1 Moze 12:1-20
12 Imane Yehowa khö Gaberamo, ”Hetaʼö ba danöu, ba zi fahatö khöu hegöi ba nösi nomo namau, aeʼe ba danö niʼoromaʼögu khöu dania.+
2 Ubaliʼö ndraʼugö soi sebua. Ufahowuʼö ndraʼugö ba uʼebuaʼö döimö, ba tobali howu-howu ndraʼugö ba niha böʼö.+
3 Ufahowuʼö niha samahowuʼö yaʼugö ba uʼelifi niha sangelifi yaʼugö.+ Moroi khöu tefahowuʼö dania fefu soi ba gulidanö.”+
4 Simane niwaʼö Yehowa, mofanö Gaberamo ba fao khönia Loti. Me mofanö Gaberamo moroi ba Harana, 75 fakhe ndröfinia.+
5 Mofanö Gaberamo ba Ganaʼana,+ iʼohe woʼomonia Saraʼi+ ba tana nononia Loti.+ Laʼohe fefu gama-gama si no laʼowuloi+ ba fefu zawuyu si so khöra ba Harana. Me larugi danö Ganaʼana,
6 iʼanöröi soi daʼö Aberamo irugi mbanua Zikhema,+ sahatö ba geu sebua ba More.+ Ba daʼö toröi niha Ganaʼana me luo daʼö.
7 Ifalukhaisi Gaberamo Yehowa imane, ”Ubeʼe dania soi daʼa+ khö ndra maʼuwumö.”+ Ba ihaogö naha wanunu sumange ba daʼö khö Yehowa si no mamalukhaisi yaʼia.
8 Aefa daʼö, findra ia ba mbanua si so ba hili tanö ba gatumbukha Mbetieli.+ Ifazökhi nose ba daʼö ba gotalua Mbetieli faoma Gaʼi+ (tanö ba gaekhula Mbetieli ba tanö ba gatumbukha Gaʼi). Ba daʼö ifazökhi naha wanunu sumange khö Yehowa+ ba ibörögö iʼangaröfili döi Yehowa.+
9 Ba mofanö Gaberamo isawa Negebi.+ Sagötö fofanönia, ifawuʼa-wuʼa wamazökhi osenia moloʼö nahia niruginia.
10 Me alua mbaŵa lofo ba soi daʼö, mofanö Gaberamo numalö ia ba Miserai. Ba daʼö toröi ia* gasa-gasa,+ börö me abölö-bölö sibai lofo andrö.+
11 Me arakhagö irugi Miserai, imane khö woʼomonia Saraʼi, ”Uʼandrö khöu, fondrondrongo wehedegu. Yaʼugö ira alawe si baga-baga.+
12 Na laʼila ndraʼugö ira niha Miserai, tatu lamane, ’Foʼomonia daʼö.’ Ba labunu ndraʼo ba laʼorifi ndraʼugö.
13 Uʼandrö khöu, waʼö khöra wa akhigu ndraʼugö enaʼö lö lafakao ndraʼo ba lö labunudo* börö ndraʼugö.”+
14 Ba me no irugi danö Miserai Aberamo, laʼila ira niha Miserai wa no fao khönia samösa ndra alawe si baga-baga.
15 Laʼila göi ndra alawe daʼö ira sondröniaʼö khö Waraʼo. Lafatunö khö Waraʼo waʼabaga-bagania irege laʼohe ia ba gödo Waraʼo.
16 Sökhi sibai gamuata Waraʼo khö Gaberamo börö ndra alawe daʼö. Ibeʼe khö Gaberamo mbiri-biri, sawi, kalide si matua ba si alawe, ondra,+ sawuyu ira matua ba sawuyu ira alawe.
17 Lö ara, ifatörö wamakao Yehowa khö Waraʼo awö nösi nomonia börö Zaraʼi, foʼomo Gaberamo andrö.+
18 Börö daʼö, ifakaoniʼö Gaberamo andrö Faraʼo imane, ”Hana wa öfalua daʼa? Hana wa lö öfatunö na foʼomou ia?
19 Hana wa öwaʼö, ’Akhigu ia,’+ irege maʼifutö tobali ia foʼomogu? Yaʼe woʼomou. Ohe ia ba miʼofanö!”
20 Ba ifatenge niha sohalöwö khönia Faraʼo ba wamasao Aberamo, foʼomonia ba fefu gokhötania.+
