1 Moze 13:1-18
13 Ba mofanö Gaberamo iröi danö Miserai numalö ia ba Negebi.+ Iʼohe woʼomonia ba fefu gokhötania. Fao göi khönia Loti.
2 Oya sibai gokhöta Gaberamo, oya gurifönia, firö ba anaʼa.+
3 Ba wofanönia iʼotarai Negebi numalö ba Mbetieli, ifawuʼa-wuʼa nosenia moloʼö nahia niruginia. Ofeta ia ba nahia si no irai toröi ia ba gotaluara Mbetieli faoma Gaʼi,+
4 ba daʼö no irai ifazökhi naha wanunu sumange mböröta. Ba daʼö iʼangaröfili döi Yehowa Aberamo.
5 Me fao Loti khö Gaberamo, so göi mbiri-birinia, sawi hegöi ose.
6 Lua-luania, ambö nahara danö nirugira. Oya sibai gokhötara irege tebai fao ira na ba daʼö manö laʼiagö.
7 Daʼö mbörö wa fasoso gubalo gurifö Gaberamo khö gubalo gurifö Loti. (Me luo daʼö, toröi ba daʼö niha Ganaʼana faoma niha Weresi.)+
8 Andrö imane Aberamo khö Loti,+ ”Yaʼita andre si fatalifusö, lö sökhi na fasoso ita ba simanö göi gubalo guriföda.
9 Andrö, sökhi na fabali ita. Tola öfili hezo zomasiʼö ba danö daʼa. Na numalö ndraʼugö ba gabera, ba möido ba gambölö. Hizaʼi, na numalö ndraʼugö ba gambölö ba möido ba gabera.”
10 Ifakhölö ia Loti ifaigi zi fasuinia, ba iʼila wa oya nidanö ba zi sagörö tanö Yoridano+ ofeta ba Zoara,+ simane kabu Yehowa,+ simane tanö Miserai (fatua lö nidudugö Yehowa Zodoma faoma Gomora).
11 Ifili khönia Loti fefu danö Yoridano maʼasagörö ba ifawuʼa nosenia tanö ba gatumbukha. Fabali ira.
12 Ba danö Ganaʼana toröi Gaberamo, ba toröi Loti ahatö ba mbanua si so ba Yoridano.+ Ifasindro nosenia ahatö Zodoma.
13 Fondrege waʼalösökhi niha Zodoma andrö ba lafalua horö sebua föna Yehowa.+
14 Imane Yehowa khö Gaberamo me no fabali ira Loti, ”Faigi fasuimö ba nahia si zizio yaʼugö, fakhölöʼö tanö yöu, tanö raya, tanö ba gatumbukha, ba tanö ba gaekhula.
15 Fefu danö niʼilamö andrö, ba ubeʼe khöu dania hegöi ba maʼuwumö, enaʼö tobali okhötami sagötö faʼara.+
16 Uʼoyaʼö maʼuwumö simane faʼoya gawu-gawu ba danö. Na so zi tola mangerai faʼoya gawu-gawu ba danö, awena tola laʼerai waʼoya maʼuwumö.+
17 Iadaʼa, anöröi fefu soi daʼa börö me ubeʼe khöu dania.”
18 Börö daʼö, ifawuʼa-wuʼa nosenia moloʼö nahia niruginia Aberamo. Samuza inötö, ofeta ia ba Heberona.+ Toröi ia ahatö ba geu segebua ba Mamere.+ Ba daʼö ifazökhi naha wanunu sumange khö Yehowa.+
