1 Moze 17:1-27
17 Me no irugi 99 fakhe ndröfi Gaberamo, ifalukhaisi ia Yehowa imane, ”Yaʼodo Lowalangi Fondrege Zabölö. Törö lalagu ba oromaʼö wa lö mosinegu ndraʼugö.
2 Fawuʼu li ndraʼo khöu,+ ba oya sibai dania maʼuwumö ubeʼe.”+
3 Mangalulu Gaberamo ba imane nasa Lowalangi,
4 ”No fawuʼu li ndraʼo khöu,+ ba tobali ndraʼugö ama ba ngawalö soi.+
5 Tenga saʼae Aberamo* döimö. Töimö iadaʼa Aberahamo,* börö me ubaliʼö ndraʼugö ama ba soi soya.
6 Uʼoyaʼö dania maʼuwumö. Moroi khöu iʼotarai soi ba moroi ba maʼuwumö tumbu razo-razo.+
7 ”Hasambalö ufalua mbuʼusa ligu khöu+ hegöi ba maʼuwumö, si tobali buʼusa li si lö aetu götö-götö waʼara, wa Lowalangiu ndraʼo ba Lowalangi maʼuwumö.
8 Ubeʼe dania khöu hegöi ba maʼuwumö danö si fatewu yaʼugö ba soi böʼö,+ yaʼia daʼö tanö Ganaʼana maʼasagörö, enaʼö tobali tana khömi sagötö faʼara, ba tobali Lowalangira ndraʼo.”+
9 Imane Lowalangi khö Gaberahamo, ”Lö tola löʼö göi öfalua mbuʼusa ligu, yaʼugö hegöi maʼuwumö götö-götö waʼara.
10 Daʼa mbuʼusa ligu khömi, si lö tola löʼö öfalua, simanö göi maʼuwumö: Fefu nono matua ba gotaluami, hasambalö lasuna.+
11 Hasambalö misuna guli wamatuami, daʼö dania dandra mbuʼusa li ba gotaluada.+
12 Mifalua daʼa götö-götö waʼara: Fefu nono matua ba khömi si no ikhamö walu hari, hasambalö misuna,+ yaʼia daʼö dozi si tumbu ba nomomi hegöi na tenga maʼuwumi, simanö göi niʼöli ba soi böʼö.
13 Dozi ono matua si tumbu ba nomo ba dozi ono matua niʼölimi, hasambalö misuna.+ Daʼa dandra ba mbotomi wa moguna mbuʼusa ligu khömi irugi zi lö aetu.
14 Na so nono matua si lö omasi lasuna, hasambalö mibunu niha daʼö.* No isawö mbuʼusa ligu.”
15 Aefa daʼö, imane Lowalangi khö Gaberahamo, ”Böi saʼae beʼe töi woʼomou Saraʼi,*+ börö me Sara* döinia iadaʼa.
16 Ufahowuʼö dania ia, ba tumbu khöu samösa nono matua moroi khönia.+ Ufahowuʼö dania ia. Tobali ia ina ba soi soya hegöi khö ndra razo-razo.”
17 Ituhi danö Aberahamo me irongo daʼö. Ibörögö maʼiki ia ba imane tödönia,+ ”Hewisa wa tola moʼono ndra matua si no 100 fakhe ba hewisa wa tola moʼono Zara, ira alawe si 90 fakhe andrö?”+
18 Andrö imane Aberahamo khö Lowalangi sindruhu, ”Yaʼöfahowuʼö Zimaʼeli!”+
19 Imane Lowalangi, ”Sindruhu-ndruhu wa tumbu dania khöu nono matua moroi khö woʼomou Sara, ba öbeʼe töinia Izaʼaki.*+ Fawuʼu li dania ndraʼo khönia ba moguna daʼö khö maʼuwunia irugi zi lö aetu.+
20 Hizaʼi, no urongo wangandrömö sanandrösa khö Zimaʼeli. Ba ufahowuʼö ia göi, ba oya sibai dania maʼuwunia ubeʼe. Tobali ia dania tua zi 12 sondröniaʼö ba ubaliʼö ia soi sebua.+
21 Hewaʼae simanö, fawuʼu li ndraʼo khö Gizaʼaki,+ ono si tumbu dania khö Zara ba ndröfia ba ginötö simane daʼa.”+
22 Me no awai fahuhuo ia khö Gaberahamo, mofanö Lowalangi.
23 Ba zi maʼökhö daʼö, isuna nononia Simaʼeli andrö Aberahamo, simanö göi nono matua fefu si tumbu ba nomonia hegöi niʼölinia. Dozi ono matua si so ba nomonia, isuna simane niwaʼö Lowalangi khönia.+
24 Me lasuna Gaberahamo, 99 fakhe ndröfinia.+
25 Me lasuna nononia Simaʼeli, 13 fakhe ndröfinia.+
26 Ba zi maʼökhö daʼö, lasuna Gaberahamo awö nononia Simaʼeli.
27 Dozi ono matua si so ba nomonia, he si tumbu ba daʼö hegöi niʼölinia ba soi böʼö, fendronga lasuna ira.
Nisura ba gahe zura
^ Eluahania ”Ama Niʼalawaʼö”.
^ Eluahania ”Ama Niha Sato”.
^ Sin.: ”laheta ia moroi ba soinia”.
^ Eluahania ”Ono Razo”.
^ Te eluahania ”Somasi Fasoso”.
^ Eluahania ”Faʼiki”.
