1 Moze 25:1-34
25 Ifuli zui mangowalu Gaberahamo ihalö ndra alawe sotöi Ketura.
2 Aefa daʼö, moʼono Getura tumbu khönia Zimerana, Yokesana, Medano, Midiano,+ Yisibaki ba Sua.+
3 Yokesana ama Zeba faoma Dedano.
Ngaʼötö Dedano yaʼia daʼö Asuri, Letusi ba Loimeni.
4 Ono Midiano yaʼia daʼö Efa, Eferi, Hanokhi, Abida ba Elidaʼa.
Daʼö fefu ngaʼötö Getura.
5 Ibeʼe fefu gokhötania Aberahamo khö Gizaʼaki,+
6 hizaʼi mamuala ia ba ndraononia si tumbu moroi khö woʼomonia ba döi. Gasa-gasa waʼauri Gaberahamo, ifatenge ira numalö ba gatumbukha, fandröndröu moroi khö nononia Izaʼaki+ yaʼia daʼö ba danö gatumbukha.
7 Ba faʼanau noso Gaberahamo 175 fakhe.
8 Ba aetu noso Gaberahamo, mate ia me no alawa sibai ndröfinia, atua ba ahono dödönia. Laʼorudugö ia ba zinga ndra tuania.*
9 Lakoʼo ia iraononia Izaʼaki ba Simaʼeli ba dögi narö hili Makhefela sahatö ba Mamere,+ ba mbenua Geferona ono Zohara niha Kheti andrö.
10 No iʼöli mbenua daʼö Aberahamo ba niha Kheti. Ba daʼö lakoʼo Gaberahamo ba zinga woʼomonia Sara.+
11 Me no mate Gaberahamo, lö iböhöli Lowalangi wamahowuʼö ononia Izaʼaki,+ ba toröi Gizaʼaki ahatö ba Mbeʼeri-lahai-roi.+
12 Daʼa waö-waö Zimaʼeli+ ono Gaberahamo si tumbu moroi khö Hagara,+ ira alawe Miserai sawuyu Zara andrö.
13 Daʼa döi ndraono Zimaʼeli, yaʼia daʼö ngaʼötönia: Nebayoti+ ono siaʼa khö Zimaʼeli, aefa daʼö Kedara,+ Adibeʼeli, Mibisama,+
14 Misima, Duma, Masa,
15 Hadada, Tema, Yeturi, Nafisi ba Kedema.
16 Daʼö ngaʼötö Zimaʼeli sondröniaʼö si 12 mado. Töira andrö göi tobali töi mbanua ba töi nosera.*+
17 Ba faʼanau noso Zimaʼeli 137 fakhe. Ba mate ia, aefa daʼö laʼorudugö ba zinga ndra tuania.*
18 Banua si toröi yaʼira tebörögö moroi ba Hawila+ ahatö Zuri,+ sahatö ba Miserai, irugi Asiria. Lö lafandröndröu ira ba zinga ndra talifusöra fefu.*+
19 Daʼa waö-waö Gizaʼaki ono Gaberahamo.+
Aberahamo ama Gizaʼaki.
20 Me no 40 fakhe ndröfi Gizaʼaki, mangowalu ia khö Rebeka. Rebeka ono alawe si tumbu khö Mbetueli,+ niha Garamo moroi ba Wadana-aramo,* akhi Labano niha Garamo andrö.
21 Börö me lö moʼono woʼomonia, lö iböhöli Izaʼaki wangandrö khö Yehowa. Ifondrondrongo wangandrönia Yehowa ba manabina Rebeka.
22 Irasoi Rebeka wa faʼudu-udu nono matua si so ba dabinania+ irege imane, ”Na simane daʼa zalua khögu, hadia guna waʼaurigu?” Börö daʼö, iʼandrö wanuturu lala moroi khö Yehowa.
23 Imane khönia Yehowa, ”So dombua soi bakha ba dalumö,+ ba moroi ba dabinamö dania tumbu dombua soi si faböʼö.+ Abölö soi zi samösa moroi khö zi samösa,+ ba tobali enoni ziakhi dania ziaʼa.”+
24 Ba me irugi baŵa waʼatumbu nononia, hiza tumbu khönia nono si faero!
25 Tumbu nono siaʼa. No oroyo-royo ba hulö no mobaru bu.+ Andrö labeʼe töinia Ezau.*+
26 Aefa daʼö, tumbu nakhinia, ba no igogohe tangania mbörö sisi Gezau.+ Andrö ibeʼe töi nono daʼö Yakobo.*+ Me tumbu nono khö Rebeka, 60 fakhe ndröfi Gizaʼaki.
27 Itugu ebua nono si darua andrö. Onekhe wealu+ Gezau ba omasi ia weʼamöi ba mbenua. Hizaʼi, Yakobo andrö niha si lö sinegu ba omasi ia toröi ba nose.+
28 Abölö iʼomasiʼö Gezau amania Izaʼaki börö me omasi ia wemanga ahulua. Na Rebeka, abölö iʼomasiʼö Yakobo.+
29 Samuza inötö, mondrino bubu Yakobo me mangawuli Gezau moroi ba mbenua. Marase sibai Gezau
30 ba imane khö Yakobo, ”Beʼe ögu maʼifu* bubu soyo-oyo andrö nirinomö.* Aliokö, marasedo sibai!”* Daʼö mbörö wa lafotöi ia Edomo.*+
31 Imane Yakobo, ”Famawa ua khögu waʼasiaʼamö!”+
32 Imane Ezau, ”Matedo waʼolofo! Hadia guna khögu waʼasiaʼa?”
33 Imane Yakobo, ”Aeʼe ba hölu khögu ua!” Ba möi ba hölu Gezau, ifamawa waʼasiaʼania khö Yakobo.+
34 Aefa daʼö, ihalö roti Yakobo hegöi bubu harita* no mege, ibeʼe khö Gezau. Manga Gezau ba ibadu nidanö. Aefa daʼö mofanö ia. Simane daʼö nifalua Gezau me lö moguna khönia waʼasiaʼania.
Nisura ba gahe zura
^ Daʼa amalalata wehede ba woʼamaedolagö faʼamate.
^ Mazui ”nosera nifotowa”.
^ Daʼa amalalata wehede ba woʼamaedolagö faʼamate.
^ Mazui te ”Faʼudu ira khö ndra talifusöra fefu”.
^ Eluahania ”Tanö Saloʼo Aramo (Siria); banua ba Mezofotamia”.
^ Eluahania ”Safönu Bu”.
^ Eluahania ”Niha Sondraʼu Börö Sisi; Samadöni Dadaoma”.
^ Mazui ”zambawa”.
^ Sin.: ”zoyo-oyo daʼö”.
^ Mazui ”olofodo sibai”.
^ Eluahania ”Soyo”.
^ Sin.: ”bubu miju”.
