1 Moze 21:1-34
21 Simane niwaʼö Yehowa, iʼameʼegö tödö ba ifalua Yehowa zi no ifabuʼu khö Zara.+
2 Ba manabina Zara+ tumbu nono matua khö Gaberahamo ba waʼatuania ba ginötö si no ifabuʼu Lowalangi.+
3 Ifotöi Aberahamo nono si tumbu andrö khö Zara yaʼia daʼö Izaʼaki.+
4 Isuna Gizaʼaki andrö Aberahamo simane niwaʼö Lowalangi me no irugi walu hari nono daʼö.+
5 Ba no 100 fakhe ndröfi Gaberahamo me tumbu nononia Izaʼaki.
6 Imane Sara, ”No ifaʼiki ndraʼo Lowalangi. Dozi niha samondrongo daʼa, fao ira khögu waʼiki.”*
7 Imane nasa, ”Haniha zangumaʼö khö Gaberahamo mböröta, ’Mamaenu ono dania Zara’? Hizaʼi, tumbu khögu nono matua ba waʼatuania.”
8 Itugu tedou waʼebua nono andrö ba lö saʼae mamaenu ia. Börö daʼö, ifalua gowasa sebua Aberahamo me iböhöli Izaʼaki wamaenu.
9 Iʼila Sara wa iʼoʼaya-aya Gizaʼaki ono matua si tumbu khö Hagara+ ira alawe Miserai andrö, ono moroi khö Gaberahamo.+
10 Andrö imane Sara khö Gaberahamo, ”Fofanö zawuyu ira alawe daʼö faoma ononia, börö me tenga sanema ondröita nono zawuyu andrö simane onogu Izaʼaki!”+
11 Hizaʼi, lö omasi Gaberahamo me irongo wehede Zara andrö sanandrösa khö nononia.+
12 Imane Lowalangi khö Gaberahamo, ”Böi abao dödöu ba wehede Zara sanandrösa khö nono matua hegöi khö zawuyumö ira alawe andrö. Fondrondrongo niwaʼönia* börö me moroi khö Gizaʼaki dania iʼotarai maʼuwu nifabuʼu andrö khöu.+
13 Hewaʼae simanö, ubaliʼö göi soi sebua+ dania nono zawuyumö ira alawe andrö,+ börö me onomö ia.”
14 Ba maoso Gaberahamo me sihulö wongi sibai, ihalö roti awö naha* nidanö si so ösi, ibeʼe khö Hagara. Ifazawa Aberahamo ba galisi Hagara, aefa daʼö ifofanö darua ira ono daʼö.+ Ba mofanö Hagara, itöröi danö si mate ba Mbere-seba.+
15 Ba gafuriata, ahori nidanö andrö ba ituliʼö nono daʼö ba narö ndruʼu sodoi.
16 Ifadege ia maʼifu fandröndröu moroi ba daʼö, modadao ia ha yaʼia. Imane, ”Afökhö khögu na mate nono andrö.” Ba modadao ia ba daʼö, iduhugö wege-ege.
17 Irongo Lowalangi wege-ege nono daʼö+ ba fahuhuo malaʼika Lowalangi khö Hagara moroi ba zorugo,+ ”Hana wa meʼe ndraʼugö Hagara?” Böi ataʼufi börö me no irongo Lowalangi weʼe nono daʼö ba nahia niröimö yaʼia.
18 Aeʼe ba daʼö, fezizio ia ba gogohe dangania, börö me ubaliʼö dania ia soi sebua.”+
19 Ba ibokai Lowalangi hörö Hagara irege oroma khönia sambua mbaʼa nidanö. Möi ia ba daʼö, ifoʼösi naha* gönia idanö ba ifabadugö khö nono andrö.
20 Itugu ebua nono daʼö+ ba lö faröi khönia Lowalangi. Ba danö si mate toröi ia ba tobali ia sonekhe fafana.
21 Manaroʼo ia ba Danö si Mate Farana+ ba ifangowalu ia inania khö ndra alawe Miserai.
22 Me luo daʼö, imane Abimelekhi khö Gaberahamo fao ira Wikholo kumandru zaradadunia, ”Gofu hadia nifaluamö, fao khöu Lowalangi.+
23 Iadaʼa, aeʼe khögu ba hölu ba döi Lowalangi wa lö ölimo ndraʼo, iraonogu awö maʼuwugu. Foromaʼö göi khögu waʼomasi si lö faröi hegöi ba soi si toröi yaʼugö andre simane faʼomasigu si lö faröi khöu.”+
24 Ba imane Aberahamo, ”Möido khöu ba hölu.”
25 Hizaʼi, mangadu Gaberahamo khö Gabimelekhi börö mbaʼa nidanö nifadöni ndra sawuyu Gabimelekhi.+
26 Imane Abimelekhi, ”Lö uʼila haniha zamalua daʼa. Lö irai öfatunö khögu daʼa. Awena urongo iadaʼa.”
27 Ba mamuala Gaberahamo khö Gabimelekhi, ibeʼe mbiri-biri hegöi sawi. Aefa daʼö, lalau fawuʼu li darua ira.
28 Me ifabali Aberahamo zi fitu ngaʼeu nono mbiri-biri si alawe moroi ba ngawawa,
29 imane Abimelekhi, ”Hana wa öfabali nono mbiri-biri si alawe andre si fitu ngaʼeu?”
30 Imane Aberahamo, ”Hasambalö ötema nono mbiri-biri si alawe si fitu ngaʼeu andre, daʼa zamaduhuʼö wa yaʼo zogao baʼa nidanö andre.”
31 Daʼö mbörö wa ifotöi nahia daʼö Bere-seba,*+ börö me ba daʼö möi ira ba hölu darua ira.
32 Simane daʼö wawuʼusa li+ nifaluara ba Mbere-seba. Ba mangawuli Gabimelekhi fao ira Wikholo kumandru zaradadunia ba mbanua Wilisiti.+
33 Aefa daʼö, itanö Aberahamo sageu zinanö damarika ba Mbere-seba, ba daʼö iʼangaröfili döi Yehowa,+ Lowalangi si lö tebulö irugi zi lö aetu.+
34 Ara toröi* Gaberahamo ba mbanua Wilisiti.+
Nisura ba gahe zura
^ Mazui te ”laʼigiʼö ndraʼo”.
^ Sin.: ”linia”.
^ Nifazökhi moroi ba guli gurifö.
^ Nifazökhi moroi ba guli gurifö.
^ Te eluahania ”Baʼa Nidanö Hölu” mazui ”Baʼa Nidanö Fitu”.
^ Mazui ”fatewu”.
