1 Moze 16:1-16
-
Hagara hegöi Simaʼeli (1-16)
16 Lö manö nasa si tumbu nono khö Zaraʼi,+ hizaʼi so samösa zawuyunia moroi ba Miserai yaʼia daʼö Hagara.+
2 Imane Saraʼi khö Gaberamo, ”Uʼandrö khöu, fondrondrongo wehedegu. Lö onogu nibeʼe Yehowa. Hana na orudu ndraʼugö khö zawuyugu, maʼatö so nonogu khönia.”+ Fao dödö Gaberamo ba wehede Zaraʼi.
3 Me no fulu fakhe toröi Gaberamo ba danö Ganaʼana, ihalö zawuyunia Saraʼi sotöi Hagara niha Miserai andrö ibeʼe foʼomo Gaberamo.
4 Ba orudu Gaberamo khö Hagara irege manabina ia. Me no iʼila wa manabina ia, ibörögö iʼosiwawöi Zaraʼi, sokhö yaʼia.
5 Imane Saraʼi khö Gaberamo, ”Tefakao ndraʼo börö-börö ndraʼugö. Yaʼodo zameʼe khöu* sawuyugu, ba me no iʼila manabina ia, ibörögö iʼosiwawöi ndraʼo. Akha Yehowa zangoromaʼö haniha zatulö ba gotaluada.”
6 Imane Aberamo khö Zaraʼi, ”Yaʼia andrö sawuyumö. Falua hadia zomasi dödöu khönia.” Ba lö sökhi nifalua Zaraʼi khö Hagara irege moloi Hagara.
7 Aefa daʼö, tohare malaʼika Yehowa möi ifalukhaisi Hagara ba gumbu nidanö ba danö si mate, ba lala numalö ba Zuri.+
8 Imane khönia malaʼika, ”He Hagara, sawuyu Zaraʼi, hezo öʼotarai ba hezo numalöʼö?” Imane Hagara, ”Soloi ndraʼodo andre khö Zaraʼi sokhö yaʼo.”
9 Imane malaʼika Yehowa andrö, ”Fuliʼö khö zokhö yaʼugö ba angalulu khönia.”
10 Imane nasa malaʼika Yehowa andrö, ”Uʼoyaʼö dania maʼuwumö irege tebai muʼerai.”+
11 Itohugö wangumaʼö malaʼika Yehowa, ”Si so ba dabinamö andrö ono matua. Na tumbu ia dania, beʼe töinia Simaʼeli,* börö me no irongo Yehowa wamakao si göna khöu.
12 Hulö dania galide gatua ia.* Dozi niha lalawa ia, ba ilawa göi ira, ba fabali auri ia khö ndra talifusönia.”*
13 Ba iʼangaröfili döi Yehowa Hagara si no fahuhuo khönia, ”Yaʼugö Lowalangi sangila maʼafefu.”+ Imane, ”No anehe ndraʼo zamaigi yaʼo.”
14 Daʼö mbörö wa lafotöi mbaʼa nidanö andrö Beʼeri-lahai-roi.* (Baʼa daʼö so ba gotalua Gadesi faoma Beredi.)
15 Lö ara, tumbu nono matua khö Hagara, ba Aberamo zamotöi ono andrö Simaʼeli.+
16 Faʼalawa ndröfi Gaberamo me tumbu Zimaʼeli khö Hagara yaʼia daʼö 86 fakhe.
Nisura ba gahe zura
^ Sin.: ”ba dötöʼamö”.
^ Eluahania ”Irongo Lowalangi”.
^ So zangumaʼö zebra, te eluahania ifalua-lua manö zomasi dödönia.
^ Mazui te ”faʼudu ia dania khö ndra talifusönia maʼafefu”.
^ Eluahania ”Baʼa Nidanö moroi khö Lowalangi Sauri Samaigi Yaʼo”.
