1 Moze 15:1-21
15 Me no awai daʼö fefu, imane Yehowa khö Gaberamo ba gangilata, ”Böi ataʼufi+ Aberamo. Yaʼodo mbalusemö.+ Ötema dania howu-howu sebua.”+
2 Imane Aberamo, ”He Yehowa Lowalangi Fondrege Zalawa, lö hadöi onogu, ba sangokhögö dania haratogu yaʼia daʼö Eliezeri niha Ndramaseko andrö. Tobali, hadia gunania khögu howu-howu daʼö?”+
3 Imane nasa Aberamo, ”Lö nibeʼeu khögu ngaʼötö,+ ba samösa dania zawuyu* ba nomogu zanema ondröitagu.”
4 Imane Yehowa, ”Tenga niha daʼö zanema ondröitamö dania. Onou samösa* zanema ondröitamö.”+
5 Iwaʼö khö Gaberamo weʼamöi baero imane, ”Faigi dalu mbanua ba na tola, erai hawaʼoya ndröfi.” Imane nasa, ”Simane daʼö waʼoya maʼuwumö dania.”+
6 Mamati Gaberamo khö Yehowa+ ba daʼö mbörö wa satulö ia iwaʼö Lowalangi.+
7 Imane nasa Lowalangi, ”Yaʼo Yehowa si no mangeheta yaʼugö ba danö Guri banua niha Galedaia, ba wameʼe khöu tanö daʼa tobali tana khöu.”+
8 Imane Aberamo, ”He Yehowa Lowalangi Fondrege Zalawa, hewisa enaʼö faduhu dödögu wa uʼokhögö dania daʼö?”
9 Imane Lowalangi, ”Halö khögu sageu nono zawi si alawe, nambi si alawe awö mbiri-biri si matua. Fefu daʼö si tölu fakhe faʼebua. Halö göi marafadi hegöi ono wune.”
10 Ihalö fefu gurifö daʼö Aberamo ba ibagi dua wanaba. Faoma ifatahö maʼadombua, hizaʼi lö itaba wofo andrö.
11 Ba tohare wofo si manga nagole lahawui goboula andrö, hizaʼi lö iböhöli Aberamo wanaboi yaʼira.
12 Me arakhagö aekhu luo, manuköu sibai Gaberamo irege mörö ia, ba mangifi ia ihawui ia faʼogömi-gömi si fao faʼataʼu.
13 Imane Lowalangi khö Gaberamo, ”Yaʼaboto ba dödöu wa tobali niha si fatewu maʼuwumö ba soi böʼö, laʼosawuyu ba lafakao ira ba daʼö sagötö zi 400 fakhe waʼara.+
14 Ba yaʼo dania zanguhuku soi sangosawuyu yaʼira andrö.+ Awena dania laröi mbanua daʼö ba oya gokhöta niʼohera.+
15 Mate dania ndraʼugö ba waʼatuamö si fao faʼahono dödö, ba lakoʼo ndraʼugö simane ira tuamö.+
16 Hizaʼi, mangawuli dania ba daʼa+ ngaʼötöu si öfa, börö me lö nasa irugi inötö wanguhuku niha Gamori.”*+
17 Me no aekhu luo ba no ogömi-gömi, kalua naha galitö sanimbo-nimbo, ba so sara solo si hola-hola, itöröi nagole si no mutataba andrö.
18 Me luo daʼö, fawuʼu li Yehowa khö Gaberamo.+ Imane, ”Ba maʼuwumö dania ubeʼe danö daʼa,+ iʼotarai nungo nidanö Miserai irugi nungo nidanö sebua, Ungo Nidanö Oiferati:+
19 tanö niha Geni,+ niha Genisi, niha Gadamoni,
20 niha Kheti,+ niha Weresi,+ niha Refaʼi,+
21 niha Gamori, niha Ganaʼana, niha Girigasi, ba niha Yebusi.”+
Nisura ba gahe zura
^ Sin.: ”nono matua”.
^ Sin.: ”Ono moroi ba hunö-hunöu”.
^ Mazui ”börö me lö safönu nasa golalöwa niha Gamori”.
