1 Moze 19:1-38
19 Ofeta ndra malaʼika si darua andrö ba Zodoma me tanö owi, ba no modadao Loti ba mbawa göli Zodoma. Me iʼila ira Loti, ifalukhaisi ira ba ituhi danö,+
2 imane, ”He Pa, miʼaine yomo, ba nomo zawuyumi andre miförö bongi. Akha masasai gahemi. Aefa daʼö, mahemolu sihulö wongi na maoso ami, ba tola mitohugö wofanö.” Lamane khönia, ”Lö salania, ba golayama manö mörö ndraʼaga.”
3 Hizaʼi, iforege khöra wangumaʼö ba laʼoʼö niwaʼönia, möi ira ba nomonia. Ibeʼe göra, ibogö roti si lö mufaruka ragi ba manga ira.
4 Fatua lö mörö ira, fefu ndra matua ba mbanua Zodoma, iraono awö zatua, möi lahurufai ba lafaʼuʼu nomo daʼö.
5 Muʼao-ao ira khö Loti, ”Hezo so ndra matua si tohare ba nomomö bongi daʼa? Ohe ira baero, omasiga orudu khöra.”+
6 Ba möi baero Loti wamalukhaisi yaʼira, ba iduhö mbawandruhö.
7 Imane, ”He yaʼami ira talifusö, uʼandrö khömi, böi mifalua zi lö sökhi.
8 So darua nonogu alawe si lö muhalö. Uʼohe ira baero ba mifalua gofu hadia zomasi dödömi khöra. Hizaʼi, böi migadu ndra matua si darua andre börö me no lalumöʼö ira ba nomogu.”+
9 Ba lamane, ”Hetaʼögö!” Ha si fatewu ndraʼugö ba daʼa, hana wa barani sibai ndraʼugö wanguhuku yaʼaga. Abölö-bölö wamakao si göna khöu mabeʼe moroi khö ndra matua si darua daʼö.” Latuliʼö Loti ba lalulugö mbawandruhö.
10 Laʼoroʼö dangara ira matua si darua daʼö ba ladöni Loti bakha ba nomo enaʼö teduhö mbawandruhö.
11 Lambawainö hörö niha sato si so ba mbawandruhö andrö, he iraono he satua irege marase ira wangalu-ngalui bawandruhö.
12 Lamane ira matua si darua andrö khö Loti, ”Hadia so nasa nösi nomou tanö böʼö baero daʼa? Umönöu, onou matua, onou alawe, ba fefu zahatö khöu, heta ira ba mbanua daʼa!
13 Madudugö mbanua daʼa. No irongo Yehowa wangarö-ngarö niha ba mbanua andre,+ daʼö mbörö wa ifatenge ndraʼaga Yehowa ba wanudugö banua daʼa.”
14 Ba möi Loti wamatunö khö ndra umönönia, sangai dania ononia alawe. Ifandrai-ndrai wangumaʼö khöra, ”Miʼaliokö! Miheta ami ba daʼa, börö me idudugö Yehowa mbanua daʼa!” Ba lawalinga si fawude-wude ia ira umönönia.+
15 Me ibörögö tumbu luo, lafangaösö Loti ira malaʼika si darua andrö, ”Aliokö! Ohe woʼomou ba iraonou si darua, enaʼö lö mate ndraʼugö na tedudugö mbanua daʼa börö horö si no ifalua!”+
16 Ba ahou sibai Loti. Börö me ihakhösi tödö ia Yehowa,+ andrö latuyu dangania ira malaʼika si darua andrö hegöi tanga woʼomonia awö danga ndraononia si darua ba laʼoloiʼö ira baero moroi ba mbanua daʼö.+
17 Me awena sibai larugi mbalö mbanua, imane khöra malaʼika si samösa andrö, ”Oloi! Böi faigi furi+ ba böi olombase ba mbanua daʼa!+ Oloi ba mbanua si so ba hili faböi mate ndraʼugö!”
18 Imane khöra Loti, ”Böi fatenge ndraʼo ba daʼö Yehowa!*
19 Uʼandrö khöu, hewaʼae no öhakhösi tödö zawuyumö andre ba no öfalua khögu zi sökhi* me no öʼefaʼö nosogu,+ hizaʼi lö sagu khögu woloi ba mbanua si so ba hili. Ataʼudo, ma dania so zalua khögu ba matedo.+
20 Uʼandrö khöu, hiza mbanua sahatö. Ba daʼö moloido. No ide-ide mbanua daʼö. Enaʼö teʼorifi ndraʼo, hadia tola ba mbanua side-ide andrö moloido?”
21 Imane khönia, ”Lau, utehegö khöu.+ Lö ududugö mbanua nitötöimö andrö.+
22 Aliokö! Oloi ba daʼö, börö me lö uʼila ufalua hadia ia na lö sofeta ndraʼugö ba daʼö!”+ Daʼö mbörö wa lafotöi mbanua daʼö Zoara.*+
23 No tumbu luo me ofeta Loti ba Zoara.
24 Ba itorugö Yehowa deu alitö awö mbalera ba Zodoma ba Gomora. Moroi khö Yehowa deu daʼö ba mbanua si yawa.+
25 Ihori fefu mbanua sebua andrö hegöi banua side-ide, fefu niha awö zinanö.+
26 Ba tanö furi Loti so woʼomonia, no ifaigi furi. Andrö tobali ia kara moʼasio.+
27 Ba möi Gaberahamo me sihulö wongi sibai ba gamaudu fahuhuo khönia Yehowa ba zilalö.+
28 Tokea ia me iʼila Zodoma awö Gomora ba fefu mbanua si fasui daʼö. Numalö miyawa zimbo moroi ba mbanua daʼö hulö zimbo gaotö!+
29 Börö me itörö tödö Lowalangi Gaberahamo me edöna ifakiko mbanua si fasui daʼö, andrö iwaʼö Lowalangi khö Loti enaʼö iröi nahiania sahatö ba mbanua andrö.+
30 Aefa daʼö, mofanö Loti hegöi ononia alawe si darua laröi Zoara ba lasawa mbanua si so ba hili+ börö me ataʼu ia toröi ba Zoara.+ Toröi ia ba dögi narö hili fao ndraononia alawe si darua.
31 Imane siaʼa khö nakhinia, ”No atua namada ba lö hadöi ira matua ba mbanua daʼa sinangea mangai yaʼita tobali foʼomora, simane si toʼölö lafalua niha sato.
32 Aine, datafabadugö khönia nagu ba orudu mörö ita khönia enaʼö so ngaʼötö namada.”
33 Bongi daʼö, mabu namara faoma agu labeʼe. Ba möi ziaʼa orudu mörö ia khö namania. Ba lö iʼila amania hamega mörö ba zingania nononia ba hamega maoso ia.
34 Mahemolu daʼö, imane siaʼa khö nakhinia, ”No forudu mörö ndraʼo khö namada me owi. Aine, datafuli tabeʼe önia nagu bongi daʼa. Ba förö dania ba zingania, enaʼö so ngaʼötö namada.”
35 Ba lafuli zui labeʼe nagu ö namara bongi daʼö irege mabu. Ba möi ziakhi forudu mörö ia khö namania. Ba lö iʼila amania hamega mörö ba zingania nononia ba hamega maoso ia.
36 Ba manabina nono alawe si darua andrö khö Loti moroi khö namara.
37 Tumbu nono matua khö ziaʼa ba ibeʼe töinia Moabi.+ Yaʼia ngaʼötö niha Moabi si so irugi maʼökhö.+
38 Ba tumbu göi nono matua khö nakhinia ibeʼe töi Beni-emi. Yaʼia ngaʼötö niha Gamoni+ si so irugi maʼökhö.
Nisura ba gahe zura
^ Fahuhuo Loti khö malaʼika andrö hulö na khö Yehowa fahuhuo ia.
^ Mazui ”no öforomaʼö khögu waʼomasi si lö faröi”.
^ Eluahania ”Ide-ide”.
