noso Zemi. Tumbu khönia nono matua hegöi ono alawe.+
12 Me no irugi 35 fakhe ndröfi Garafasa, tumbu khönia nono sotöi Sela.+
13 Me no tumbu khönia Zela, 403 fakhe tö nasa waʼanau noso Garafasa. Tumbu khönia nono matua hegöi ono alawe.
14 Me no irugi 30 fakhe ndröfi Zela, tumbu khönia nono sotöi Eberi.+
15 Me no tumbu khönia Geberi, 403 fakhe tö nasa waʼanau noso Zela. Tumbu khönia nono matua hegöi ono alawe.
16 Me no irugi 34 fakhe ndröfi Geberi, tumbu khönia nono sotöi Felegi.+
17 Me no tumbu khönia Welegi, 430 fakhe tö nasa waʼanau noso Geberi. Tumbu khönia nono matua hegöi ono alawe.
18 Me no irugi 30 fakhe ndröfi Welegi, tumbu khönia nono sotöi Reu.+
19 Me no tumbu khönia Reu, 209 fakhe tö nasa waʼanau noso Welegi. Tumbu khönia nono matua hegöi ono alawe.
20 Me no irugi 32 fakhe ndröfi Reu, tumbu khönia nono sotöi Serugi.
21 Me no tumbu khönia Zerugi, 207 fakhe tö nasa waʼanau noso Reu. Tumbu khönia nono matua hegöi ono alawe.
22 Me no irugi 30 fakhe ndröfi Zerugi, tumbu khönia nono sotöi Nakhori.
23 Me no tumbu khönia Nakhori, 200 fakhe tö nasa waʼanau noso Zerugi. Tumbu khönia nono matua hegöi ono alawe.
24 Me no irugi 29 fakhe ndröfi Nakhori, tumbu khönia nono sotöi Tera.+
25 Me no tumbu khönia Dera, 119 fakhe tö nasa waʼanau noso Nakhori. Tumbu khönia nono matua hegöi ono alawe.
26 Me no irugi 70 fakhe ndröfi Dera, tumbu khönia nono sotöi Aberamo,+ Nakhori+ ba Harana.
27 Daʼa waö-waö Dera.
Ono matua si tumbu khö Dera yaʼia daʼö Aberamo, Nakhori ba Harana. Tumbu nono matua khö Harana sotöi Loti.+
28 Me lö si mate nasa namania Tera, mate Harana ba danö si tumbu yaʼia, ba Guri,+ banua niha Galedaia.+
29 Mangowalu Gaberamo ba simanö göi Nakhori. Foʼomo Gaberamo töinia Saraʼi,+ ba töi woʼomo Nakhori yaʼia daʼö Milika,+ samösa moroi ba gotalua nono alawe khö Harana. Ono alawe tanö böʼö khö Harana nasa yaʼia daʼö Yisika.
30 No teduhö naha nono Zaraʼi;+ lö ononia.
31 Aefa daʼö, iʼohe Tera nononia Aberamo, maʼuwunia Loti,+ yaʼia daʼö ono matua khö Harana, ba umönönia Saraʼi foʼomo Gaberamo. Mofanö ira moroi ba Guri, banua niha Galedaia, numalö ba mbanua Ganaʼana.+ Ba gafuriata, larugi Harana+ ba toröi ira ba daʼö.
32 Faʼanau noso Dera 205 fakhe, ba mate ia ba Harana.
Nisura ba gahe zura
^ Eluahania ”Faʼafawuka”.
